Türkiyide `untulghan weten sherqiy türkistan` namida yighin ötküzüldi

Süret, türkiyining afyon wilayitidiki qojatepe uniwérsitétida, 1 - ayning 9 - küni chaqirilghan, `untulghan weten sherqiy türkistan` namliq yighin zalidin bir körünüsh.

Bu yighinda uniwérsitét teripidin alahide teklip qilin'ghan d u q mu'awin bashliqi, sherqiy türkistan medeniyet we hemkarliq jem'iyiti bashliqi séyit tümtürk ependi doklat berdi. Séyit tümtürk ependi sözini bashlashtin burun Uyghurlarning tarixi, yer asti ‏ - yer üsti bayliqliri we bügünki weziyiti anglitilghan höjjetlik filim körsitildi.

Kéyin séyit tümtürk ependi nuqtiliq halda xitaylarning hazir Uyghurlargha élip bériwatqan bésim siyasiti, Uyghurlarning dunya döletliridin bolupmu türkiyidin kütken ümidliri heqqide toxtilip ötti.

RFA Photo / Erkin Tarim

 Axirida oqutquchi, oqughuchilar séyit tümtürkke bes ‏ - bes bilen so'allar sorashti.

Bu yighin qojatepe uniwérsitéti türk dunyasi istratégiye tetqiqat merkizi teripidin chaqirilghan bolup, yighin'gha oqutquchi , oqughuchilardin bolup 1000 etrapida kishi qatnashti. Chong zal liq tolghan bolup, olturidighan jay tapalmighan oqughuchilar séyit tümtürk ependining doklatini öre turup anglashti.

Yighin axirlashqandin kéyin , séyit tümtürk ependi axsham 8 yérimda afyondiki er téléwiziyiside bir yérim sa'etlik programmigha chiqip Uyghur mesilisini anglatti.

Mika'il chétin ependi riyasetchilik qilghan bu programmida, riyasetchining so'allirigha jawab bergen séyit tümtürk ependi, téléwiziye arqiliq pütün afyon xelqini Uyghur xelqighe yardem qilishqa chaqirdi we bu pa'aliyetni uyushturghan uniwérsitét rehberlirige we oqughuchilar uyushmisigha rehmet éytti. U radi'omizgha, qisqighina waqit ichide bundaq muweppeqiyetlik pa'aliyetlerni élip barghanliqi üchün özini intayin bexitlik hés qiliwatqanliqini éytti.

Yuqiridiki awaz ulinishidin, muxbirimiz erkin tarimning bu heqtiki melumatining tepsilatini anglaysiler.