خىتاي ھۆكۈمىتىنىڭ 'شىنجاڭ گېزىتى'نىڭ ئاشكارىلىشىچە، خىتاي ھۆكۈمىتى 4 - ئاينىڭ 17 - كۈنىدىن باشلاپ ئۇيغۇر ئاپتونوم رايونىدىكى ھەر قايسى ئالى مەكتەپلەردە، ئوقۇغۇچىلارغا سىياسىي-ئىدىيېۋىي تەربىيە بېرىدىغان بىر ئايلىق ھەرىكەت باشلىغان.
ئۇيغۇرلارغىلا قارىتىلغان بۇ سىياسىي ھەرىكەتتە "كوممۇنىست پارتىيىنى سۈيۈش، خىتاينى سۈيۈش، سوتسىئالىزىمنى سۈيۈش مۇسابىقىسى' ئېلىپ بارىدىكەن. بىر قىسىم ئۇيغۇر زىيالىيلىرى بۇنى 'خىتاي كوممۇنىست پارتىيىسىنىڭ ئۇيغۇرلارغا سېلىۋاتقان سىياسىي زۇلۇمى بارغانسېرى ئېشىۋاتىدۇ' دەپ تەھلىل قىلماقتا.
خوڭكوڭدىكى ئۇچۇر ۋاستىلىرىنىڭ بايان قىلىشىچە، كوممۇنىست خىتاي ھۆكۈمىتى ھازىر تېبەتكە قارىتا يۇمشاق قوللۇق، ئۇيغۇرلارغا بولسا قاتتق قوللۇق سىياسەت قوللانماقتا. ئۇيغۇرلارغا قارىتىلغان سىياسەتلەرنى بەگىلەش ئۈچۈن، سىياسىي بيۇرونىڭ دائىمى ئەزاسى لوگەن، مۇئاۋىن باش مىنىستىر خۇي لياڭيۈ، ئۇيغۇر ئاپتونوم رايون سېكرىتارى ۋاڭ لېچۇئەندىن ئىبارەت ئۈچ كىشىدىن تەركىپ تاپقان 'شىنجاڭ گۇرۇپپىسى' قۇرغان. (ۋەلى)