Wang léchu'enning sözige qarita otturigha qoyulghan alte su'al


2007-08-09
Share

Xelq'arada keng tarqilidighan 'yéngi esr zhurnili'da 8 ‏- ayning 9 ‏- küni "wang léchu'en hökümranliqidiki shinjangda zadi néme weqe yüz berdi?" namliq bir maqale élan qilindi. Zhurnalning bash muherriri jang wéygo ependi mezkur maqalining aptori si maxen ependining kimliki we nede turuwatqanliqini ashkarilashni xalimidi. Emma bu maqalining, del hazirqi 'shinjang mesilisi' dégen mesilide, kommunist xitay hökümitining ichki qismida peyda bolghan jiddiy ixtilaplarning inkasi ikenlikini muqimlidi.

Wang léchu'en sözide 'amérika bashchiliqidiki gherbning düshmen küchliri' dep tilgha alghan

‏-‏-‏-'Shinjang géziti' de 8 ‏- ayning 7 ‏- küni élan qilin'ghan 'térrorchiliqqa qarshi küreshni chungqur we puxta yolgha qoyup, shinjangning muqimliqini qoghdayli' dégen maqalini oqudum, ‏-‏-‏- dep bashlaydu si maxen ependi 'yéngi esr zhurnili'da élan qilghan "wang léchu'en hökümranliqidiki shinjangda zadi néme weqe yüz berdi?" namliq maqalisini.

Uning bayan qilishiche, kommunist partiye merkizi komitét siyasiy byurosining ezasi, Uyghur aptonom rayonluq partkom sékritari wang léchu'en shinjang mesilisini xelq'araliq siyasiy köresh jehettiki yüksek noqtidin tehlil qilip "amérika bashchiliqidiki gherbning düshmen küchliri kishilik hoquq, millet, din qatarliq mesililerdin paydilinip bizge qarita 'gherbleshtürüsh' , 'parchilash' ni yolgha qoyuwatidu, ularning axirqi meqsidi bizdiki kommunist partiye rehberlikini, sotsiyalizim tüzümini aghdurush, bizning térritoriye hoquqimizni yoq qilip, her qaysi milletlerde bölünüsh, qalaymiqanchiliq we balayi-apet peyda qilishtin ibaret" dégen we kishilerni " bu köreshning uzun muddetlikini, keskin we murekkeplikini chungqur chüshinip yétish"ke chaqirghan.

Wang léchu'en sanga merkizi hökümetke wakaliten déplomatiye siyasitini belgileydighan hoquqni kim berdi?

‏-‏-‏- Wang léchu'en néme üchün shinjangdiki bölgünchilik heriketlirini 'uzun muddetlik, keskin we murekkep' dep körsitidu? ‏-‏-‏- deydu aptor si maxen ependi yéngi esr zhurnilida élan qilghan maqaliside wang léchu'enning sözlirige qarita otturigha qoyghan alte türlük su'alining birinchiside.

‏-‏-‏- Eger shinjangda merkezning 'ademni asasi orunda qoyush' dégen siyasiti ijra qilin'ghan bolsa, yerlik xelq bölgünchilik qilamti?

Ikkinchi su'al : chet'el düshmen küchliri shinjangning chégrisidin qandaq kiriptu , siler chégrini qandaq saqlighan? shinjangda bölgünchilik qiliwatqanlar qaysi döletlerdin kelgen? isler buninggha delil -pakit körsitelemsiler? üchinchi su'al: shinjangni junggoning herbiy qoshunliri saqlawatidu, siler özenglar bölgünchiler muweppeqiyet qazinalmaydu, deysiler, eger shundaq bolsa, yene néme üchün shinjangdiki yerlik xelq bölgünchilik qiliwatidu, dégenni aghzinglardin chüshürmeysiler? tötinchi su'al: shinjangda yerlik xelqni basturup bolup, keynidin ulargha bölgünchi dep qalpaq keygüzidighan ehwal mewjutmu? xizmettiki xataliqlarni yushurush üchün merkezni we pütün junggo xelqni aldaydighan mesile mewjutmu?

Beshinchi su'al: sen wang léchu'en , yerlik partkom mes'uli, emma merkizi hökümetke wakaliten, hetta merkizi hökümet bilen oxshimaydighan déplomatiye siyasetlirini belgileydighan hoquqni sanga kim bergen?

Altinchi su'al: shinjangda zadi qandaq weqe yüz berdi? wang léchu'enning yolgha qoyghini rastinla 'idiyini merkezning siyasetlirige we yerlik partkomlarning xizmet orunlashturmisigha toghrilash'tinla ibaret boldimu?

Aptor si maxen ependi yéngi esr zhurnilida élan qilghan "wang léchu'en hökümranliqidiki shinjangda zadi néme weqe yüz berdi?" dégen maqaliside otturigha qoyghan su'allarning mezmunidin qarighanda, bu su'allar ehwalni küzitiwatqan melum rehbiri organdiki bir kadirning wang léchu'enning sözige qarita otturigha qoyulghan su'allirila emes, belki wang léchu'enning sözini anglighan hemme ademning oylap körüshi üchünmu otturigha qoyghan su'allar ikenliki éniq.

Aptor maqalisidin kéyin oqurmenlerge teqdim qilghan selbiy matériyal

Aptor yéngi esr zhurnilida élan qilghan "wang léchu'en hökümranliqidiki shinjangda zadi néme weqe yüz berdi?" namliq maqalisidin kéyin, xitayning 'shinjang géziti'de élan qilin'ghan wang léchu'enning sözliri we aptonom rayonluq partkomning mu'awin sékritari nur bekrining yerlik bölgünchilerni rehimsizlik bilen pash qilish, shinjangni chet'ellerge yaxshi teshwiq qilishni telep qilghan, shundaqla özining junggoche sotsiyalizm qurush iradisini ipadiligen sözliri heqqidiki tékistlerni oqurmenlerge selbiy matériyal süpitide teqdim qilghan. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet