Wang léchü'en we nur bekri siyasiy muqimliqni qoghdashni telep qildi

• Muxbirimiz ümidwarning bu heqtiki toluq melumati
• Download story audio

Uyghur aptonom rayonining muweppeq re'isi nur bekri. Photo Source:http://www.xinjiang.gov.cn

8- Yanwar küni ürümchide Uyghur aptonom rayoni siyasiy qanun xizmet yighini échilghan bolup, xitay kompartiyisi merkiziy komitéti siyasiy byuro ezasi, aptonom rayon partkom sékritari wang léchüen mezkur yighinida söz qilip, siyasiy qanun sahesining 2008- yili qilidighan xizmetliri we muhim wezipiliri heqqide toxtilish bilen birge, mezkur bu yilda Uyghur aptonom rayonining siyasiy muqimliq weziyitini téximu qoghdashning zörürlikini tekitlidi.

Xitay hökümitining mexsus uchur agéntliqi hésablinidighan shinxu'aning bu heqte tarqatqan uchurigha asaslan'ghanda, wang léchü'en siyasiy qanun sahesining xizmetlirige baha bérip, " ötkür we murekkep milliy bölgünchilikke qarshi küresh weziyitide, rayonimizdiki her qaysi siyasiy qanun tarmaqliri" muqimliq hemmini bésip chüshidu" dégen bashlamchi idiyide tewrenmey ching turup, muqimliq xizmitini qet'iy halda dölet bixeterlikining kapalitini temin étish, ijtima'iy -iqtisadni rawajlandurush, her millet ammisining tüp menpe'eti qoghdashtiki chong ish süpitide tutup, "teshebbuskarliq bilen hujumgha ötüsh, bash kötergen haman zerbe bérish, awal qol sélish" istratégiyiside ching turup, aldini élishni chingitip, chégra ichi -sirtidiki "uch xil küch" ler hem her xil düshmen küchlerning bölgünchilik heriketlirige qattiq zerbe bérip, düshmen'ge qarshi küreshtiki teshebbuskarliqni igilip, shinjangning ijtima'iy -siyasiy omumiyliqining muqimliqini ünümlük qoghdishi kérek " dégen.

Wang léchü'enning bu sözini tehlil qilghan amérika Uyghurliri birleshmisining bash katipi alim séyit ependi " heqiqeten 2007- yilining wang léchü'en Uyghurlarning siyasiy we kishilik hoquqlirini téximu depsende qilghan bir yil boldi " dep körsitish bilen birge 2007- yili Uyghurlarning naraziliqliri we xelq'ara jem'iyetning Uyghurlarning duch kéliwatqan mezkur mesililirige téximu yéqindin köngül bölgen bir yil bolghanliqini tekitlidi.

Téxi yéqindila sabiq aptonom rayon re'isi isma'il tiliwaldining ornigha muweppeq re'is bolghan nur bekrimu bu yighinda söz qilip, " siyasiy qanun organliri her xil dushmen küchlerning buzghunchiliqidin qattiq mudapi'e körüshi we qattiq zerbe bérishi lazim, diniy ishlarni qanun boyiche bashqurushni kücheytip, normal diniy pa'aliyet tertipini qoghdap, idé'ologiye sahesidiki bölgünchilikke qarshi küreshni kücheytip, her xil singip kirip, buzghunchiliq qilish heriketliridin qet'iy mudapi'e körüshimiz lazim" dep tekitligen.

Nur bekrining idé'ologiye sahesidiki bölgünchilikke qarshi küreshni kücheytish idiyisini yéngidin re'is bolupla qaytidin tekitligenlikige nisbeten téxi yéqinda Uyghur élidin gollandiyige kélip makanlashqan sabit ependi öz bahasini otturigha qoyup, nur bekrining bu siyasiti tüpeylidin Uyghur tili, Uyghur ma'arip we medeniyet hoquqlirining éghir dexli-terüzge uchrawatqanliqini bildürdi.

Wang léchü'en siyasiy qanun xizmet yighinida yene Uyghur aptonom rayonidiki muqimliq weziyitining yenila nahayiti éghirliqi, muqimliqini qoghdash wezipisining yenila nahayiti muhim ikenlikini mundaq éghir we murekkep weziyette her qaysi partiye hökümet kadirlirining choqum siyasetni, weziyetning chong yaxshiliqini tekitleshte ching turup, muqimliqini qoghdashtin ibaret siyasiy wezipini heqiqiy zimmisige élishi lazimliqini telep qilghan. (Ümidwar)