Xiyanetchi kommunist emeldarlar xelqning milliy örp-adetliridin paydilinip pul toplimasliqi lazim


2007.01.29

1 ‏- Ayning 8 ‏- küni xitayda chiqidighan "maliye géziti"de xitaydiki eng dölet igilikidiki shirketlerning biri bolghan "lunéng" shirkitining 70 milyard yu'en meblighi alliqachan shexsiylerning hésabigha ötüp ketkenlikidin ibaret bir chong chiriklik délosi pash qilinip, bu déloning wang léchu'en'gimu chétilidighanliqi bayan qilin'ghan idi. Shuningdin kéyin, "shinxu'a agéntliqi" qatarliq merkizi hökümetning uchur wastiliri rehbiri kadirlardiki chiriklishishni tenqit qilidighan maqalilerni élan qilishqa bashlighan idi. Emma wang léchu'en, shinjang xewer torida ashkarilinishiche, 1 ‏- ayning 25 ‏- küni, Uyghur aptonom rayonluq partkomning 2 ‏- omumiy yighinida söz qilip, kadirlargha nahayiti jiddiy teleppuz bilen "chuqum toy-tükün, ölüm-yétim murasimlirini daghdugha qilip chong ötküzidighan xahishini toxtitish kérek, bolupmu rehbiri kadirlar bundaq xataliq bilen yéqilishtin saqlinishi lazim" dep jiddiy buyruq chüshürgen. Wang léchu'en sözide hazir toy-tükün, ölüm-yétim murasimlirining barghansiri chong we dawirang sélip élip bérilishqa yüzlen'genliki we bundaq murasimlarning pul toplaydighan heriketke aylinip qalghanliqini teswirligendin kéyin, "buningdin kéyin toy-tükün, ölüm-yétim murasimlirini daghdugha qilip chong ötküzidighan yaman adet özgertilishi, addiylashturulushi kérek, uninggha qatnidishidighan adem peqet uruq-tughqan da'irisidin halqip ketmesliki, daghdugha qilinmasliqi lazim" dep tekitligen.

Wang léchu'en xiyanetchi emeldarlarning yaman aditi bilen xelqning milliy örp-adetlirini perqlendürmigen

Dunya Uyghur qurultéyining bash katibi dolqun eysa epenidining qarishiche, wang léchu'en qilghan sözide xiyanetchi kommunist emeldarlirining herxil murasimlardin paydilinip pul toplaydighan yaman aditi bilen xelq ammisining en'eniwiy milliy örp-adetlirini éniq perqlendürmigen. Uning qarishiche, xiyanetchilerning herikitini chekleshni bahane qilip, xelqning tarixtin buyan dawamliship kéliwatqan milliy örp-adetlirini chekleshke urunush qanunsizliq.

Wang léchu'enning buyruqidin kéyin xitayning alahide saqchi qisimliri kochilargha chiqip ashkara halda Uyghurlarni tosup, axturup heywe körsitishke bashlighan

Wang léchu'en "toy-tükün, ölüm-yétim murasimlirini daghdugha qilip chong ötküzidighan yaman adetni tosush lazim" dep buyruq chüshürgendin kéyin, radi'omizgha téléfon qilghan bir Uyghurning bayan qilishiche, xitay hökümitining alahide saqchi qisimliri kochilargha chiqip ashkara halda Uyghurlarni tosup, axturup jem'iyetke qarita heywe körsitishke bashlighan. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.