Xitay muqimliq mutexessisi Uyghur élide

2008-01-28
Élxet
Pikir
Share
Print

Xitay kommunistik partiyisi merkizi komitétining siyasiy byuro da'imiy komitét ezasi ju yüngkang bu yil 24 ‏- yanwardin 27 ‏- yanwargha qeder, Uyghur élide tekshürüp tetqiq qilish pa'aliyiti élip barghan. Ju yüngkang, siyasiy byuroning siyasiy-qanun komitétining bashliqi, u yene, 2002 ‏-yilidin 2007 ‏- yiligha qeder, xitay jama'et xewpsizlik ministiri bolup wezipe ötigen؛ u, xitayda muqimliq xizmitide mutexessis dep qariliwatqan bir shexs. Shunga uning bu qétimqi Uyghur élide élip barghan tekshürüp tetqiq qilish pa'aliyiti közetküchilerning diqqitini tartmaqta.

"Uyghur rayonining muqimliqi üchün, iqtisadiy tereqqiyatni ilgiri sürüsh kérek"

Ju yüngkang tekshürüsh netijisidin kéyin qilghan sözide, shinjangning tereqqiyati we muqimliqi junggoning tereqqiyati we muqimliqigha alaqidar istratégiyilik ehmiyetke ige chong mesile dep tekitligen. U yene, Uyghur rayonida muqimliqni ebediyleshtürüsh üchün, iqtisadiy tereqqiyatni ilgiri sürüsh kérekliki pikrini ilgiri sürgen. Sözining xulasisida, dölet ichi-sirtidiki 3 xil küchlerge qattiq zerbe bérishni izchil ching tutushni tekitligen. Juning sözidiki yuqiriqi 3 nuqtidin yéngi bolghini, iqtisadni tereqqiy qildurush arqiliq, muqimliqqa képillik qilish pikri bolup, bu, Uyghur rayonida aldinqi hepte ötküzülgen 11 ‏- nöwetlik xelq qurultiyidimu otturigha qoyulghan. Mezkur qurultayda turpan wekili bashqa 11 kishi bilen birlikte teklip sunup, Uyghur rayonida, yéza-bazar ahalisining iqtisadiy kirimini östürüshni rayonda muqimliqni saqlashning ünümlük charisi dep otturigha qoyghan.

Közetküchilerning qarishiche, Uyghur milliy herikitining weten ichide üzlüksiz dawamlishishi, xelq'ara jama'et pikride Uyghur mesilisining yéqinqi yillardin béri izchil küntertip igilishi we xitayning olimpik sewebidin, dunya jama'et pikrining diqqet merkizige aylinishi, xitay merkizi hökümitini, Uyghur mesilisini hel qilishning charisi üstide qayta izdinishke mejbur qilghan. Uyghur rayonida ötküzülgen 11 ‏- nöwetlik xelq qurultiyida, Uyghur wekillirining sanini yillardikige nisbeten alahide köpeytishi, mana bu izdinishning bir bishariti. Emma yene bezi mulahizichilerning qarishiche, ju yüngkangning iqtisadni tereqqiy qildurush arqiliq muqimliqni ebediyleshtürüsh pikri yéngi pikir emes, bu peqet, xu jintaw 17 ‏- qurultayda otturigha qoyghan iqtisadiy tereqqiyatni hem téz hem yaxshi rawajlandurush dégen chaqiriqning tekrarlinishi.

" Yéngi chaqiriq xitay hakimiyitining milliy siyaset en'enisidur "

Uyghur pa'aliyetchilirining bildürüshiche, her bir dewr almashqanda, hakimiyet béshidiki siyasiy guruhlar almashqanda, Uyghur mesilisini hel qilishning yéngi chaqiriqlirini otturigha qoyush xitay hakimiyitining milliy siyaset en'enisidur؛ bu chaqiriqlar, peqet mesilining asasiy qismini hel qilishqa yüzlen'gen emes. Mesilen, Uyghur we xitaydin ibaret ikki milletning hakimiyet qatlimida, soda-sana'et saheside igiligen nisbitidiki tengsizlik héchqachan hel qilinidighan mesililer qatarida tilgha élinip baqqan emes.

Ju yüngkangning iqtisadni tereqqiy qildurup muqimliqni ebediyleshtürüsh teshebbusini Uyghur pa'aliyetchiliri Uyghur mesilisini hel qilish üchün tirishqanliq emes, mesilini yépish we yoshurush üchün körsitilgen tirishchanliq dep qarashmaqta.

Shiwitsariyide yashawatqan Uyghur pa'aliyetchi jalalidin ependimu bu heqte qarashlirini otturigha qoydi.

Shinxu'a agéntliqining xewer tori ju yüngkangning sözini xitayche we én'gilizche sanlirida ikki xil xewer qilghan. Xitayche sanida, her millet xelqining turmushini yaxshilash dégen söz, én'gilizche sanida, iqtisadiy tereqqiyatta millet ayrimchiliqi qilmasliq dep bérilgen. Xitayche sanida alahide tilgha élin'ghan 3 xil küchlerge qattiq zerbe bérish teshebbusi, én'gilizche sanida chiqiriwétilgen. Mana bu ehwal jalalidin ependining yuqiriqi qarashlirining toghriliqini ispatlimaqta. (Shöhret hoshur)

Pikirler (0)
Share
Toluq bet