D u q bash katipi dolqun eysa yaponiye ziyariti heqqide toxtaldi

• Ixtiyari muxbirimiz ekremning bu heqtiki melumati
• Download story audio

D u q ning bash katipi, yawropa sherqiy türkistan birliki teshkilatining re'isi dolqun eysa ependi, 30 – öktebir küni bashlan'ghan bir heptilik yaponiye ziyaritini netijilik tamamlap, 5 – noyabir küni gérmaniyining miyunxén shehirige qaytip keldi. Yaponiyidiki pa'aliyetliri heqqide ziyaritimizni qobul qilghan dolqun eysa ependi, bu bir hepte jeryanida, yapuniye parlamént ezaliri, insan heqliri teshkilatlirining mes`ulliri, xitay hem sherqiy türkistan mesililiri mutexessisliri, metbu'at sahesi we soda – sana'et sahesidiki nopuzluq zatlar bilen uchriship, Uyghur mesilisi heqqide melumat bérish, shundaqla, xitayning sherqiy türkistan xelqi üstidin yürgüzüwatqan zulumlirini pash qilish pursitige érishken. Dolqun eysa ependi, ziyaritimiz dawamida yaponiyidiki Uyghurlarning orni mesilisi heqqide toxtaldi.

Dolqun eysa ependi yaponiye ziyariti jeryanida yaponiyidiki meshhur Yomiuri Shimbu we Mainichi Newspapers" " hemde "yaponiye medeniyet téléwiziye qanili" qatarliq gézit we téléwiziye qanallirigha nutuq sözlep, Uyghurlarning nöwettiki weziyitini yaponiye xelqige anglatqan.

11 – Ayning 2 – küni, yaponiye soda – sana'etchiler birleshmisi we tokyo fondining teshkillishide uyushturulghan "sherqiy türkistan heqqide doklat" yighinigha qatniship, sherqiy türkistanning qisqiche tarixi, hazirqi siyasiy, iqtisadi, medeniyet, ma'arip, din we ékologiyilik ehwalliri heqqide, shundaqla Uyghurlarning chet'eldiki siyasiy pa'aliyetliri toghruluq melumatlar bergen. Bu pa'aliyetke؛ yaponiyilik karxanichilar, sodigerler, uniwérsitétlarning proféssorliri, metbu'at xadimliri bolup köpligen kishi ishtirak qilghan. Dolqun eysa ependi 30 – öktebir küni, yaponiye parlaméntida nutuq sözligen idi.

Dolqun eysa ependi bu qétimqi ziyariti jeryanida yene, ismini ashkarilashni xalimighan yaponiyining yuqiri derijilik hökümet xadimliri we Uyghur mesilisige qiziqquchi muhim erbablar bilen ayrim uchrishishlar élip bérip, Uyghurlar mesilisi heqqide söhbetleshken. Dolqun eysa ependi, d u q ning bundin kéyin yaponiyide siyasiy pa'aliyet élip bérish mümkinchiliki bar – yoqliqi heqqide sorighan so'alimizgha jawap berdi.

D u q bash katipi dolqun eysa ependining bu qétimqi yaponiye ziyariti, chet'eldiki xitaygha qarshi pa'aliyetler bilen shughulliniwatqan Uyghurlarning tunji qétim yaponiyide Uyghurlar mesilisini anglitip, küchlük tesir qozghishi bolup hésablinidiken. (Ekrem)