Капитализмниң вал-март ширкити хитайда коммунистларға дуч кәлди


2006-08-24
Share

Франсийә агентлиқиниң 24 ‏- авғуст күни бейҗиңдин хәвәр қилишичә, буниңдин бурун чәтәл ширкәтлириниң хитайдики һәр қандақ бир шөбисидә хитай коммунист партийисиниң ячейкилири қурулмиған иди. Йеқинда, 12 ‏- авғуст күни америкиниң капитализм байриқини егиз көтүридиған даңлиқ парчә сетиш ширкити - вал-мартниң хитайниң шеняң шәһиридики бир шөбисидә, тунчи қетим болуп хитай коммунист партийисиниң бир ячейкиси қурулған. Хитайниң шинхуа агентлиқи 'әмди америка ширкити болған вал -мартниң хизмәтчилири коммунист партийигә әза болуп кирәләйду' дәп елан қилған. Хәвәрдә баян қилинишичә, һазир вал- март ширкитиниң хитайда 30 шәһәрдә 60 шөбиси бар, униңда 32 миң хизмәтчи ишләйду. Капитализм байриқини егиз көтүридиған бу вал-март ширкитидә хизмәтчиләрниң хитайниң дөләт қануниға риайә қилған һалда ишчилар уюшмилирини қуруш әркинликини капаләтләндүридиған адвокатлар бар. Хәвәрдә баян қилинишичә, өткән бир нәччә һәптә ичидила, вал-март ширкитиниң хитайдики 22 шөбисидә ишчилар уюшмиси қурулуп болған.

Франсийә агентлиқи 7 ‏- ай ичидә 'хитайниң хәлқ қурултийи вал -мартқа қарита һәрикәт қоллинишқа башлиди. У вал-мартни өзиниң хизмәтчилиригә коммунист партийиниң рәһбәрликидики баш ишчилар уюшмисиға қарайдиған, хизмәтчиләрни намайиш қилишқа оюштурмайдиған ишчилар уюшмиси қурғузушқа мәҗбурлимақта' дәп баян қилған иди. Шундақла йәнә, хитай коммунист партийисиниң бивастә рәһбәрликидики җуңхуа баш ишчилар уюшмисиниң башлиқи ваң җавгониң 'дөлитимиздә мустәқил ишчилар уюшмиси қурушқа рухсәт қилинмайду. Биз һазир вал -март ширкитини мустәқил ишчилар уюшмиси қурмай, җуңхуа баш ишчилар уюшмисиниң қаримиқида болидиған уюшмиларни қуруш тоғрисида агаһландуриватимз' дегән сөзини нәқил кәлтүргән иди.

Ройтрс агентлиқиниң 24 ‏- авғуст күни бейҗиңдин хәвәр қилишичә, хитай коммунист партийиси америкиниң вал -март ширкитиниң хитайдики бир шөбисидә тунчи қетим өзиниң бир ячекисини қуруп чиқти. Шуниңдин башлап дуня буйичә әң чоң парчә сетиш ширкити дәп һесаблинидиған вал-март ширкити дуня бойичә әң чоң партийә дәп һесаблинидиған хитай коммунист партийисигә хоҗайинлиқ қилидиған болди. Вал-март ширкитиниң һазир хитайниң 30 шәһиридә 60 орунда талла базири бар. Вал-март 2006 ‏- йили ичидә йәнә 20 орунда талла базар қуриду.

'Америка авази'ниң хәвәр қилишичә, дуня бойичә әң чоң капиталистик ширкәтләрниң бири болған вал-март ширкитиниң хитайдики шөбилири дунядики әң чоң партийә болған хитай коммунист партийисиниң ячейка қурушни қобул қилғанлиқи хәлқара учур вастилириниң диққитини қозғиди. Шинхуа агентлиқиниң баянлиридин мәлум болушичә, шеняң шәһәрлик парткомниң бир әмәлдари'коммунист партийимиз һазир капиталистик әлләрниң ширкәтлиригә тунчи қетим партийә ячейкиси қуруп чиқти. Әмди америкиниң даңлиқ вал -март ширкитиниң хизмәтчилири хитай коммунист партийисигә бивастә илтимас қилип кирәләйду' дегән. Лявниң университети игилик башқуруш институтиниң исмини ашкарилашни халимайдиған бир тәтқиқатчиси 'бу америкиниң парчә сетиш җәһәттики әң даңдар ширкити болған вал-мартниң хитай коммунист партийисигә баш әгкәнлики болуп һесаблиниду' дегән. Бейҗиң университетиниң иқтисад факолтети мудири җоң әпәнди 'капитализмниң һазирқи игилик башқуруш шәкли билән һазирқи хитай коммунист партийисиниң сиясий рәһбәрлики оттурисида чоң зиддийәт йоқ, һазир коммунист партийә сода ширкәтләрниң игилик башқурушиға мудахилә қилалмайдиған болуп қалди. Униңға мәнпәәт тәгсила болди, шуңлашқа коммунист партийә ячейкилириниң болуши вал-март үчүн әмәлий тәсир көрсәтмәйду' дегән. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт