Ukra'iniyide öktichiler memliket boyiche ammiwiy ita'etsizlik herikiti qozghidi

Ukra'iniye ali sot mehkimisi saylam netijisini tonglatti

Ukra'iniye ali sot mehkimisi peyshenbe küni höküm chiqirip, ukra'iniye prézidént saylimining netijisi tonglitilghanliqini jakarlidi. Ali sot mehkimisi, öktichilerning saylam heqqidiki erzi üstidin kéler hepte höküm chiqarghan'gha qeder, saylam netijisining tonglitilghanliqini élan qildi.

Fransiye axbarat agéntliqining xewer qilishiche, ukra'iniye ali sot bayanatchisi lyéna shlyapushnikowa, "saylam netijisi öktichilerning erznamisini körüp chiqish tamamlan'ghan'gha qeder élan qilinmaydu," dep tekitligen. Ali sot mehkimisi buningghiche saylam netijisining inawetlik dep qaralmaydighanliqini qarar qilghan.

Ukra'iniyidiki öktichiler, 21 - noyabirdiki prézidént saylimida saxtipezlik weqeliri yüz bergenliki munasiwiti bilen, ukra'iniye ali sot mehkimisige dawa achqan. Ukra'iniye merkiziy saylam komitéti, charshenbe küni hazirqi bash ministir wiktor yanukowichning saylamda ghelibe qilghanliqini jakarlighan idi.

Öktichiler xelqni ammiwi ita'etsizlikke chaqirdi

Öktichiler rehbiri wiktor yoshinku, peyshenbe küni ukra'iniye xelqini memliket boyiche omumiy ita'etsizlik herikiti élip bérishqa chaqirdi. Öktichiler, ukra'iniye milliy qutquzush komitéti qurup, démokratiyini qoghdashni qarar qilghan. Bu arida ukra'iniyining gherbidiki rayonlarda rusiyige qarshi keng kölemlik namayish partlidi.Öktichiler ukra'iniyidiki bezi xelq'ara tashyollarni qamal qilip, her qaysi jayliridiki yerlik hökümetlerni yushinkoning rehberlikini qobul qilishqa ündigen.

Yekshenbe küni ötküzülgen saylamda ghelibe qilghanliqi élan qilin'ghan wiktor yanukowich, rusiyeperesliki bilen tonulghan idi. Öktichiler rehbiri yoshinku, saylam netijisini étirap qilmaydighanliqini jakarlap, qayta saylam élip bérishni telep qilghan.

Saylamda ghelibe qilghanliqi élan qilin'ghan bash ministir yanukowich, kéyif sheher merkizidiki öktichiler bilen yüzmu- yuz söhbet élip bérishni xalaydighanliqini bildürgen. Wezipisidin ayrilish aldidiki ukra'iniye pré'izdénti kuchima, ukra'iniye ichki urushning bosughisigha kélip qalghanliqini agahlandurghan . Öktichilerni siyasiy özgirish qozghashqa urunush bilen eyipligen prézidént kuchima, " weziyet hökümet da'irilirining kontrolliqi astida," dep tekitligen.

Yawropa ittipaqi saylam netijisini qobul qilmidi

Yawropa ittipaqi bilen amérika, kuchima hökümitini namayishchilargha qarshi zorawanliq küch qollanmasliqqa agahlandurdi. Yawropa ittipaqining tashqiy ishlar komisari solana, ukra'iniyidiki saylam heqqide mundaq deydu: " bizningche ukra'iniye saylam komitéti saylam netijisini élan qilghanda, saylam jeryanidiki saxtipezlikler heqqidiki naraziliqlarni oylashmighan, biz taqabil turush tedbirlirini oylishimiz. Biraq shu nuqta éniqki yawropa ittipaqi bilen ukra'iniye munasiwiti, ukra'iniyining dimokratiye bilen bolghan munasiwitige baghliq". Solana, yawropa ittipaqining ukra'iniye hökümiti élan qilghan saylam netijisini qobul qilmaydighanliqini tekitligen.

Amérika hökümiti charshenbe küni ukra'iniyining saylam netijisini qobul qilmaydighanliqini bildürgen. Amérika tashqiy ishlar ministiri kolin powéll, peyshenbe küni " biz saylam netijisining qanuniyliqini étrap qilmaymiz, chünki saylam xelq'ara ölchemlerge uyghun emes". Dep jakalighan idi. Rusiye prézidénti wladimir putin, aldida ukra'iniye bash ministiri yanukowichni saylamda ghelibe qilghanliqi munasiwiti bilen tebrikligen.Biraq uzun ötmey saylamning axirqi netijisi chiqqan'gha qeder biterep turidighanliqini élan qilghan .

Rusiye - yawropa bashliqlar yighini ukra'iniye krizisining kölenggisi astida élip bérildi

Rusiye bilen yawropa ittipaqining peyshenbe küni ga'agada ötküzgen bashliqlar yighini, ukra'iniyidiki siyasi krizisning kölenggüsi astida élip bérildi. Rusiye, yawropa ittipaqining saylam bilitini qaytidin sanash toghrisidiki chaqiriqi, ukra'iniyidiki öktichilerni qanunsizliq we zorawanliqqa küchkürtish bilen barawer, dep eyipligen.

Biraq yawropa ittipaqi komitétining re'isi, joséy manu'él baraso, rusiyining eyiplishini ibarisi qattiq sözler bilen ret qilghan. U mundaq deydu: "bizning ukra'iniye saylimidiki naraziliqlarni bildürüsh mejburiyitimiz bar. Naraziliqni ochuq - ashkara ipadileshtiki meqset, mesilige gheyri zorawanliq yolliri arqiliq hel qilish charisi tépishdur."

Rusiye prézidénti, peyshenbe küni yawropa ittipaqining rehberliri bilen ga'agada söhbet ötküzdi. U, ukra'iniye prézidént saylimidiki ixtilapni sot mehkimisining qarari boyiche hel qilish kérek, dep körsetti. Bu arida ukra'iniyidiki öktichi küchlerning saylam netijisige naraziliq bildürüsh herikiti jüme küni 5 - künige kirdi. (Erkin)