Америка дөләт мәҗлисидә хитайниң юникал нефит ширкитини сетивелиш тәклипи һәққидә йиғин өткүзүлди


2005-07-15
Share

Хитай һөкүмитиниң күнсири көпийватқан енергийә еһтияҗини қамдаш үчүн һәмдә африқа вә каспи деңизидики нефит вә тәбиий газниң хитайға йүзлинишини капаләндүрүш үчүн елип бериватқан паалийәтлири америкидики нурғун кишиләрни хитай һөкүмитиниң ахирқи мәқсиди тоғрисида әндишләндүриватқан бир пәйиттә, хитайниң синок нефит ширкитиниң америкиниң юникал нефит ширкитини сетивилиш үчүн бәргән 18 милярд бәш йүз милйон долларлиқ тәклипи америкида қаттиқ ғулғула қозғиди.

Хитай нефит ширкитиниң тәклипи шундақла, америкида хитайниң иқтисадий тәрәққияти тоғрисида пәрқлиқ көз қарашта болған сиясәтчиләр вә мулаһизиичиләр оттурисидики муназириләрниму өлғайтивәтти.

Охшаш болмиған қарашлар

Америкидики нурғун сиясий мулаһизичиләр, хитай синок нефит ширкитиниң америкиниң юникал нефит ширкитини сетивәлиш үчүн херидар болғанлиқини, хитай һөкүмитиниң дунядики нефит мәнбәлириниң контроллуқини қолға кәлтүрүшни мәқсәт қилған һәрикитиниң бир басқучи дәп қаримақта.

Бәзи мулаһизичиләр болса, хитай нефит ширкитиниң юникал нефит ширкитини сетивелиш тәклипиниң нормал бир иқтисадий паалийәт икәнликини, бу һәрикәтни башқа түрлүк тәбирләшниң тоғра болмайдиғанлиқини тәкитлимәктә .

Вал стирит жорнал гезитиниң хәвиригә қариғанда, америка дөләт мәҗлисиниң нурғунлиған әзалири вә америка мудапиә министирлиқи хадимлири, хитай ширкитиниң америка нефит ширкитини сетивелиш тәшәббуси , кәлгүсидә америка вә хитай оттурисидики дуняниң сиясий вә иқтисадий рәһбәрлики үчүн елип берилидиған тоқунушни тезлитидиғанлиқини баян қилмақта. Лекин америкидики бәзи содигәрләр вә илмий хадимлар, хитайниң иқтисадий тәрәққияти вә башқа дөләтләр билән болған иқтисадий мунасивити хитайни техиму демократлаштуруп , уни дуняниң муқимлиқи үчүн муһим рол ойнайдиған бир дөләткә айландуриду, дейишмәктә.

Дөләт мәҗлисидики йиғин

Қандақ болушидин қәтий нәзәр, чаршәнбә күни америка дөләт мәҗлисидә хитай синок нефит ширкитиниң америкиниң юникал нефит ширкитини 18 милярд бәш йүз милйон долларға сетивелиш тәклипи тоғрисида өткүзүлгән йиғинда, америка дөләт мәҗлисиниң әзалири, хитайниң ширкитиниң юникал ширкитини сетивелиш тәклипни тәнқид қилип, бу тәшәббусниң америкиниң истратегийилик миллий мәнпәити үчүн бир тәһдид икәнликини тәкитлиди.

Америка дөләт мәҗлиси һәрбий ишлар комитетиниң рә иси дункан һунтәр йиғинда қилған сөзидә, енергийиниң истратегийилик бир мадда икәнликини вә буниң америкиниң миллий бихәтәрлики мәсилиси билән зич мунасивәтлик икәнликини тәкитлиди .

Америка бирләшмә агентлиқиниң хәвәр қилишичә, америка дөләт мәҗлиси һәрбий ишлар комитетида өткүзүлгән йиғинда сөз қилған америка дөләт мәҗлиси әзалири вә мутәхәссисләр, хитай нефит ширкитиниң асаслиқ мәқсидиниң пәқәт иқтисадий мәнпәәт әмәс, хитай һөкүмитиниң дунядики енергийә мәнбәлириниң контроллуқини қолға кәлтүрүш пиланини әмәлийләштүрүш икәнликини билдүрди.

Йиғинда сөз қилған сабиқ америка мәркизий ахбарат тәшкилатиниң мудири җимиз вулси, "хитай ширкитиниң мәқситиниң пәқәт иқтисадий мәнпәәт икәнликигә ишиниш әхмәқлиқ . Бу хитай ширкитиниң идаричилириниң 70٪ пирсәнти хитай һөкүмити вә хитай коммунист партийиси тәрипидин тәйинләнгән" , деди.

Йеқинда, америка кеңәш палатаси әзалириму президент бушқа бир парчә хәт әвәтип, хитай нефит ширкитиниң америкиниң юникал нефит ширкитини сетивелиш тәклипигә гуман билән қарайдиғанлиқини билдүрүп, униңдин, бу мәсилиниң америкиниң миллий бихәтәрлик мәсилиси билән болған мунасивитигә диққәт қилишни тәләп қилди.

юқуридики һәрикәтләрниң тәсири болса керәк, пәйшәнбә күни америкида елип берилған бир қетимлиқ райини синашта, америка хәлқиниң мутләқ көп қисми, хитай синок нефит ширкитиниң америкиниң юникал ширкитини сетивелишиға қарши икәнликини ипадилигән . (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт