Xitay, istanbulda Uyghurche anglitish bashlidi

• Muxbirimiz erkin tarimning bu heqtiki toluq melumati
• Download story audio

Türkiyening istanbul shehirini merkez qilghan marmara rayonigha tarqitish qilidighan yön FM radi'osi shinjang xelq radi'osining Uyghur tilidiki anglitishini ulap anglitishqa bashlighan.

Her küni bir sa'et bérilidighan bu anglitishta xitay xelq jumhuriyitidin xewerler, junggodiki az sanliq milletler tonushturulghan programmilar we Uyghur muqamliridin ariyeler bérilidighan bolup, bu ehwal Uyghurlarni heyran qaldurdi. Ular bu heqte mulahize qilip xitaylarning türkiyede Uyghur tilida bundaq bir anglitish bérishining erkin asiya radi'osining türkiyediki tesirini azaytishni meqset qilghanliqini diyishti.

Uyghurlarning déyishiche, bu radi'o xitay döliti bilen munasiwiti tolimu yaxshi bolghan türkiye ishchi partiyisini yaqilaydighan bir radi'o iken. Buning bilen biz bu anglitish heqqide tepsili melumat élish üchün yön FM radi'osining mes'ullirigha téléfon qilghinimizda ular bu anglitish heqqide bizge melumat bérishtin özini tartti.

Biz ulargha türkiyede bundaq bir uyghuche anglitish bérishining sewebini sorighinimzda u buning normal bir ehwal ikenlikini, amérika awazi, BBC ge oxshash radi'olarningmu türkiyede anglitish béridighanliqini éytipla sözini ayaqlashturdi. U bizdin erkin asiya radi'osining qaysi tillarda, qeyerdin anglitish béridighanliqini sorighandin kéyin mundaq jawap berdi: " men munasiwetlik kishilerge sizning su'alliringizni yetküzey, ular jawap bersun." Bu kishi mushundaq depla téléfonni qoyuwetti.

Biz kéyin istanbulda bu radi'oni anglighan Uyghurlar bilen téléfon ziyariti élip barduq.

Yuqiridiki ulinishtin, muxbirimiz erkin tarimning bu heqtiki tepsili melumatini anglighaysiz.