Ürümchidiki kepilik öylerge chüshken parazitlar pash bolmaqta

Ürümchidiki chéqilghan we chéqilish aldida turghan jaylar

Ürümchi hökümet da'iriliri, ürümchi tewesidiki jem'iy 234 kepilik öyler rayonlirini üch yilda chéqip bolush, besh yilghiche tüzep bolushni 2010 - yili resmiy pilan'gha kirgüzgen idi, ürümchi xewer torliridin melum bolushiche, ürümchide Uyghurlar zich olturaqlashqan kepilik mehellilerni chéqish mezkur pilanliq qurulush bashlinishtin ilgirila bashlan'ghan shundaqla bu pilan yürgüzülüshning aldi - keynide we hazirgha qeder, bu xil kepilik öy we mehellilerni köchürüsh we chéqishqa mes'ul xitay kadirlarning éghir derijide parixorluq jinayetliri dawam etken. Buning pash bolghan bir qismini muxbirimiz gülchéhre teyyarlighan melumattin anglayli :

5 - Iyul weqesidin kéyin xitay da'iriliri, ürümchidiki yaqa - yurtluq Uyghurlar köprek olturaqlashqan at beyge meydani, tashbulaq qatarliq kepilik rayonlarni, muqimsiz rayonlar dep körsitip bu jaylardin köp sandiki Uyghurlarni tutqun qilghandin bashqa, mehellilerni köchürüshke, yaqa yurtluq Uyghurlarni ürümchidin qoghlashqa bashlighan idi.

- 5 Iyul weqesidin kéyin ürümchi da'irilirining alghan eng chong tedbirining biri, ürümchidiki Uyghurlar zich olturaqlashqan barliq kepilik öyler rayonlirini chéqip tüzesh pilanidur, yeni ürümchi sheherlik hökümiti 2010 - yili 26 - nomurluq höjjet chiqirip, ürümchi shehiridiki jem'iy 234 kepilik öyler rayoni we mehellilerni üch yil ichide pütünley chéqip, besh yil ichide tüzep bolushni pilan'gha kirgüzgen, bu pilan boyiche jem'iy 62ming 400a'ile köchürüp orunlashturulidighan bolup, shu yili - 4 ayda resmiy ish bashlighan idi.

Melumki uningdin burunmu bir qanche yil yamaliq, tashbulaq qatarliq Uyghurlar zichraq olturaqlashqan kepilik öyler rayonliri chéqip tüzülüwatqan idi, emma mezkur pilan kölimi we da'irisi eng zor, eng köp meblegh sélin'ghan bir tür bolup hésablinidu. Buninggha da'ir höjjette, kepilik öylerni omumyüzlük chéqip tüzesh aptonom rayonning merkizi bolghan ürümchining muhitini tüzesh, xelqning menpe'etini qoghdash we uzun muddetlik muqimliqini ishqa ashurushtiki intayin nuqtiliq we muhim pilanliqi körsitilgen.

Ürümchidin bérilidighan xewerlerge qarighanda, 2010 - yilining axirghiche bu pilan boyiche tash bulaq, at beyge meydani mehellirini öz ichige alghan 21 kepilik mehelliler asasen chéqilip köchürülüp bolghan. Buning üchün 3 milyard 610 milyon yüen meblegh sélin'ghan. Bu yilqi chéqilidighan kepilik öylerning kölimi yene bir hesse köp bolup 2011 - yilida kepilik mehellidin 50ni chéqish pilani emeliyleshtürülidiken.

Biraq xitay hökümitining “ Bext qurulushi” dep atiwalghan zor küch we meblegh ajratqan, bu kepilik öylerni chéqip tüzesh qurulush pilanidin, nurghun xitay kadirlar hoquqidin paydilinip parixorluq qilghanliqi pash boluwatqanliqi melum.

Ürümchi uchur torining xewirige qarighanda, - 14 noyabir ürümchi tengritagh we saybagh rayonluq sot mehkimiliri saybagh rayonidiki yamaliq tagh kepilik mehelle we tengritagh rayoni tash bulaq kepilik mehelliliridiki öylerni chéqip tüzesh qurulushigha mes'ul dölet kadir we memurlardin 17 kishini sotlighan bolup, ularning 2010 - yili kepilik öylerni chéqip tüzesh qurulushtin para yégen omumiy sommisi töt milyon 530 ming yüen'ge barghan.

