Колин повел украинийини агаһландурди


2004-11-24
Share

Украинийә мәркизи сайлам комитети чаршәнбә күни украинийә баш министири виктор януковичниң президент сайлимида ғәлибә қилғанлиқини җакалиғандин кейин, америка ташқи ишлар министири колин повел шу күни баянат елан қилип, америка һөкүмити украинийә президент сайлиминиң нәтиҗисини қобул қилмайду, дәп көрсәтти.

Колин повел украинийини агаһландурди

Колин повел, америка ташқий ишлар министирлиқида өткүзүлгән ахбарат елан қилиш йиғинида, украинийә даилирини йәкшәнбә күни елип берилған президент сайлими җәрянидики сахтипәзлик вәқәлири үстидин тәкшүрүш елип бармиса, буниңдин келип чиқидиған ақивәтләр һәққидә агаһландурди.

Колин повел мундақ диди : " биз сайлам нәтиҗисиниң қанунийлиқини етрап қилмаймиз. Чүнки, сайлам хәлқара өлчәмләргә уйғун әмәс, шундақла сайлам җәрянида йүз бәргән сахтипәзлик вәқәлири үстидин елип берилған тәкшүрүш доклати елан қилинмиди."

Колин повел, украинийә даирилирини намайишчиларға қарши зораванлиқ күч қолланмаслиққа яки намайишчиларға қарши зораванлиқ күч қоллинишқа күшкүртилмәсликкә үндиди. У йәнә бундақ сайлам нәтиҗисиниң америка - украинийә мунасивитигә тәсир көрситидиғанлиқини әскәртти.

Украинийә мәркизи сайлам комитети чаршәнбә күни чүштин бурун сайлам нәтиҗисини елан қилип, украинийә баш министири виктор януковичниң сайламда ғәлибә қилғанлиқини елан қилған. Мәркизи сайлам комитети януковичниң ٪ 49 авазға ершип, рәқиби ғәрбпәрәс ислаһатчилиқи дәп тонулған юшинкониң мәғлуп болғанлиқини җакарлиған иди.

Сайлам җәрянида сахтипәзлик вәқәлири йүз бәргәнлики һәққидики хәвәрләр, юшинко тәрәпдарлириниң наразилиқини қозғиған. Нөвәттә украинийә пайтәхти кийефтики мустәқиллиқ мәйданида өктичиләрниң сайлам нәтиҗисигә қарши йүз нәччә миң кишилик наразилиқ билдүрүш һәрикити елип бериливатиду.

Русийә мәйданини өзгәртип, битәрәп туридиғанлиқини билдүрди

Руисйә президенти владимир путин илгири сайламда ғәлибә қилғанлиқи елан қилинған януковичқа телефон қилип, униң сайламда ғәлибә қилғанлиқини тәбриклигән иди. Амма русийә, януковичқа қарши аммиви һәрикәтниң күчийишигә әгишип, украинийә президент сайлимиға тутқан мәйданини өзгәртти . Русийә президенти чаршәнбә күни битәрәп туридиғанлиқини елан қилған.

Путин мундақ дәйду: "биз украинийә сайлиминиң нәтиҗисини етрап қилмаймиз яки инкар қилмаймиз. Чүнки сайламниң ахирқи нәтиҗиси техи ениқланмиди. Һәммә иш қанунлар бойичә елип берилиши керәк."

Бирләшмә ахбарат агентлиқиниң хәвәр қилишичә, америка ташқи ишлар министирлиқи сәйшәнбә күни русийиниң америкида турушлуқ баш әлчисини чақиртип, украинийә вәзийитини музакирә қилған.

Хәвәрләргә қариғанда сайламда ғәлибә қилған януковичниң қоллиғучилириму намайиш қилған . Бирақ уларниң сани өктичиләрниң саниға селиштурғили болмиғидәк дәриҗидә аз икән. Бу арида өктичи күчләр рәһбири яшинко, украинийә президенти кочиманиң сайлам нәтиҗиси тоғрисида сөһбәт елип бериш һәққидики тәклипини қобул қилған.

Бәзи анализчилар украинийидә кәң көләмлик тоқунуш келип чиқишидин әндишә қилмақта. Америкини өз ичигә алған ғәрб дөләтлири, сайламда сахтипәзлик вәқәлири йүз бәрди, шундақла украинийә даирилири сайламни контрол қиливалди, дәп қаримақта. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт