80 яшлиқ бир хитайниң уйғур елидики әмәлдарлар үстидин шикайити


2008.02.13

Йеқинда үрүмчи шәһиридә олтурушлуқ лю шиңюән исимлик бир хитай пуқраси, уйғур елидики йеза игилик 6 ‏-дивизийә 106 ‏-полкиниң әмәлдари җаң лою үстидин интернеттә шикайәтнамә елан қилинғандин кейин, хитай дөләт кабинити мәзкур мәсилини бир тәрәп қилиш һәққидә төвәнгә уқтуруш чүшүргән. Буниң нәтиҗисидә мәзкур дивизийидики 2 нәпәр дөләт кадири, лю шиңйүән қатарлиқ әрздарларниң аилисигә берип тәһдит салған.

Партиком секритари хәлқниң 350 миң йүән пулини йәвалған

Лю шиңйүән әслидә, қутубийға маканлашқан 106 ‏- полк арқа сәп бөлүминиң сабиқ башлиғи болуп, һазир үрүмчидә яшайду. Бу йил 80 яшқа киргән әрздар лю шиңйүән әрзини мундақ баян қилиду: "бу 1993 ‏-йили йүз бәргән әһвал. 106 ‏- Полк йол қурулуши вә көмүр кан қурулуши үчүн пул топлиған, пулни 106 ‏-полкимиздики ишчи-хизмәтчиләрниң маашидин тутқан, башлиқлардин тутулмиған. Әмма кейин малийә бөлүмидин ениқлап көргинимиздә, биздин йиғилған пул һәққидә һечқандақ һесават көрмидуқ. Җәмий йиғилған пул 350 миң йүән болсиму, бу пулниң һечқандақ орни йоқ. Әслидә көмүр канға пул бәргән чеғимизда пай қошқучи болуп бәргән, әмма пай қошқанлар бу көмүр каниниң киримидин һечқандақ бәһриман болалмидуқ."

" 80 яшлиқ бовай болмиған болса, бу чағқа қолға елинатти"

Лю шиңйүәнниң асаслиқ шикайити 106 ‏- полкиниң сабиқ башлиқи вә партком секритари, һазир 6 ‏-девизийиниң әмәлдарлиридин бири болған ло йүчең үстидә болуп, у әрз қилишни 1996 ‏-йили башлиған, әмма һазирға қәдәр нәтиҗиси чиқмиған.

Лю шиңйүән бу һәқтә мундақ дәйду: " биз зиянкәшликкә учриғучилар 130 киши, әрзимизни ейтип бармиған йәр қалмиди, полктин мәркәзгичә 10 нәччә йилдин бери әрз қилип келиватимиз, әрзимизгә қулақ салидиған киши йоқ."

Лю шиңйүән әрзни интернеткә салғандин кейин, мәркизи һөкүмәтниң диққитини тартқан, мәркәз төвәнгә мәхсус уқтуруш чүшүрүп, мәсилини бир тәрәп қилишни буйриған. Бу буйруқни иҗра қилиш үчүн, чаған һарписида әрздарларниң аилисигә барған икки нәпәр полк кадири әрздарларға тәһдит салған; улар тәһдитидә, әгәр лю шиңйүән 80 яшлиқ бовай болмиған болса, аллиқачан қолға елинип болидиғанлиқини билдүргән.

Әрздар лю шиңйүәнниң билдүрүшичә, у һазир айда 1000 йүәндин артуқ мааш алиду, давалиниш суғуртисиму бар, 4 балисидин бирси тиҗарәтчи, йәнә бирси кичик бир әмәлдар. Мундақ бир турмуш шараити нөвәттә уйғурлар арзу қилидиған хатирҗәм бир турмуш сәвийиси, әмма, лю шиңйүән бу һалидин шикайәтчи, биз униңдин уйғур хәлқиниң дәрт ‏-әһвали һәққидә билидиғанлирини ейтип беришини сориғинимизда, у мундақ деди:" мәнму бир зиянкәшликкә учриғучи, бу һәқтә көп бир нәрсә билмәймән, әмма 2004 ‏-йилидин бери һөкүмәтниң 3 хил күчләргә қарши зәрбә бериш һәрикитини давамлаштуруватқанлиқи раст."

Лю шиңюүән: "ваң лечүән 3 хил күчләргә зәрбә берип, мәркәзниң ишәнчисигә еришти"

Лю шиңйүәнниң қаришичә, ваң лечүән 3 хил күчләргә қарши зәрбә бериш һәрикити арқилиқ мәркәзниң ишәнчисигә еришкән. Шуңа бу йил хитайниң көплигән өлкә дәриҗилик рәһбәрлири алмашқан болсиму, ваң лечүән орнини сақлап қалған. Болмиса, ваң лечүән чоң бир хиянәтчи.

Илгири игилигән бир хәвиримиздә, үрүмчи шәһәрлик һөкүмәттә ишләйдиған бир хитай кадир от апитигә учриған дехуй ширкитиниң саһибини ваң лечүәнниң қудиси дәп паш қилған иди, лю шиңчүән болса оғли дәп паш қилди; униң билдүрүшичә, идарә-җәмийәтләрниң ианә нами билән дехуй ширкитигә бәргән ярдими әмәлийәттә, ваң лечуәнгә қилиниватқан совға, бу совғиниң қобул қилиниши парихорлуқтин башқа нәрсә әмәс. (Шөһрәт һошур)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.