Ukra'iniyining prézidént saylimida, yoshinko ghelbige érishti


2004.12.27
Share on WhatsApp
Share on WhatsApp

Ukra'iniyening prézidént saylimi yekshenbe küni ghelbilik ayaqlashti, saylamda gherib peres öktichiler rehbiri yoshinko köp awaz bilen ghelbige ériship, ukra'iniyining yéngi prézidénti bolup saylandi.

Ukra'iniye merkizi saylam komititining saylam netijisini xulasilap élip barghan istatistikiliq melumatigha qarighanda, yoshinkogha bérilgen awaz ukra'iniyining hazirqi ministiri yanikowichqa bérilgen awazdin köp bolghanliqi üchün, saylamda gheribchi öktichiler rehbiri yoshinko ghelbe qazandi.

Ukra'iniye dölet mejlisi nöwette, yéngi prézidéntning qesem ichip, wezipe tapshuruwilish murasimi üchün jiddi teyyarliq körmekte.

Ukra'iniyining bu qétimqi saylimi intayin dagh-dughliq ötküzülgen bolup, saylamda bélet tashlash nisbiti ٪ 77 ke yetken shuningdek saylam pa'aliyetliri tertiplik we intayin ténch élip bérilghan.

Kratik saylam

Amérika saylam közetküchilirining bildürüshiche, ukra'iniyide 3 - qétim élip bérilghan saylam, ukra'iniye tarixidiki eng démokratik élip bérilghan saylam hésablinidiken.

Yawrupa bixeterlik we hemkarliq teshkilati küzetküchilirining éytishiche, bu qétimqi saylamni uyushturush xizmiti intayin yaxshi ishlen'gen bolup, paytext kéyiftiki saylam xizmetliri yawropaning ölchemlirige tamamen uyghun kelgen.

Yawropaning ukra'iniye saylimini küzetküchi wekiller ömikining tekitlishiche, yawrupa mejlisi ukra'iniyining bu qétimqi prézidént saylam netijisidin razi bolishi kérek iken. Yawropaning ukra'iniye saylimini küzetküchi wekiller ömiki yene, eger yawrupa ittipaqi türkiyini yawrupa ittipaqigha qobul qilishni muzakire qiliwatqan bolsa, undaqta ukra'iniyini ishik sirtida qaldurup qoymasliqi kérek, digen pikirni otturigha qoyghan.

Ukra'iniyilikler pexirlen'güsi

Ukra'iniye metbu'atlirining qarishiche, ukra'iniyining yéngi merkizi saylam komitétining xizmet ünümi intayin netijilik élip bérilghan.

Gherebche öktichi partiye rehbiri yoshinko 26 - dékabir küni, özining saylamda ghelbe qilghanliqini élan qilghan. Yoshinko özini qollighuchilargha mundaq digen: 'ukra'iniye musteqil bolghan 14 yildin buyan, axiri öz erkinlikini qolgha keltürdi, yanikowich qatarliq kishiler we uning wekillirining wujudi zorawanliq we yalghanchiliq bilen tolghan, ular kishilik hoquqqa hörmet qilmaydighan hakimiyetning tarixqa aylan'ghanliqini étirap qilghan emes, amma ukra'iniye bügündin étibaren démokratik yéngi bir dewrge qedem qoydi".

Yushinko sözide yene: "yene bir yildin kéyin we yaki besh yildin kéyin, kishiler tarixi ehmiyetke ige mundaq bir sözni qilishidu: bu méning zéminim ukra'iniye. Démek men bu döletning puqrasi bolghanliqim üchün pexirlinimen."

Yoshinko yene, axbarat muxbirliri hemde xelq'ara saylam küzetküchilirining ukra'iniyining démokratiyisi we erkinlik ishliri üchün töhpe qoshqanliqini mü'eyyenleshtürüp, ulargha yuqiri baha béridighanliqini bildürdi.

Kowichning pilani

Bu arida, ukra'iniyining nöwette bash ministirliq wezipisini ötewatqan yanokowich gerche özining yéngilgenlikini iqrar qilghan bolsimu, emma choqum bir küchlük oktichiler teshkilati teshkillep, qanuniy yollar arqiliq bu dölette özlirining belgilik ornini tikleydighanliqini, hemde yéngidin saylan'ghan hökümetning pa'aliyetliri üstidin nazaret élip bérip, mezkur hökümetni xelqning arzusi boyiche ish qilishqa mejburlaydighanliqini tekitlimekte. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.