Ürümchi saybagh rayonluq sot mehkimisi bularning jyen jyaxuy isimlik bash jinayetchini öz ichige alghan 7sige 3 yildin 7 yérim yilghiche qamaq jazasi bergen, yene 10 kishining soti dawamlashmaqta iken. Hazirghiche mezkur jinayetke chétishliq jinayetchi we jinayet gumandarlirining hemmisi xitaylar iken.

Bu parazitlar asasen kepilik öylerni köchürüsh we chéqish ishxanilirining mes'ulliri bolup, ular öy chéqish we tüzeshke mes'ul bolidighan shirketler bilen öz aldigha sodiliship aridin zor payda alghandin sirt, kepilik öylerni öz aldigha erzan bahada sétiwélip yuqiri bahada hökümetke sétip bérish jeryanida payda alghan shundaqla öyi chéqiliwatqan köchürülüsh aldida turghan öy igiliridinmu öy chéqish we yéngi öylerni teqsim qilish jeryanidimu xizmet qolayliqtin paydilinip para alghan.

Buning aldida, shinjang léniyisi torida, 9 - noyabir ürümchi sheherlik ottura sotida, ürümchidiki melum mehelle yol bashqarmisining li famililik mes'ulining, bu rayondiki kepilik öylerni chéqip tüzesh qurulushidin 380 ming yüen para yigenliki seweblik sotlan'ghanliqi xewer qilin'ghan idi. Bu yil 49 yashqa kirgen li famililik bu xitay kadir 2007 - yilidin bashlap mehelle yol bashqarmisida wezipige olturghan bolup u sotta özining heqiqeten xizmet qolayliqtin paydilinip, hökümetning kepilik öydikilerning köchüridighan erzan bahaliq öylirini hökümet bahasidinmu erzan élip qimmet sétish, kölimi kichik öylerni chong öylerge tégiship bérish arqiliq payda yégen we öy yasash qurulush matériyallirini kirgüzüsh we öy qurulush shérketlirini teklip qilishta jem'iy 380 ming yüen para yigenlikini iqrar qilghan.

Shinjang qanun torida 23 - séntebir bérilgen yene bir xewerde körsitilishiche, ürümchi saybagh rayonluq partkomining mu'awin sékrétari yamaliq tagh kepilik rayonini köchürüp tüzesh ishxanisining birinchi qol mes'uli xizmet qolayliqtin paydilinip öz nepsige chogh tartip, 2009 - yili 11 - aydin 2010 - yili 8 - aygha qeder kepilik öylerni chéqip tüzesh qurulushidin jem'iy 340 ming yüen payda alghan.

27 - Séntebir ürümchidiki melum mehelle komitéti mudiri bolghan, 35 yashliq chén famililik ayal 2007 yilidin 2009 - yilighiche kepilik mehellilerni chéqish qurulushi jeryanida 95ming yüen para yigenliki üchün ürümchi ottura sot teripidin 6 yilliq qamaq jazasi bérilgen.

Ürümchidiki kepilik mehellilerni chéqishqa mes'ul yene bir ju famililik dölet memuri bu jeryanda oxshash jinayi yol we usul bilen 150 ming yüen'ge érishken. Bu parazitlar öy chéqish jeryanida öy sétiwélish toxtami bolsimu, yer we öy xéti bolmighanlargha pul élish arqiliq hökümetning paydiliq siyasetlirige ige qilish, yéngi öylerge érishish xéti béjirip bérish, yer we öy xéti bar kishilerdin öylerni erzan élip qimmet sétish, yalghan höjjet béjirip bérish, höjjet igilirining ismini almashturush qatarliq qilmishlar arqiliq köp para yégen bolup, hazirghiche ashkarilan'ghan xewerlerge qarighanda, kepilik öyler rayonlirini chéqip tüzesh qurulushi dawamida para yégüchi we para bergüchiler yeni mezkur délolargha chétishliq kishilerning hemmisi xitay köchmenliri iken.