Uyghur élide" eydiz " sarasimi


2007-10-26
Share

Her qandaq bir kishining özining eydiz yuqumdarigha aylan'ghanliqini bilgendin kéyin xuddi ezra'ilning ölüm xétini tapshuruwalghandek qorqunch hem sarasimige chüshüshi muqerrer. Egerde u ana bolush yaki ata bolush aldidiki insan bolsichu? u halda uningdiki endishe hem azabliq murekkep héssyatni tesewwur qilmaq tes.

Yéqinda ürümchide ana bolush aldida turghan éghir ayagh bir Uyghur ayal lyu dawan doxturxanisi teripidin eydiz késili wirusi bilen yuqumlan'ghanliqi heqqide xata di'agnoz qoyulup , balisini téxi dunyagha köz achmay turupla chüshürüsh opératsiyisi qildurushqa mejbur bolghan hem mushu sewebtin jismaniy rohiy jehetlerdin éghir azab we bextsizlikke muptila bolghan.

Eydizning Uyghurlargha élip kéliwatqan köp tereplime ziyankeshlikliridin bashqa mushuninggha oxshash xata di'agnoz , xata dawalashlar yene qanchilighan kishilerning nabut bolushigha , qanchilighan balilarning tughulmay ölüshige seweb boluwatqandu? eydiz di'agnozigha yüzde ‏- yüz ishinish kérekmu ? egerde özingizning eydizliqingizdin der gumanda bolsingiz némilerni qilishingiz kérek ? bulargha muxbirimiz gülchéhre teyyarlighan programmidin jawab izdeyli.

Kéchikip bésilghan qedem....

Ürümchi lyudawan doxturxanisining 33 yashliq bir Uyghur hamildar ayalgha qoyulghan eydiz wirusi bilen yuqumlan'ghanliqi heqqidiki xata di'agnozining , bu hamildar ayalning qorsiqidiki besh ayliq balining mejburiy chüshürüsh opératsiyisi qilinishigha we shu seweblik bu ayalning jismaniy hem rohiy jehetlerdin éghir azablargha duchar bolushigha seweb bolghanliqi we kéyin ziyankeshlikke uchrighuchining bashqa doxturxanida qayta tekshürüsh arqiliq özining H I V bilen yuqumlanmighanliqini ispatlighandin kéyin , mezkur doxturxana xata di'agnozi tüpeyli bu ayal hem uning a'ilisige élip kelgen éghir aqiwetliri üchün ziyankeshlikke uchrighuchigha 74 ming 880 yüen tölem töligenliki heqqidiki xewer nöwette Uyghur élining asasliq xewer torliridin bashqa xitayning bezi muhim axbarat torlirighimu chiqirildi.

25- Öktebir küni bu heqtiki xewer heqqide yenimu tepsiliy melumat élish üchün ürümchi lyu dawan doxturxanisigha téléfon qilghinimizda , tughut bölümining bir séstrasi eydiz wirusi bilen yuqumlan'ghanliqi heqqide xata di'agnoz quyulup, mezkur doxturxanining tughut bölümide ,uning balisining gheyri tughulush éhtimalliqining yuqiriliqi tüpeylidin yigirme heptidin ashqan hamilisi éliwitilgen bu yash ayalning Uyghur ikenlikini bildürgen idi .

Ismini ashkarilashni xalimighan bir séstiraning bildürüshiche, ziyan'gha uchrighuchi ayal 2006 -yili ‏10 ‏- ayda hamildar bolup a'ilisi zor xoshalliqqa chömgen . Kütülmigen yerdin u bala besh ayliq bolghanda, yeni bu yil 3- ayda lyu dawan doxturxanisida élip bérilghan qan tekshürüshte uninggha H I V wirusi bilen yuqumlan'ghanliqi heqqide di'agnoz qoyulghan hemde doxturlar uning balisining binormal tughulidighanliqini bildürüp derhal balini chüshürüsh opératsiyisi qilghan.

