Hazirqi Uyghur mesilisi xitayning ichki ishi emes, belki xelq'ara démokratik heriketning bir qismi


2008.01.11

Shinxu'a agéntliqining 1 ‏- ayning 11 ‏- künidiki xewiridin melum bolushiche, xitay kommunist partiye merkizi komitét siyasiy byurosining da'imiy ezasi ju yungkang memliketlik bixeterlik yighinida söz qilip, xitayda bixeterlik weziyiti gerche burunqi yillargha qarighanda barghanséri muqimliqqa qarap yüzliniwatqan bolsimu, emma weziyet yenila nahayiti jiddiy, dep tekitligen. Shundaqla 2008 ‏- yilini 'yushurun xeterlerni bir terep qilish yili bolidu' dep jakarlighan.

Bu waqitta, xitay kommunist partiyisining Uyghur aptonom rayonigha belgiligen emeldari wang léchu'en buningdin burun élip bérilghan 'qattiq zerbe bérish'dégen siyasiy heriketlerdiki 'üch xil küchlerge teshebbuskarliq bilen hujum qilish, bash kötersila urush, awal qol sélish' dégen wehshi shu'arni qaytidin towlap, Uyghurlargha qaratqan yene bir qétimliq basturush herikitini qozghashqa bashlighan idi.

Dunya Uyghur qurultéyining bayanatchisi dilshat rishitning mulahize qilishiche, xitay kommunist partiyisi hazir dölet ichide we xelq'arada jiddiy mesilige duch kélip qattiq bi'aram boluwatidu.

Dilshat rishitning mulahize qilishiche, wang léchüenning yéqinda Uyghurlargha qarita bashlighan yene bir qétimliq basturush herikiti kommunist partiye merkizi komitétining Uyghur mesilisige biwaste arilishiwatqanliqidin boluwatidu.

Dilshat rishitning mulahize qilishiche, hazirqi Uyghur mesilisi hergizmu xitayning ichki mesilisi emes, hazirqi Uyghur mesilisi pütün dunya miqyasidiki démokratik heriketning bir qismigha aylinip boldi. Buningdin wang léchu'en téximu bek bi'aram boluwatidu. Wang léchüenning özide ishenche qalmidi, shunglashqa u bu qétim yene Uyghurlardin paydilinip Uyghurlarni basturudighan kona siyasiy wastini kötürüp chiqti.

Dilshat rishitning mulahize qilishiche, xitayning hazir Uyghurlargha qaratqan basturush herikiti Uyghur xelqighe éghir aqiwetlerni keltürüp chiqirishi mumkin. Emma xelq'ara buni yéqindin közitip kéliwatidu we xitayni tosush üchün tedbir qolliniwatidu. Uzun yillardin buyan xitayning zulmigha berdashliq bérip taqabil turup kéliwatqan Uyghur xelqi yenila küreshlirini dawamlashturup eng axirida utup chiqidu. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.