Д у қ германийидә тибәтликләр билән биргә намайиш өткүзди


2007.03.14

3 – Айниң 10 – күни германийиниң мюнхен шәһридә тибәтни һимайә қилиш тәшкилатиниң тәшкиллиши билән тибәтликләр, уйғурлар вә тибәт дәвасиниң һимайичилиридин тәркип тапқан йүзлигән киши кәң – көләмлик намайиш елип барди. Бу қетимқи намайишниң мәқсити тибәт инқилабиниң 48 йиллиқини хатириләп, тибәт хәлқиниң хитай мустәмликисигә қарши ирадисини намайән әйләштин ибарәт болуп, бу намайишқа қатнашқан уйғурларму уйғур миллитиниң ирадисини җакарлаш йолида бир йүрүш паалийәтләрни елип барди.

Бу қетимқи намайишқа д у қ рәһбәрлири вә германийидики бир қисим уйғурлар ай – юлтузлуқ көк байрақлири билән келип қатнашқан болуп, бәзи уйғурлар хитай һөкүмитигә қарши һәр хил шуарлар йезилған вивискиларни көтүрүшивалған иди. Намайишчилар 3-айниң 10-күни чүштин кейин саәт 5:00 дә мюнхен шәһриниң мәшһур Odeonsplatz мәйданиға топланди. Саат 5:00 дин 6:00 гичә Odeonsplatz мәйданида бу қетимқи намайиш һәққидә вә хитайдики инсан һәқлири вәзийити һәққидә мәлумат бериш вә хитайға қарши имза топлаш паалийәтлири елип барди.

Қоллирида шәрқий түркистан вә тибәт байрақлирини, хитай һөкүмитини ләнәтләйдиған һәр хил лозункиларни, шундақла йоруқлуққа болған интилишини ипадиләш мәқситидә йорутулған шамларни көтүрүшивалған намайишчилар саәт 6:00 дә Odeonsplatz мәйданидин йолға чиқип, саәт 7:00 дә шәһәр мәркизидики мәшһур Marianplatz мәйданиға йетип келишти.

Marianplatz Мәйданиға топланған нәччә йүзлигән намайишчилар "уйғурларға әркинлик", "тибәткә әркинлик", "хитайлар чиқип кәтсун", "ашисун инсан һәқлири", "ашисун мустәқиллиқ ".... Дегәндәк шуарларни товлап, әтрапни ләрзигә салди.

MarianplatzЗ мәйданида алди билән тибәт тәшкилатлириниң рәһбәрлири, хәлқара инсан һәқлири тәшкилатлириниң вәкиллири сөз қилип, тибәт вәзийити һәққидә мәлуматлар берип өтти. Қанчә йүзлигән шәһәр аһалиси намайишқа күзәткүчи болуп қатнашти. Уйғурларға вәкалитән дуня уйғур қурултийиниң муавин рәиси әсқәрҗан әпәнди сөз қилип, хитай мустәбит һөкүмитиниң шәрқий түркистанда елип бериватқан инсан һәқлири қирғинчилиқлирини қаттиқ тәнқит қилди. Тибәтликләр билән уйғурларниң тәқдирниң охшаш икәнликини, бәлки уйғур хәлқиниң тартиватқан зулумлириниң техиму көплүкини, хитай мустәбит һөкүметиниң уйғурларниң диний етиқади, өрп – адәтлири, мәдәнийәтлири вә тарихлирини еғир дәриҗидә дәпсәндә қиливатқанлиқини, уйғур миллитини йәр йүзидин милләт сүпитидә йоқ қилип ташлашқа уриниватқанлиқини, уйғур миллитиниң бу зулумларға қарши күрәшлириниң терроризим билән қарилинип, дәһшәтлик рәвиштә бастуруливатқанлиқини әмәлий мисаллири билән оттуриға қоюп өтти.

3 – Айниң 10 – күни германийидики тибәт тәшкилатлири тибәт инқилабиниң 48 йиллиқини хатириләш мунасивити билән германийә пайтәхти берлин шәһридиму кәң көләмлик намайиш уюштурған болуп, бу намайишқа тибәтликләрдин башқа, тибәт мәсилисини қоллайдиған германлар вә бир қисим уйғурларму қатнашқан.

Германийиниң мюнхен шәһридә елип берилған намайиш җәрянида, уйғур намайишчилар дуня уйғур қурултийи тәрипидин тәйярланған 500 парчидин артуқ тәшвиқат варәқчиси тарқатқан. Бәш саәттин артуқ давам қилған бу намайиш кәч саәт 10:00 да ахирлашти. Тибәтлик намайишчилар саәт 10:00ға қәдәр мәшһур мәрйәм мәйдани алдида шам йеқип олтуруп, германийә хәлқиниң күчлүк диққитини җәлип қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.