Muhajirettiki Uyghur baliliri weten heqqide némilerni oylaydu?

Dunyadiki herqaysi ellerde olturaqlashqan Uyghur jama'etchilikining köpiyishige egiship, muhajirettiki Uyghurlar hayatida perzent terbiyisi ata-anilarni eng köp oylanduruwatqan mesililerning biri bolmaqta. Uyghurlarning weten sirtidiki ijtima'iy topluqlirigha nezer salghanda peqet orta asiya jumhuriyetliridila zor kölemdiki Uyghur ahaliliri topliship olturaqlashqan. Bashqa ellerde, bolupmu gherb elliride makanlashqan Uyghurlarning mutleq köp qismi tarqaq halette yashimaqta. Bu hal ularning öz ana tilini saqlash, milliy en'enisini dawamlashturush hemde balilirigha milliy kimlik we weten terbiyisi élip bérish jehetlerde melum qiyinchiliqlarni hés qildurmaqta.

Yéqinqi yillardin buyan, türkiye we bir qisim ereb elliride, yawropa ittipaqigha tewe herqaysi döletlerde, amérika, kanada hemde awstraliye qatarliq memliketlerde olturaqlishiwatqan Uyghurlar sanining köpiyishige egiship, balilar terbiyisi mesilisi barghanséri gewdilinip chiqmaqta. Uning üstige, muhajirettiki Uyghurlar sanining bashqa milletlerge qarighanda az bolushi, tarqaq olturaqlishishi, öz-ara uchrishish we arilishishning köp bolmasliqidek bir qatar obyéktip seweblermu bu mesilini jiddiy küntertipte qoymaqta.

Undaqta, bu mesililer heqqide muhajirettiki ata-anilar bilen birge yene Uyghur baliliri néme deydu? ularning sebiy qelbide “Uyghur wetini” ning tesewwuri qandaq eks-etmekte? ular özliri yashawatqan döletlerning asasiy medeniyet éqimida terbiye éliwatqan turuqluq, öz ana tili, milliy kimliki hemde wetini heqqide némilerni oylaydu?

Biz bu heqte ehwal igilesh üchün shwétsiyide yashawatqan Uyghur baliliri bilen söhbet élip barduq. Qedirlik anglarmen dostlar, qéni emise muhajirettiki Uyghur balilirining weten heqqidiki yürek sözlirini tingshap baqayli.
Tepsilatini yuqiridiki awaz ulinishidin anglighaysiz.