2007 - Yili 4 - ayda eydiz késili wirusi bilen yuqumlan'ghanliqi hemde shu seweblik balisidinmu ayrilghan, a'ile xoshalliqidin , yéqinlirining ishenchisidinmu ayrilip cheksiz jismaniy hem rohiy azabqa duchar bolghan bu bextsiz ayal, qandaqlarche özige eydiz wirusi yuqup qalghanliqidin der guman bolup , axiri gheyretke kélip shinjang méditsina uniwérsitéti birinchi doxturxanisi hemde Uyghur aptonom rayonluq xelq doxturxanisi hemde Uyghur aptonom rayonluq we ürümchi sheherlik yuqumluq késelliklerning aldini élish orunlirigha bérip qayta ‏- qayta qan ewrishkisini tekshürtken . Netijide bu doxturxana hem qan tekshürüsh orunlirining di'agnozi oxshashla uning eydiz wirusi bilen yuqumlanmighanliqini ispatlighan .

Shundila bu ayal lyu dawan doxturxanisining özige eydiz wirusi yuqturuwalghanliqi heqqide xata di'agnoz qoyghanliqini jezimleshtürgen. Emma bu jeryanda balisidin, bextidin, ténich turmushidinmu ayrilghan idi.

Belkim bu ayal mushu qedemni baldurraq basqan bolsa balisini qutquzup qalghan bolatti . Shundaqtimu bu ayal qolidiki küchlük ispatliri bilen lyu dawan doxturxanisining xata di'agnozi tüpeyli béshigha kelgen bexitsizliklerning bedilini tölitish üchün mejburiy tughut cheklesh opératsiye qilish jeryanidiki dawalash heqqi, kütünüsh , dora chiqimliri we duchar bolghan rohiy azabliri üchün -2007 - yili 5- ayda sotqa resmiy erz sunup doxturxanidin ikki yüz ming yüen tölem telep qilghan.

Lyu dawan doxturxanisi mes'uliyettin qéchip qutulalmidi

Shimigu rayonluq xelq sot mehkimiside échilghan sotta lyu dawan doxturxanisi mes'uliyetni boynigha almighan . Ular deslep bu doxturxanining qan ewrishkisi üstidin tekshürüsh élip bérish hoquqi hem eydiz di'agnozi qoyush sewiyisi yoqluqini otturigha qoyup ,mes'uliyetni mezkur doxturxanini qan ewrishkisi analiz netijisi bilen teminligen ürümchi sheherlik yuqumluq késelliklerning aldini élish merkizige atqan .

Emma bu merkez , qan ewrishkisi üstidin analizi chiqarghan bilen bimar bilen biwaste uchrashmighanliqi peqet , lyu dawan doxturxanisi yollap bergen qan ewrishkiliri üstidin tekshürüp élip barghanliqi shunga özlirining peqet qan ewrishkisi üstide élip barghan tekshürüsh netijisigila mes'ul ikenliki , bimargha mes'ul bolmaydighanliqini bildürgen. Detalash jeryanida axiri lyu dawan doxturxanisining mezkur qan tekshürüsh merkizige bimarlarning qan ewrishkisi yollighanda xata yollap yeni bashqa bir bimar bilen almashturup qoyghanliqi seweblik , ziyankeshlikke uchrighuchining balisini tughut cheklesh opératsiyisi qildurushqa mejbur bolghanliqi ispatlan'ghan.

Xata di'agnoz arqiliq ziyan'gha uchrighuchining erzi qobul bolup, axiri liyu dawan doxturxanisi qanuniy jawabkarliqtin qéchip qutulalmighan hemde mes'uliyetni üstige élishqa mejbur bolghan we ziyan'gha uchrighuchi bu Uyghur ayalgha 74 ming 880 yüen tölem töligen.

Délo téxi axirlashmidi...

