T . Kumar : xitay hökümiti Uyghurlarni basturushta térrorluqqa qarshi urushtin paydiliniwatidu


2007-09-12
Share

Xitay jama'et xewpsizlik minisitiri ju yungkangning, düshenbe küni béyjingda ötküzülgen bir qétimliq bixeterlik yighinida qilghan sözide, térrorchiliqni xitaydiki eng chong tehdit dep körsetkenliki nurghunlighan bixeterlik mutexessislirini heyran qaldurghan.

Bezi mutexessisler, xitay jama'et xewpsizlik ministirining, xitay hökümitige öktichilerni basturush bolupmu, Uyghur musulmanlirining milliy musteqilliq heriketlirini basturush üchün yaxshi purset yaritip bergen 11‏-séntebir térrorluq weqesining 6 yilliqida, térrorchiliqni 2008‏- yilliq béyjing olimpik tenheriket yighini üchün eng chong tehdit dep körsetken sözlirini, dunya jama'etchilikige xitayningmu atalmish térrorchiliqning qurbani ikenlikini qaytidin eslitishni meqset qilghan dep qarimaqta.

Nöwette,xitayda térrorluq tehditining yoq diyerlik derijide az ikenlikini tekitligen si'in'gaporluq térrorchiliq mutexessisi rohan gunaratna, sherqiy shimaliy asiyada keng kölemlik térrorluq hujumlar élip bérish iqtidarigha ige bir yaki ikkila térrorluq teshkilati mewjut ikenlikini, bu teshkilatlarningmu, béyjing hökümiti teripidin élin'ghan qattiq bixeterlik tedbirliri tüpeylidin, xitayda pa'aliyet élip bérish imkaniyitining nahayiti cheklik ikenlikini bildürmekte.

Lékin nurghunlighan siyasiy mulahizichiler, Uyghurlarning milliy herikitining uzun muddette xitaygha tehdit qilidighan bir heriketke aylinidighanliqini tekitlimekte.

Xelq'ara kishilik hoquq teshkilatliri bolsa, xitay jama'et xewpsizlik ministirining xitaydiki térrorchiliq tehditi toghrisidiki sözlirini, xitay hökümitining xelq'ara térrorchiliqqa qarshi urushtin, Uyghurlarni basturush üchün qandaq paydiliniwatqanliqining yene bir misali dep, qarimaqta.

Ziyaritimizni qobul qilghan xelq'ara kechürüm teshkilati asiya bölümining diréktori t. Kumar ependi, xitay jama'et xewpsizlik ministirining térrorchiliqni xitaydiki eng chong tehdit dep körsetken sözlirini ret qilip mundaq dédi: " amérika we b d t we bashqa döletler térrorluqqa qarshi urushni nöwettiki eng muhim xelq'araliq mesile dep qarimaqta. Buni bilgen xitay hökümiti térrorluqqa qarshi urushtin, siyasiy öktichilerni basturush üchün paydilinishqa tirishmaqta. Xitay hökümiti tibetler bolupmu, Uyghurlarning siyasiy heriketlirini basturushta térrorluqqa qarshi urushtin paydiliniwatidu. Uyghurlarning musulman bolushi, ularning heriketlirini térrorluq herikiti dep körsitish üchün, xitay hökümitige purset yaritip bériwatidu. Bügün,xitay hökümiti, Uyghurlarning hetta kishilik hoquq mesilisidiki herqandaq naraziliqinimu térrorluq herikiti katégoriyisi ichige élip basturmaqta we Uyghurlarning xitay hökümitige yaqmaydighan herqandaq pa'aliyitini dunya jama'etchilikige térrorchiliq pa'aliyiti dep körsitishke tirishmaqta."

T . Kumar ependi xitay jama'et xewpsizlik minstiri ju yungkangning xitaydiki térrorchiliq toghrisidiki sözlirining, xitay hökümitining 2008‏- yilliq olimpik tenheriket yighini harpisida, térrorluqqa qarshi urushtin bolupmu, Uyghurlarni basturush üchün téximu köp paydilinish niyitining barliqini körsitidighanliqini tekitlep yene mundaq dédi : " xitay hökümiti olimpik yighini harpisida térrorluqqa qarshi urushtin, bolupmu Uyghurlarni téximu köp basturush üchün paydilinishqa tirishmaqta. Chünki Uyghurlar musulman. Mundaqche qilip éytqanda, xitay hökümiti öz siyasiy meqsetlirini emelge ashurush üchün térrorchiliqqa qarshi urushni süy'isitimal qiliwatidu."

Térrorchiliqqa semimiy qarshi turush bilen térrorchiliqqa qarshi urushtin öz siyasiy meqsetliri üchün paydilinishning ikki ayrim mesile ikenlikini tekitligen xelq'ara kechürüm teshkilati asiya bölümining diréktori t.Kumar ependi, xitay hökümiti ikkinchi yolni talliwalghan bolup, bu yoldiki heriketlirini özlüksiz dawamlashturuwatidu, dédi. (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet