Ваң лечүән вә нур бәкри сиясий муқимлиқни қоғдашни тәләп қилди

• Мухбиримиз үмидварниң бу һәқтики толуқ мәлумати
• Download story audio

Уйғур аптоном райониниң мувәппәқ рәиси нур бәкри. Photo Source:http://www.xinjiang.gov.cn

8- январ күни үрүмчидә уйғур аптоном райони сиясий қанун хизмәт йиғини ечилған болуп, хитай компартийиси мәркизий комитети сиясий бюро әзаси, аптоном район партком секритари ваң лечүән мәзкур йиғинида сөз қилип, сиясий қанун саһәсиниң 2008- йили қилидиған хизмәтлири вә муһим вәзипилири һәққидә тохтилиш билән биргә, мәзкур бу йилда уйғур аптоном райониниң сиясий муқимлиқ вәзийитини техиму қоғдашниң зөрүрликини тәкитлиди.

Хитай һөкүмитиниң мәхсус учур агентлиқи һесаблинидиған шинхуаниң бу һәқтә тарқатқан учуриға асасланғанда, ваң лечүән сиясий қанун саһәсиниң хизмәтлиригә баһа берип, " өткүр вә мурәккәп миллий бөлгүнчиликкә қарши күрәш вәзийитидә, районимиздики һәр қайси сиясий қанун тармақлири" муқимлиқ һәммини бесип чүшиду" дегән башламчи идийидә тәврәнмәй чиң туруп, муқимлиқ хизмитини қәтий һалда дөләт бихәтәрликиниң капалитини тәмин етиш, иҗтимаий -иқтисадни раваҗландуруш, һәр милләт аммисиниң түп мәнпәәти қоғдаштики чоң иш сүпитидә тутуп, "тәшәббускарлиқ билән һуҗумға өтүш, баш көтәргән һаман зәрбә бериш, авал қол селиш" истратегийисидә чиң туруп, алдини елишни чиңитип, чегра ичи -сиртидики "уч хил күч" ләр һәм һәр хил дүшмән күчләрниң бөлгүнчилик һәрикәтлиригә қаттиқ зәрбә берип, дүшмәнгә қарши күрәштики тәшәббускарлиқни игилип, шинҗаңниң иҗтимаий -сиясий омумийлиқиниң муқимлиқини үнүмлүк қоғдиши керәк " дегән.

Ваң лечүәнниң бу сөзини тәһлил қилған америка уйғурлири бирләшмисиниң баш катипи алим сейит әпәнди " һәқиқәтән 2007- йилиниң ваң лечүән уйғурларниң сиясий вә кишилик һоқуқлирини техиму дәпсәндә қилған бир йил болди " дәп көрситиш билән биргә 2007- йили уйғурларниң наразилиқлири вә хәлқара җәмийәтниң уйғурларниң дуч келиватқан мәзкур мәсилилиригә техиму йеқиндин көңүл бөлгән бир йил болғанлиқини тәкитлиди.

Техи йеқиндила сабиқ аптоном район рәиси исмаил тиливалдиниң орниға мувәппәқ рәис болған нур бәкриму бу йиғинда сөз қилип, " сиясий қанун органлири һәр хил душмән күчләрниң бузғунчилиқидин қаттиқ мудапиә көрүши вә қаттиқ зәрбә бериши лазим, диний ишларни қанун бойичә башқурушни күчәйтип, нормал диний паалийәт тәртипини қоғдап, идеологийә саһәсидики бөлгүнчиликкә қарши күрәшни күчәйтип, һәр хил сиңип кирип, бузғунчилиқ қилиш һәрикәтлиридин қәтий мудапиә көрүшимиз лазим" дәп тәкитлигән.

Нур бәкриниң идеологийә саһәсидики бөлгүнчиликкә қарши күрәшни күчәйтиш идийисини йеңидин рәис болупла қайтидин тәкитлигәнликигә нисбәтән техи йеқинда уйғур елидин голландийигә келип маканлашқан сабит әпәнди өз баһасини оттуриға қоюп, нур бәкриниң бу сиясити түпәйлидин уйғур тили, уйғур маарип вә мәдәнийәт һоқуқлириниң еғир дәхли-тәрүзгә учраватқанлиқини билдүрди.

Ваң лечүән сиясий қанун хизмәт йиғинида йәнә уйғур аптоном районидики муқимлиқ вәзийитиниң йәнила наһайити еғирлиқи, муқимлиқини қоғдаш вәзиписиниң йәнила наһайити муһим икәнликини мундақ еғир вә мурәккәп вәзийәттә һәр қайси партийә һөкүмәт кадирлириниң чоқум сиясәтни, вәзийәтниң чоң яхшилиқини тәкитләштә чиң туруп, муқимлиқини қоғдаштин ибарәт сиясий вәзипини һәқиқий зиммисигә елиши лазимлиқини тәләп қилған. (Үмидвар)