Тоқсунда 518 нәпәр уйғур оқутқучи қисқартилмақчи

Турпан вилайити тоқсун наһийилик маарип идарисиниң тор бетигә өткән һәптә, оқутқучиларниң риқабәтлишип штатқа орунлишиши һәққидә мәхсус уқтуруш чиқирилди. Уқтурушта наһийидики барлиқ башланғуч вә оттура мәктәпләрдики уйғур оқутқучиларниң 8 - ноябирдин қалмай штатқа таллаш сәвийә имтиһаниға тизимлитиши керәклики йезилған.
Мухбиримиз гүлчеһрә
2010-11-10
Елхәт
Пикир
Share
Принт
2006 - Йили 13 өктәбирдә тартилған бу сүрәт, хотәндики мәлум хитай вә уйғурлар арилаш оттура мәктәптә мәлум уйғур оқутқучиниң дәрс бериватқан көрүнүши.
2006 - Йили 13 өктәбирдә тартилған бу сүрәт, хотәндики мәлум хитай вә уйғурлар арилаш оттура мәктәптә мәлум уйғур оқутқучиниң дәрс бериватқан көрүнүши.
AFP Photo

Наһийидики оқутқучилардин игилигән учурлиримиздин әмәлийәттә бу уқтурушиниң арқисиға, хитай һөкүмитиниң бу наһийидики әсли шитатлиқ икки миңға йеқин уйғур оқутқучилардин емтиһан елиш арқилиқ, уларниң 518 ини қисқартиштәк пилани йошурунғанлиқи ашкариланди.

Тоқсун наһийисигә қаратқан телефон зиярәтлиримиздин, тоқсун наһийисидә йүзлигән уйғур оқутқучилар, һөкүмәтниң штат қисқартиш пилани бойичә оқутуш сепидин мәңгүлүк айрилиш алдида туруватқанлиқи, оқутқучиларда бу һәқтә наразилиқ инкасиниң интайин күчлүк икәнлики, әмма даириләрниң сиясий бесиминиң күчлүклүки сәвәбидин ашкара наразилиқ билдүрүшкә амалсиз қеливатқанлиқи ашкариланди.

Наһийидики бир қисим оқутқучилардин игилигән учурлиримизға қариғанда, тоқсун наһийилик һөкүмәт тор бети һәмдә маарип тор бетидә 25 - өктәбир, мәзкур наһийә бойичә барлиқ оқутқучиларни кәспий сәвийә синаш имтиһаниға орунлаштурилидиғанлиқи һәққидә уқтуруш чиқирилған. Уқтуруш чиқириштин бир күн илгири наһийә кадирлири,барлиқ башланғуч, оттура мәктәп мәсуллирини йиғинға чақирған. Йиғинда тоқсун наһийилик маарип идарисиниң башлиқи шарапәт турсун емтиһан орунлаштурушниң әсли мәқситини уқтурған йәни, "тоқсун наһийиси маарип сепидә риқабәтлишип штатқа орунлишишини әмәлийләштүрүш пилани" намидики ички һөҗҗәтниң роһини йәткүзгән. Хитай һөкүмитиниң бу "штат қисқартиш қизил һөҗҗити" дә көрситилгән бойичә, 518 нәпәр уйғур оқутқучини штаттин айриш пиланини әмәлийләштүрүштә чоқум идийини азад қилип, пиланниң вақтида нәтиҗилик әмәлгә ешишиға капаләтлик қилиш, йәнә бир тәрәптин мәктәпләрниң нормал оқутушини капаләтлик қилиш тәлипини қойған.

Арқидин һәр қайси мәктәпләрдә оқутқучиларға йиғин ечилип риқабәтлишип штатқа орунлишиш тоғрисидики һөҗҗәт мәзмуни йәткүзүлгән һәмдә 8 - ноябирдин қалмай бу риқабәткә чүшүш имтиһаниға тизимлитиш шәртлики уқтурулған. Хитай даирилириниң бу имтиһандин кейин 500 дин көпрәк уйғур оқутқучиларниң қисқартилидиғанлиқи ашкариланғандин кейин, бу мәсилә наһийидики маарип системисида болупму уйғур оқутқучилар арисида күчлүк наразилиқ һәм ғулғула пәйда қилған.

Бу учурларға асасән, биз тоқсун наһийисидики бир қанчә мәктәпкә телефон қилдуқ, зияритимизни қобул қилған бир қанчә оқутқучи хитай һөкүмитиниң бу штат қисқартиш пиланиға интайин нарази болсиму,авазини чиқириштин вә шу сәвәблик бу қетимқи қисқартилиш обйекти болуп қелиштин әндишә қилип авазини аңлатмаслиқимизни өтүнди. Бирақ, һәқиқәтән барлиқ уйғур оқутқучиларниң наразилиқини етирап қилди һәмдә тоқсун маарипиға кәлгүси бу бала - қазадин қандақ сақлинишниң йоллирини издәватқанлиқини билдүрди.

Арида, тоқсун уйғур миллий маарип сепидә ишләватқанлиқиға 30 йилдин ашқан бир уйғур оқутқучи, өз кәсипдашлири бундақ наһәқ вә кәскин шаллашқа учраватқан пәйттә йәнә сүкүттә туралмайдиғанлиқини билдүрүп, оқутқучиларниң нөвәттики вәзийитидин мәлумат бәрди.

Биз бу учурларға асасән тоқсун маарип идарисиға телефон қилдуқ, тоқсун маарип идарисидин телефонни алған кадир, оқутқучиларниң қисқартилишиға даир соаллиримизға җаваб бәргили болмайдиғанлиқини ейтип телефонни үзүвәтти.

Тоқсун наһийисидики башланғуч мәктәптин исмини ашкарилашни халимиған бир яш оқутқучиниң билдүрүшичә, тоқсун наһийиси уйғур елидики бир қәдәр чоң наһийиләрниң бири болуп, 2000 - йилидики истатистикиға қариғанда бу наһийидә башланғуч, оттура мәктәп вә кәспи мәктәпләрни қошқанда 50 мәктәп һәм оқутуш орунлири бар болуп, нөвәттә бу мәктәпләрниң көп қисми қош тиллиқ маарип сиясити бойичә хитай мәктәплири билән бирләштүрүветилгәндин кейин 24 мәктәпкә қисқарған. Шундақла бу җәрянда уйғур мәктәплиридә бир қанчә қетим оқутқучи қисқартиш елип берилған болсиму, бу қетим 518 нәпәр уйғур оқутқучини бирақла қисқартиши әң зор көләмдикиси болуп һесаблинидикән. Нөвәттә пүтүн наһийидики оқутқучиларда бирдәк наразилиқ күчлүк болуп, бу қетимқи шаллинишниң алдини тосуп қелиш йолида улар охшимиған йолларни издимәктә. Зияритимизни қобул қилған әмма авазини аңлитишимизни халимиған оқутқучиларниң кәйпиятидин, тоқсундики мәктәпләрниң омумйүзлүк җиддий вәзийәттә туруватқанлиқи мәлум.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт