Үрүмчи, хитай буйичә булғиниш дәриҗиси әң еғир шәһәргә айланди


2007.01.15

Хитай даирилириниң 15 ‏- январ күни үрүмчидин бәргән хәвиридин ашкарилинишичә, үрүмчи шәһири өткән бир йил ичидә муһитни қоғдаш хизмитидә интайин бәк арқида қалған һәмдә өлчими бойичә қилишқа тегишлик болған муһитни қоғдаш хизмитиниң 70% и өз пети қелип, һечкимниң кари болмиған. Мәзкур хәвәрдә ейтилишичә, йеңи йил киргәндин буян, үрүмчидики һаваниң булғиниш дәриҗиси техиму бәк еғирлашқан болуп, мәзкур шәһәр "мәмликәт бойичә булғиниш дәриҗиси әң еғир шәһәр" гә айланған.

Қара туман қаплиған үрүмчи

Үрүмчи шәһири муһитни назарәт қилиш мәркизи, үрүмчидә 1 ‏- январ күнидин башлап та һазирғичә, ис -туман түпәйлидин келип чиққан булғинишниң интайин еғир һаләткә йәткәнликини мәлум қилиш билән бир вақитта "һазир үрүмчи шәһириниң асман бошлуқидики қара туман 800 метир қелинлиқта болуп, кишиләр қара туман ичидә худди юқири бесимлиқ қазан тегидә яшаватқандәк һес қилмақта" дәп билдүрмәктә.

Хәлқ қурултийиниң вәкили болуп сайланған ли җи "гәрчә 2000 ‏- йилидин буян шәһәрлик һөкүмәт ' көк асман иншаати' пилани бойичә, 490 милйон йүән мәбләғ селип, 3000 дин артуқ көмүрни йеқилғу қилидиған пар қазанлирини йоқатқан болсиму, һазирниң өзидә бу хил көмүрни йеқилғу қилидиған пар қазинидин йәнә 5000 дин артуқи болуп, улардин чиқиватқан қара түтүн пүтүн шәһәрни қаплимақта" дәп билдүргән.

"Шинҗаң гезити" мухбириниң мәлум қилишичә, һазир үрүмчидә чоң ‏- кичик һәрхил исситиш үскүнилириниң көп сандикиси көмүргә тайинидикән һәтта җу җявән қатарлиқ җайлардики аилиликләрниң пар қазанлириму пүтүнләй көмүрни йеқилғу қилидикән. Буниңдин башқа йәнә, енергийидин пайдилиниш үнүминиң төвәнлики вә исрапчилиқиму қиш пәслидики һаваниң булғинишиға сәвәбчи болуп қалған.

Булғиниш кишиләрни азабға дучар қилмақта

Радиомизниң зияритини қобул қилған үрүмчи шәһиридики бир зиялий аял мәзкур шәһәрдики һаваниң бу йил қиш пәслиниң йетип келиши билән күнсери еғирлишип кетиватқанлиқини, болупму йеқинқи бир ‏- икки айдин буян бу хил булғанған һава түпәйлидин кишиләр арисида б типлик ғәйри зукам характерлик нәпәс йоли кесәллики тарқилип кетиватқанлиқини сөзләп бәрди. У йәнә өзиниңму йеқинда бу хил кесәл билән дохтурханида йетип чиққанлиқини сөзләп келип, һазир үрүмчидики дохтурханиларниң һәммиси дегидәк бу хил кесәлликкә гириптар болған бимарлар билән тошуп кәткәнликини мәлум қилди.

Зияритимизни қобул қилған бу зиялий аял сөһбәт җәрянида, йәнә бир қисим кишиләрниң бу хил булғанған һавадин келип чиққан кесәлгә гириптар болуп, вақтида даваланмиғанлиқтин, һаятидин айрилип қеливатқанлиқини мәлум қилип, өзиниң бу хил әһвалдин қаттиқ әндишә қиливатқанлиқини билдүрди.

Мунасивәтлик хәвәрләрдин мәлум болушичә, үрүмчиниң һава булғиниши мушундақ еғир һаләттә болсиму, мәзкур җайда, хитайларниң чаған байриминиң йетип келишини қарши елиш үчүн, бултурқидин үч һәссә көп санда салйот базарға селинмақта икән.

Зияритимизни қобул қилған үрүмчилик зиялий аял "үрүмчиниң һаваси бундин илгири һечқачан бу дәриҗидә еғир болуп бақмиған. Йеқинқи бир ‏- икки йилдин буян, болупму бу йил үрүмчиниң һава муһити адәмни чөчүткүдәк дәриҗидә булғинишқа башлиди. Бу, хитай өлкилиридин еқип келиватқан, өз мәнпәитинила ойлап, әтраптики муһитниң булғинип кетиши билән кари болмайватқан хитай көчмәнлириниң барғансери көпәйгәнликидин болуватиду " дәп билдүрди. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.