Démek bu weqedin mundaq bir ibret alimiz yeni birer dawalash orni bimarlar üstidin eydiz wirusi bilen yuqumlan'ghanliqi heqqide xata di'agnoz qoyghanda qanun buyiche jawabkarliqi sürüshte qilinidu. Yuqiriqi weqede ziyankeshlikke uchrighuchi yeni eydiz késili wirusi yuqturuwalghanliqi heqqide xata di'agnoz quyulghan bu Uyghur ayalning qismetliri mushuning bilen axirilashtimu deyli, emma bu weqede yene bir gumanliq so'algha jawab tépilmidi.

Eger hamildar ayallar rasla eydiz wirusi bilen yuqumlan'ghan bolsa choqum tughut cheklesh opératsiyisi qilishi shertmu?

Amérika paytexti washin'gtondiki chong doxturxanilardin énowa doxturxanisi tughut bölümi doktori adut ependi bu so'alimizgha keskin halda mundaq jawab berdi: adette besh ayliq bolghan hamile üstidin tughut cheklesh opératsiyisi qilinmaydu, anining eydiz yuqumdari ikenlikimu balini öltürüshke seweb bolalmaydu. Chünki eger ana eydiz yuqumdari bolsa wirusning balisigha yuqush éhtimalliqi %1, %2 bolidu . Éghir bolghan %11 kiche bolidu . Biz peqet anigha muwapiq dora bilen dawalash élip barimiz hemde balining hamile tughulush hemde imish basquchlirida eydiz anisi bedinidiki eydiz wirusidin yuqumlinishining aldini élish tedbirlirini qollinimiz . Shu arqiliq balining normal tughulishigha asasen %99 kiche kapaletlik qilghili bolidu.

Egerde héchqandaq dora ishletmigen halda eydiz wirusining anidin baligha yuqush éhtimalliqi qanchilik yuqiri?

Shinjangda qandaqliqini bilmidim, pütün dunyada hazir bu xil hamildar ayallargha bérilidighan dora hem dawalash shara'iti bar, belkim u yer bek namrat bolsa kérek, biraq , héchqandaq dawalash élip barmighandimu, ana eydiz yuqumdari bolsa balining yuqumlinish éhtimalliqi%25 etrapida bolidu. Éhtimalliq chong bolghandimu , u balining hayatini axirlashturup uni alduruwétishqa küchlük seweb bolalmaydu . Uning üstige yigirme heptilik bolghan hamilini éliwétish ana üchünmu bek xeterlik, jismaniy hem rohiy jehettinmu éghir yaman tesirlerni élip kélidu. Hetta qayta hamildar bolmasliqqa élip bérishi mumkin. Amérikida her qandaq seweb bolsimu , besh ayliq bolghan hamilini chüshürüsh wastisi qollanmaymiz.

Démek , hamildar anining eydiz bilen yuqumlan'ghanliqi uning balisini chüshürüwétishke asas bolalmaydu.

Eydiz yuqumdari bolghan anidin tughulghan balining choqum eydiz bolush éhtimalliqi intayin töwen iken , u balining bu dunyagha kélishini cheklesh, yeni ana eydiz bimari bolghan teqdirdimu uning balisini chüshürüsh méditsina ilmigha tayan'ghan tedbir bolmighanda , bu bir pilanliq tughut tedbirimu ? bu némidin dérek béridu ?anining tughush hoquqini , balining tughulush hoquqini asassiz halda tughut cheklesh opératsiyisi arqiliq tartiwélish bir qatilliq xalas .

Undaqta eydiz téz sür'ette yamrawatqan Uyghur élide bu xil qatilliq qaysi orunlarda , qaysi derijide dawam qiliwatidu? bu xil paji'elerni kim keltürüp chiqarmaqta? Uyghur kishilirining eydiz heqqide sawadi töwen dégendimu , doxturlarningchu? doxturxanilarningchu? bu so'algha kéyinki programmimizda Uyghur éli hemde xitayning munasiwetlik siyaset ‏- qanunliridin jawab izdeyli. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet