Т . Кумар : хитай һөкүмити уйғурларни бастурушта террорлуққа қарши уруштин пайдилиниватиду


2007-09-12
Share

Хитай җамаәт хәвпсизлик миниситири җу юңкаңниң, дүшәнбә күни бейҗиңда өткүзүлгән бир қетимлиқ бихәтәрлик йиғинида қилған сөзидә, террорчилиқни хитайдики әң чоң тәһдит дәп көрсәткәнлики нурғунлиған бихәтәрлик мутәхәссислирини һәйран қалдурған.

Бәзи мутәхәссисләр, хитай җамаәт хәвпсизлик министириниң, хитай һөкүмитигә өктичиләрни бастуруш болупму, уйғур мусулманлириниң миллий мустәқиллиқ һәрикәтлирини бастуруш үчүн яхши пурсәт яритип бәргән 11‏-сентәбир террорлуқ вәқәсиниң 6 йиллиқида, террорчилиқни 2008‏- йиллиқ бейҗиң олимпик тәнһәрикәт йиғини үчүн әң чоң тәһдит дәп көрсәткән сөзлирини, дуня җамаәтчиликигә хитайниңму аталмиш террорчилиқниң қурбани икәнликини қайтидин әслитишни мәқсәт қилған дәп қаримақта.

Нөвәттә,хитайда террорлуқ тәһдитиниң йоқ дийәрлик дәриҗидә аз икәнликини тәкитлигән сиингапорлуқ террорчилиқ мутәхәссиси роһан гунаратна, шәрқий шималий асияда кәң көләмлик террорлуқ һуҗумлар елип бериш иқтидариға игә бир яки иккила террорлуқ тәшкилати мәвҗут икәнликини, бу тәшкилатларниңму, бейҗиң һөкүмити тәрипидин елинған қаттиқ бихәтәрлик тәдбирлири түпәйлидин, хитайда паалийәт елип бериш имканийитиниң наһайити чәклик икәнликини билдүрмәктә.

Лекин нурғунлиған сиясий мулаһизичиләр, уйғурларниң миллий һәрикитиниң узун муддәттә хитайға тәһдит қилидиған бир һәрикәткә айлинидиғанлиқини тәкитлимәктә.

Хәлқара кишилик һоқуқ тәшкилатлири болса, хитай җамаәт хәвпсизлик министириниң хитайдики террорчилиқ тәһдити тоғрисидики сөзлирини, хитай һөкүмитиниң хәлқара террорчилиққа қарши уруштин, уйғурларни бастуруш үчүн қандақ пайдилиниватқанлиқиниң йәнә бир мисали дәп, қаримақта.

Зияритимизни қобул қилған хәлқара кәчүрүм тәшкилати асия бөлүминиң директори т. Кумар әпәнди, хитай җамаәт хәвпсизлик министириниң террорчилиқни хитайдики әң чоң тәһдит дәп көрсәткән сөзлирини рәт қилип мундақ деди: " америка вә б д т вә башқа дөләтләр террорлуққа қарши урушни нөвәттики әң муһим хәлқаралиқ мәсилә дәп қаримақта. Буни билгән хитай һөкүмити террорлуққа қарши уруштин, сиясий өктичиләрни бастуруш үчүн пайдилинишқа тиришмақта. Хитай һөкүмити тибәтләр болупму, уйғурларниң сиясий һәрикәтлирини бастурушта террорлуққа қарши уруштин пайдилиниватиду. Уйғурларниң мусулман болуши, уларниң һәрикәтлирини террорлуқ һәрикити дәп көрситиш үчүн, хитай һөкүмитигә пурсәт яритип бериватиду. Бүгүн,хитай һөкүмити, уйғурларниң һәтта кишилик һоқуқ мәсилисидики һәрқандақ наразилиқиниму террорлуқ һәрикити категорийиси ичигә елип бастурмақта вә уйғурларниң хитай һөкүмитигә яқмайдиған һәрқандақ паалийитини дуня җамаәтчиликигә террорчилиқ паалийити дәп көрситишкә тиришмақта."

Т . Кумар әпәнди хитай җамаәт хәвпсизлик минстири җу юңкаңниң хитайдики террорчилиқ тоғрисидики сөзлириниң, хитай һөкүмитиниң 2008‏- йиллиқ олимпик тәнһәрикәт йиғини һарписида, террорлуққа қарши уруштин болупму, уйғурларни бастуруш үчүн техиму көп пайдилиниш нийитиниң барлиқини көрситидиғанлиқини тәкитләп йәнә мундақ деди : " хитай һөкүмити олимпик йиғини һарписида террорлуққа қарши уруштин, болупму уйғурларни техиму көп бастуруш үчүн пайдилинишқа тиришмақта. Чүнки уйғурлар мусулман. Мундақчә қилип ейтқанда, хитай һөкүмити өз сиясий мәқсәтлирини әмәлгә ашуруш үчүн террорчилиққа қарши урушни сүйиситимал қиливатиду."

Террорчилиққа сәмимий қарши туруш билән террорчилиққа қарши уруштин өз сиясий мәқсәтлири үчүн пайдилинишниң икки айрим мәсилә икәнликини тәкитлигән хәлқара кәчүрүм тәшкилати асия бөлүминиң директори т.Кумар әпәнди, хитай һөкүмити иккинчи йолни талливалған болуп, бу йолдики һәрикәтлирини өзлүксиз давамлаштуруватиду, деди. (Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт