Amérika elchixanisidin panahliq tiligen wang lijün metbu'atlarning qiziq nuqtisigha aylandi

Wang lijün üstidin échilghan sotta, wang lijün "Asiyliq qilish", "Hoquqni suyi'istémal qilish" qatarliq jinayetler bilen eyiblen'gen bolup, birnechche kündin buyan wang lijün weqesi yene xelq'ara metbu'atlarning diqqet nuqtisigha aylandi.
Muxbirimiz méhriban
2012-09-20
Share
wang-lijun-sqchilar-bilen-305.jpg Chungching saqchi idarisining sabiq bashliqi wang lijün tarmaq saqchi orginidiki saqchilar bilen körüshüwatqan körünüsh. 2009-Yili 12-iyul, chongching.
Imaginechina

Xitayning shinxu'a agéntliqi 19-séntebir kech "Wang lijün délosining bash-axiri" namliq 6000 xetlik maqale élan qildi. Undin bashqa birnechche kündin buyan xitayning xelq géziti, yer shari waqti géziti hem xitaydiki shinlang, suxo qatarliq ammiwi tor béketliridimu chungching saqchi idarisining sabiq bashliqi wang lijünning sot ehwali we wang lijünning pash qilishi bilen wezipisidin qaldurulghan chungching sheher bashliqi bo shiley we uning ayali gu keyleyning en'gliyilik sodiger xeyriwodni qestlep öltürüsh jinayiti bilen eyiblinip sotlinishigha munasiwetlik bir qatar xewerler köpeydi.

Shinxu'a agéntliqining xewiridin melum bolushiche, sichüen ölkisining chéngdu sheherlik teptish mehkimiside 17-,18- séntebir ikki kün dawamlashqan wang lijünni eyiblesh sotida, chungching shehirining sabiq mu'awin bashliqi, sheherlik j x idarisining mes'uli wang lijün asiyliq qilish, hoquqini suyi'istémal qilish, para élish qatarliq 4 xil jinayet bilen eyiblen'gen. Teptish mehkimisi eyibnamide wang lijünni "Xizmet waqtida wezipisini tashlap, chéngdudiki amérika konsulxanisigha qéchip kiriwélishi asiyliq qilish jinayiti", "Testiqsiz yaki yalghan testiqname yasap, téxnikiliq razwédka wasitilirini qanunsiz qollinishi hoquqni suyi'istémal qilish jinayiti shekillendürgen" dégen jümlilerni ishletken.

Shinxu'a agéntliqi 19-séntebir küni élan qilghan bashqa xewerliride yene, wang lijünning panahliq tiligen yazmiche matériyalini amérikining chéngdudiki konsulxanisigha tapshurghan bolsimu, emma amérika elchixanisining wang lijünning panahliq tilesh iltimasini ret qilghanliqi we uningdin kéyin yüz bergen bo shileyning wezipisidin qaldurulushi, gu keyleyning jazagha tartilishi, wang lijün üstidin échilghan sotta wang lijünning özini aqlap qilghan sözliri qatarliqlar birqeder tepsiliy bérilgen.

Bir nechche kündin buyan birleshme agéntliqi, en'gliye b b s agéntliqi, amérika awazi, fransiye agéntliqi qatarliq xelq'ara metbu'atlardimu wang lijün weqesi we xitayning yuqiri derijilik rehberlik qatlimi ichidiki ziddiyet we özgirishler heqqidiki xewerler köpeydi. Chet'el metbu'atliridiki xewerlerde, xitay weziyitini közetküchilerning qarashliri bayan qilinip, xitay metbu'atlirida wang lijün weqesi heqqidiki xewerlerning yéqindin buyan köpiyishining, xitayning yéngi bir ewlad rehberlik qatlimi hoquqni ötküzüwélish harpisida, xitayning yuqiri qatlam emeldarlar guruhi ichidiki hoquq talishish kürishi emeliyitining ashkarilinishi ikenliki ilgiri sürüldi.

B b s agéntliqining wang lijün weqesi heqqidiki xewiride, shinxu'a agéntliqining 19-séntebir élan qilghan "Wang lijün délosining bash- axiri" namliq maqalisidiki"Bultur 11-ayda en'gliyilik sodiger néyil xeywudning ölüm délosini tekshürüshke mes'ul bolghan wang lijünning, xeyrwodning chungching sheher bashliqi bo shileyning ayali gu keyley teripidin zeherlep öltürülgenlikini özining uzun yilliq bashliqi bo shileyge doklat qilghinida, bo shiley teripidin bir testek yéyishi, uni özini qoghdash üchün amérika elchixanisigha kirishke mejbur qilghan" dégen bayanlar neqil élinip,"Wang lijün weqesi xitayning yuqiri derijilik emeldarlar qatlimidiki setchiliklerni ashkarilidi" dégen bayanlar bérildi.

Fransiye agéntliqining xewiride "Xitayning hökümet metbu'ati shinxu'a agéntliqi 19-séntebir künidiki xewiride, saqchi bashliqi wang lijünning eyni chaghda chungching sheher bashliqi bo shileyning ayali gu keyleyning en'gliye puqrasi néyl xeywudni qestlep olturush jinayitini yoshurushqa mejbur qilin'ghandin kéyin, özining hayati bixeterlikidin ensirep qalghanliqi üchün, amérika elchixanisigha bash urghanliqini ashkarilidi." dégen bayanlar bérildi.

Xitayning chungching shehirining mu'awin sheher bashliqi, sheherlik saqchi idarisining bashliqi wang lijün bu yil 6-féwral küni amérikining chéngdudiki konsulxanisigha kirgen. Wang lijün amérikining munasiwetlik xadimliri bilen körüshüp, özining xeter ichide ikenlikini bildürüp, amérika elchixanisidin panahliq tiligen. Emma eyni chaghda amérika da'iriliri wang lijünning amérika konsulxanisidin öz ixtiyarliqi bilen ayrilghanliqini ilgiri sürgen. Shundin buyan bu weqe heqqide chet'el metbu'atlirida we xitaydiki ammiwi tor béketliride wang lijünning bo shiley teripidin tehditke uchrighanliqi üchün, amérika konsulxanisigha kirip yardem telep qilghanliqi heqqide xewerler bérilgen bolsimu, emma xitay hökümiti wang lijün weqesi heqqidiki xewerlerni cheklep, chet'el metbu'atliri qutratquluq xaraktéridiki xewerlerni berdi dep eyiblen'gen idi. Shuningdin kéyinla bo shiley wezipisidin qaldurulup, nezerbend qilin'ghan, bo shileyning ayali gu keyley en'gliyilik sodiger xeyriwodni öltürüsh jinayiti bilen eyiblen'gen idi.

Wang lijünning pash qilishi netijiside bo shileyning ayali gu keyley qolgha élinip, bu yil 8‏-ayda enxuyning xéféy shehiride sotlan'ghan we ikki yil kéchiktürüp ölüm jazasigha höküm qilin'ghan idi. Nöwette bo shiley partiye ichidiki barliq wezipisidin qaldurulghan bolsimu, biraq u hazirgha qeder bir terep qilinmighan. Uning qandaq bir terep qilinidighanliqi kishiler yéqindin diqqet qiliwatqan yene bir qiziq téma bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet