Wang léchu'en néme üchün özining xususiy mülkini ashkarilashni ret qilidu?


2006-03-28
Share

Xitayda partiye-hökümet organliridiki kadirlarning özlirining we a'ile -tewelirining xususiy mülkini jem'iyetke ashkarilishi heqqide mulahize élip bériliwatqili 20 yildin ashti. Merkizi intizam tekshürüsh komitéti, dölet kabinti ishxanisi qatarliqlarmu bu heqte 5-6 qétim uqturush chüshürüp boldi. Bezi jaylarda hetta bu jehette mexsus sinaq élip bérildi. Emma bu xizmetni yolgha qoyush mumkin bolmidi.

Hökümetning buyruqini ret qilghan hökümet bashliqliri

'Xitay uchur merkizi' xewer qilishiche, xitay kommunistik partiye merkizi komitétining intizam tekshürüsh komitéti 3 ‏- ayning 15 ‏-küni yene bir qétim uqturush chüshürüp, partiye -hökümet organliridiki rehbiriy kadirlarning özining we a'ile tewelirining xususiy mülkini 3 ‏-ayning 28‏- künidin burun tamamen jem'iyetke ashkarilishini telep qilghan. Bu qétim chüshürülgen uqturushta hemme rehbiriy kadirning bu uqturushni qobul qilidighan yaki qilmaydighanliqini öz qoli bilen imza qoyup yézip tapshurushi telep qilin'ghan. Netijide 25 neper siyasiy byuro ezasidin 11 kishi imza qoyushni ret qilghan. Buning biri xu'ang jü, yene biri li changchün. Siyasiy byuro ezaliridin wang jawgo, chén liyangyü, xuy liyangyü, wang léchu'en qatarliq 9 kishi bu uqturushni ret qilghan.

188 Neper merkiziy komitét ezasi'ining 60 nechchisi qoshulghan, qalghan 120 nechchisi ret qilghan. 158 Neper merkizi komitét kandidat ezasining ichide 83 i imza qoyushni ret qilghan. 31 Ölke we biwaste qarashliq sheherlerdiki partiye we hökümet, xelq qorultéyi, siyasiy kéngeshlerning birinchi qol bashliqliridin 100 dek adem imza qoyushni ret qilghan.

'Közitish zhurnili' da élan qilin'ghan obzorlarda bayan qilinishiche, hazir xitay kommunistik partiye merkizi komitét siyasiy byurosi ezalirining 48% i, merkizi komitét ezalirining 3 tin 2 qismi, merkizi komitét kandidat ezalirining 50% i, ölke derijilik emeldarlarning 78% i we uningdin töwen emeldarlarning 100% özlirining xususiy mülkini ashkarilashni ret qilmaqta.

Xu jintaw qol astidikilerge gépini anglitalamdu

Bezi obzorlarda "xitayda kommunistik partiye merkizi komitéti xiyanetchilerni jazalaymiz dewatqili 20 yil boldi, emeliyette bu partiye özi 'kommunistik partiyining ilgharliqini saqlash' dégen xalta ichide sésip, xiyanetchiler partiyisige aylinip qaldi" dep bayan qilin'ghan. Yene bezi mulahizichiler "hazir jem'iyette xiyanetchilerni pash qilish herikiti ewj almaqta. Eger xu jintaw bu qétim qol astidiki emeldarlargha gépini aqquzalmisa, kolléktip halda wezipisidin istipa bérishi kérek" dégen.

Wang léchu'en néme üchün özining xususiy mülkini ashkarilashni ret qilidu?

Amérikida turiwatqan Uyghur kishilik huquq pa'aliyetchisi, Uyghurlarning meniwiy anisi rabiye qadir xanimmu yéqinda xitayda merkizi hökümet mexsus uqturush chüshürüp, emeldarlarning xususiy mülkini jem'iyetke ashkarilashni we aldi bilen emeldarlardin bu uqturushni qobul qilidighan yaki qilmaydighanliqini ipadilep imza qoyushini telep qilghanliqi heqqide obzor élan qilip "xu jintawning bu herikitini bir xil ilgirilesh dep qarashqa bolidu, emma uning xiyanetchilerni jazalash heqqide bergen wedisining ras -yalghanliqi, emelge ashidighan yaki ashmaydighanliqi téxi namelum, buni emdi körimiz" dédi.

Rabiye qadir xanimning , wang léchu'enning néme üchün özining we a'ile -tewelirining Uyghur aptonom rayonidiki xususiy mülkini jem'iyetke ashkarilashni ret qilghanliqi heqqide özi éniq bilidighan pakitlargha asasen tehlil qilishiche, wang léchu'en merkezdiki özidin yuqiri emeldarlarningmu sherqiy türkistanda xiyaniti barliqini bilidu, wang léchu'enning özi we uruq -tuqqanliri ular bilen köp jehette shirik, shunglashqa wang léchu'en merkezning uqturushini qorqmay ret qilghan bolushi mumkin. Yene bir tereptin éytqanda, wang léchu'en uz shirikliridin qorqsa kérek. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet