Kolin powél ukra'iniyini agahlandurdi


2004.11.24
Share on WhatsApp
Share on WhatsApp

Ukra'iniye merkizi saylam komitéti charshenbe küni ukra'iniye bash ministiri wiktor yanukowichning prézidént saylimida ghelibe qilghanliqini jakalighandin kéyin, amérika tashqi ishlar ministiri kolin powél shu küni bayanat élan qilip, amérika hökümiti ukra'iniye prézidént saylimining netijisini qobul qilmaydu, dep körsetti.

Kolin powél ukra'iniyini agahlandurdi

Kolin powél, amérika tashqiy ishlar ministirliqida ötküzülgen axbarat élan qilish yighinida, ukra'iniye da'ilirini yekshenbe küni élip bérilghan prézidént saylimi jeryanidiki saxtipezlik weqeliri üstidin tekshürüsh élip barmisa, buningdin kélip chiqidighan aqiwetler heqqide agahlandurdi.

Kolin powél mundaq didi : " biz saylam netijisining qanuniyliqini étrap qilmaymiz. Chünki, saylam xelq'ara ölchemlerge uyghun emes, shundaqla saylam jeryanida yüz bergen saxtipezlik weqeliri üstidin élip bérilghan tekshürüsh doklati élan qilinmidi."

Kolin powél, ukra'iniye da'irilirini namayishchilargha qarshi zorawanliq küch qollanmasliqqa yaki namayishchilargha qarshi zorawanliq küch qollinishqa küshkürtilmeslikke ündidi. U yene bundaq saylam netijisining amérika - ukra'iniye munasiwitige tesir körsitidighanliqini eskertti.

Ukra'iniye merkizi saylam komitéti charshenbe küni chüshtin burun saylam netijisini élan qilip, ukra'iniye bash ministiri wiktor yanukowichning saylamda ghelibe qilghanliqini élan qilghan. Merkizi saylam komitéti yanukowichning ٪ 49 awazgha érship, reqibi gherbperes islahatchiliqi dep tonulghan yushinkoning meghlup bolghanliqini jakarlighan idi.

Saylam jeryanida saxtipezlik weqeliri yüz bergenliki heqqidiki xewerler, yushinko terepdarlirining naraziliqini qozghighan. Nöwette ukra'iniye paytexti kiyéftiki musteqilliq meydanida öktichilerning saylam netijisige qarshi yüz nechche ming kishilik naraziliq bildürüsh herikiti élip bériliwatidu.

Rusiye meydanini özgertip, biterep turidighanliqini bildürdi

Ru'isye prézidénti wladimir putin ilgiri saylamda ghelibe qilghanliqi élan qilin'ghan yanukowichqa téléfon qilip, uning saylamda ghelibe qilghanliqini tebrikligen idi. Amma rusiye, yanukowichqa qarshi ammiwi heriketning küchiyishige egiship, ukra'iniye prézidént saylimigha tutqan meydanini özgertti . Rusiye prézidénti charshenbe küni biterep turidighanliqini élan qilghan.

Putin mundaq deydu: "biz ukra'iniye saylimining netijisini étrap qilmaymiz yaki inkar qilmaymiz. Chünki saylamning axirqi netijisi téxi éniqlanmidi. Hemme ish qanunlar boyiche élip bérilishi kérek."

Birleshme axbarat agéntliqining xewer qilishiche, amérika tashqi ishlar ministirliqi seyshenbe küni rusiyining amérikida turushluq bash elchisini chaqirtip, ukra'iniye weziyitini muzakire qilghan.

Xewerlerge qarighanda saylamda ghelibe qilghan yanukowichning qollighuchilirimu namayish qilghan . Biraq ularning sani öktichilerning sanigha sélishturghili bolmighidek derijide az iken. Bu arida öktichi küchler rehbiri yashinko, ukra'iniye prézidénti kochimaning saylam netijisi toghrisida söhbet élip bérish heqqidiki teklipini qobul qilghan.

Bezi analizchilar ukra'iniyide keng kölemlik toqunush kélip chiqishidin endishe qilmaqta. Amérikini öz ichige alghan gherb döletliri, saylamda saxtipezlik weqeliri yüz berdi, shundaqla ukra'iniye da'iriliri saylamni kontrol qiliwaldi, dep qarimaqta. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.