Chet'elliklerge ürümchi xelq'araliq ayrodromining özidila biwaste wiza bérish siyasiti yolgha qoyulidiken

• Muxbirimiz méhribanning bu heqtiki toluq melumati
• Download story audio

Uyghur élidin bérilgen xewerdin melum bolushiche, 6 ‏- ayning 10 ‏- künidin bashlap, dunyadiki herqaysi döletlerdin sayahet we soda ishliri shundaqla medeniyet, pen -téxnika almashturush ishliri bilen Uyghur éligha barmaqchi bolghan chet' elliklerge ürümchi xelq'araliq ayrodromining özidila biwaste wiza bérish siyasiti yolgha qoyulidiken.

Mezkur uchurdin xewerdar bolghan amérikidiki bir qisim ziyaliy we analizchilar " biwaste wiza bérish siyasitining Uyghur élida yürgüzülishi mezkur jayning soda- iqtisadigha payda élip kélish bilen bir waqitta, Uyghur medeniyitige qiziqidighan we shundaqla Uyghurlar mesilisige yéqindin köngül bölidighan, xitayning qara tizimlikidiki bir qisim chet'el mutexessislirining Uyghur élini ziyaret qilishigha yenila tosqunluq élip kélishi mumkin " dep qarimaqta.

"Shinjanggha kelmekchi bolghan chet' elliklerge köp qolayliqlar yaritip bérish"

Shinxu'a agéntliqining Uyghur élidin bergen xewiridin melum bolushiche, xitay dölet ishliri kabinétining testiqi bilen, 2007 ‏- yili 6 ‏- ayning 10 ‏- künidin bashlap, dunyadiki herqaysi döletlerdin sayahet we soda ishliri shundaqla medeniyet almashturush pen -téxnika ishliri bilen Uyghur éligha kélidighan chet'el grajdanlirigha mezkur jayning özidila biwasite wiza bérish siyasiti yolgha qoyulidiken. Yeni ular ürümchi shehiridiki xelq'ara ayrodromning özidila qoligha wiza alalaydiken.

Uyghur élidiki, xitay jama'et xewpsizlik idarisining chet elliklerni bashqurush bölümining bashliqi wang jiping,‏ " bundaq qilish arqiliq jiddiy ish bilen shinjanggha kelmekchi bolghan chet' elliklerge köp qolayliqlar yaritip bérilidu, shundaqla téximu köpligen chet'elliklerning shinjanggha kélip sayahet we soda ishliri bilen shundaqla medeniyet we pen téxnika almashturush ishliri bilen shughullinishigha yol échip bérilidu" dep bildürgen.

2006 ‏- Yilining özidila, Uyghur éligha kelgen chet'elliklerning sani 300 mingdin ashqan

Melumatlargha qarighanda, yéqinqi yillardin buyan, xitay hökümitining gherbni échish siyasitining yolgha qoyulishi bilen, Uyghur éligha sayahet qilip kéliwatqan chet'elliklerning sanimu ilgiriki yillardikige qarighanda, téz süret bilen köpiyishke bashlighan.

Bu heqtiki istatistikiliq melumatlardin ashkarilinishiche, 2006 ‏- yilining özidila, Uyghur éligha kelgen chet'elliklerning sani 300 mingdin ashqan.

Gerche, ürümchidin bérilgen bu heqtiki xewerlerde " shinjanggha kelgen chet' elliklerge biwasite wiza bérish siyasiti Uyghur élining soda tereqqiyatigha zor paydiliq bir ish " dep tekitlen'gen bolsimu, amérikidiki Uyghur ziyaliysi, doktor qahar barat ependi" bu xil siyasetning yolgha qoyulishini ikki tereptin qarighili bolidu " dep bildürdi.( Méhriban)