Үрүмчи шәһәрлик балилар параванлиқ орни хизмәтчи хадимлири билән сөһбәт

Биз өткәнки программилиримизда үрүмчи шәһәрлик балилар параванлиқ орнида, 10 нәччә йил ишлигән 2 нәпәр хизмәтчи хадимниң, үрүмчи шәһәрлик балилар параванлиқ орнида йүз бериватқан уйғур аптоном райониниң миллий аптономийә қануниға зит келидиған бәзи мәсилиләр һәққидики инкасларни бәргән идуқ.
Мухбиримиз миһрибан
2009.05.12
Share on WhatsApp
Share on WhatsApp

Улар инкаслирида, бу йәр уйғур аптоном райони туруқлуқ, уйғур балилири ана тилида сөзлийәлмәйдиғанлиқини, һәтта бу йәргә елип келингән уйғур балилириниң фамилиси мәҗбурий һалда хитайчә фамилиләргә өзгәртилип, уларға миллити хитай дәп архип турғузулидиғанлиғини, 10% ни игиләйдиған уйғур балилириниң хитай балилири билән бир ашханида мусулманчә болмиған тамақларни йәйдиғанлиқини, уларниң ичкиридики хитайларға бала қилип беқивелишқа бериветилгәнликини баян қилған иди.

Шундин кейин биз бу җайдики хизмәтчи хадимлар һәм бәзи бөлүмләрниң мәсуллириға телефон қилиш арқилиқ бу йәрдики уйғур балилири һәққидики қисмән әһвалларни игилидуқ. Гәрчә, бу йәрдә ишлигүчи хизмәтчи хадимлар, һәм мунасивәтлик мәсул хадимлар бәзи соаллиримизни җавабсиз қалдурған болсиму, лекин биз уларниң ағзидин, балилар һәққидики бәзи учурларға игә болдуқ.

Биз бу сөһбитимизни, балилар параванлиқ орнидики кечилик нөвәтчи хадим, ишхана хизмәтчиси, мухбирларни күтүвелиш ишханиси мудири шу, архип болуми мудири җаң ханим қатарлиқлар билән елип бардуқ.

Биз үрүмчи шәһәрлик балилар параванлиқ орниға телефон қилип, у йәрдики хизмәтчи хадимлар билән, бу йәрдики уйғур балилириниң әһвали һәққидә сөһбәт елип бардуқ. Гәрчә сөһбитимиздә улар биз сориған бәзи мәсилиләргә җаваб бериштин баш тартқан, конкрет мәсилиләрдин өзини қачурған, биз игилимәкчи болған инчикә мәсилиләргә җаваб беришни рәт қилған болсиму, лекин бу йәрдики уйғур балилириниң әһвали һәққидә йәнила бәзи әһвалларни дәп бәрди.

Бизниң телефонимизни бир аял хизмәтчи алди. У бизниң әркин асия радио истансисиниң мухбири икәнликимизни билгинидин кейин, бизгә өзиниң бәзи инчикә мәсилиләргә җаваб берәлмәйдиғанлиқини, тәпсилий ишларни йәнила күтүвелиш ишханисиға телефон қилип, бу ишқа мәсул хадимдин соришимизни ейтти. Шундақ болсиму у бизгә бу йәрдә 400 дәк бала барлиқини уларниң мәҗруһ һәм зеһни аҗиз балилар икәнликини дәп бәрди.

Биз униңдин бу йәрдики уйғур балилириниң қандақ тилда сөзлишидиғанлиқини сориғинимизда, у бизгә бу орунниң хитай тили системисидики орун икәнликини, бу йәрдә уйғур балилириниңму әлвәттә хитайчә сөзлишидиғанлиқини ейтип бәрди. У мухбирниң бу йәрдики балиларниң хитайчә фамилә қоллиниш мәсилисигә, бәзи балилар елип кәлгинидә уларниң исми йоқ болғини учун уларға бу йәрдә исим қоюлғанлиқини деди. У созиниң ахирида бизниң йәнила мухбирлар зияритигә мәсул шу әпәнди билән алақилишимизни ейтип, шу әпәндиниң телефон номурини дәп бәрди.

Биз шү әпәнди һәм җаң ханимлар билән сөһбәт елип бардуқ. Балилар параванлиқ орни хизмәтчи хадимлири һәм ишхана мудирлири биз сориған мәсилиләрдин өзини қачурған, бир - биригә иттәргән болсиму, лекин уларниң авазлиридики һодуқуш вә тәмтирәш, бу йәрдә илгири радиомизға инкас қилинған, миллий кәмситиш әһваллириниң мәвҗудлуқини көрситивататти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.