Уйғур қизи әсәр сақа ханим вә униң 'чүштин реаллиққа қарап: шәрқий түркистан' намлиқ фото сүрәт көргәзмиси

Йеқинқи йиллардин бери дуняниң һәр қайси җайлирида болупму түркийидә уйғурлар һәққидә көп санда китаб җурналлар нәшир қилинғандин башқа, уйғурларни тонуштуридиған сәнәт паалийәтлириму көпәймәктә. 3 - Айниң 10 - күни әнқәрәниң дәл мәркизигә җайлашқан милли пиянго идарисиниң сәнәт мәркизидә "чүштин реаллиққа қарап: шәрқий түркистан" намлиқ фото сүрәт көргәзмиси ечилди.
Мухбиримиз әркин тарим
2009-03-11
Share
Uyg-qizi-suretchi-eser-saqa-305 Уйғур қизи әсәр сақа ханим, 3 - айниң 10 - күни әнқәрәниң дәл мәркизигә җайлашқан милли пийанго идарисиниң сәнәт мәркизидә ечилған "чүштин реаллиққа қарап: шәрқий түркистан" намлиқ фото сүрәт көргәзмисидә сөздә.
RFA Photo / Erkin Tarim

3 - Айниң 21 - күнигичә давам қилидиған бу рәсим көргәзмисигә түркийә баш министирлик алип тәптиш идариси башлиқи сабаһәттин қалйонҗуоғли вә сабиқ әдлийә министири һикмәт самитүрк, парламент әзалири, әнқәрәдики уйғурлар вә сәнәтчиләрдин болуп көп санда киши қатнашти. Бу рәсим көргәзмисини дадиси кичик яшта хитай зулмидин қечип түркийигә келип йәрлишип қалған, өмүр бойи вәтинигә қайталмиған бир уйғурниң қизи ачқан. У болсиму түркийә баш министирликидә ишләватқан әсәр сақа ханим. У бу көргәзмидә өткән йили 12 - айда үрүмчи вә қәшқәрдин тартқан рәсимлирини көргәзмә қилған.

Бу рәсимләрдә нуқтилиқ һалда уйғур дияридики тарихий йәрләр, кишиләрниң турмуши әкс әттүрүлгән болуп, фото сүрәт сәнәтчиси әсәр сақа ханим ечилиш нутқида бу фото рәсим көргәзмисини ечиштики мәқсити үстидә тохтилип мундақ деди:
Uyg-naxsha-Irfan-gurdal-305
Уйғур қизи әсәр сақа ханимниң, 3 - айниң 10 - күни әнқәрәниң дәл мәркизигә җайлашқан милли пийанго идарисиниң сәнәт мәркизидә ечилған "чүштин реаллиққа қарап: шәрқий түркистан" намлиқ фото сүрәт көргәзмисидә уйғурчә нахша орунлиған түркийә мәдәнийәт министирлики сәнәтчиси ирфан гүрдал әпәнди сүрәттә.
RFA Photo / Erkin Tarim

Бу көргәзминиң мән үчүн алаһидә әһмийити бар. Бу һессиятимни силәр билән ортақлашмақчимән. Мениң анамниң дадиси вә дадам кичик яшта шәрқий түркистанниң қәшқәр шәһридин көчүшкә мәҗбур болған икән. Әпсуски дадам вәтинигә қайталмастин аләмдин өтти. Дадам һаяттики вақтида, у, вәтинигә болған сеғинишини давамлиқ һалда мән билән ортақлишатти. Дадам баралмиған болсиму өткән йили 12 - айда вәтинимгә бериш пурситигә игә болдум. Йәни мениң чүшүм реаллиққа айланди, шуңа бу көргәзминиң исмини "руядан гәрчәгә йолҗулуқ" йәни "чүштин реаллиққа қарап сәпәр" қойдум.

Кейин түркийә мәдәнийәт министирлики сәнәтчиси ирфан гүрдал әпәнди уйғур нахшиси орунлиди.

Әсәр ханимниң 85 яшлиқ аниси пакизә түркистанли ханим микрофонимизға қизиниң фото рәсим көргәзмисини көргәндин кейинки туйғулирини аңлитип мундақ деди:

Наһайити бәхитликмән. Қизимдин бәкла пәхирлинимән. Буниңға бәк көп әмгәк сиңдүрди. Дадисиниң пүтүн хияллирини арзу арманлирини әмәлгә ашурди. Дадиси йәни мениң ерим давамлиқ һалда бизгә туғулған йери қәшқәрни аңлитатти, қизим берип көрүп, сүрәтләрни тартип кәлди, бәкла хош болдум.

Кейин микрафонимизни бу көргәзмини көрүватқан кишиләргә узаттуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.   


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт