Хәмит кәримоф мәрһум абдурахман мәһмудиниң шеирлири һәққидә тохталди

Мәйли коммунист хитай вә мәйли милләтчи хитай һөкүмити дәврлиридә болсун, уйғур милләтчи зиялийлири, вәтәнпәрвәр шаирлири тамамән охшаш қисмәтләргә дучар болуп кәлди.
Мухбиримиз җүмә
2009-02-19
Елхәт
Пикир
Share
Принт

Нурғунлиған уйғур язғучи, шаирлири бир болса һәр хил баһанә ‏ - сәвәбләр билән өлтүрүлсә, бир болса уларниң йүрәк қенидин пүткән иҗадийәт мевилири мәтбуатларда чәклинип хәлқ билән йүз көрүштүрүлмиди.

1962 ‏ - Йили хитай түрмисигә ташлинип түрмидә узун йил азаб чәккән, түрмидин қоюп берилгән болсиму, әмма өзи иҗад қилған шеирлириниң бир парчисиниму нәшр қилдурушқа мувәппәқ болалмай түрмидин чиқип узун өтмәй аләмдин өткән шаир абдурахман мәһмуди, әнә шуларниң җүмлисидиндур.

Абдурахман мәһмудиниң шеирлири қандақ қисмәтләрни бешидин кәчүрүп аридин 46 йил өткәндә өзи сөйгән ана вәтини вә җаниҗан хәлқи билән йүз көрүшүш пурситигә игә болалиди?

Һөрмәтлик оқурмәнләр, биз төвәндә сөһбәт елип бармақчи болған киши, хәмит кәримоф болуп, у 1962 - йили ана юрти ғулҗидин һиҗрәт қилип орта асияға чиқип кетишкә мәҗбур болған уйғур зиялийлардин биридур.

Хәмит кәримоф әйни вақитта, ғулҗида биргә өскән шаир дости абдурахман мәһмуди иҗад қилған бир түркүм шеирларни вәтән ичидә нәшр қилдуруш имкани болмиғанлиқи сәвәблик, чәтәлдә нәшр қилдуруш истикидә өзи билән биргә чәтәлгә елип чиққан.

Вәһаләнки, һәр хил сәвәбләр түпәйли хәмит кәримоф, дости абдурахман мәһмудиниң шеирлирини чәтәлләрдиму нәшр қилдурушқа мувәппәқ болалмиған болсиму, һаман бир күни пурсәт келиду дегән үмид билән 46 йил сақлайду.

Мәлум бир сәвәбләр билән хәмит кәримоф 2008 - йилиниң ахири америкиға келиш пурситигә еришкән һәмдә достиниң шеирлирини йәнә шу әзгү истәкләр билән америкиға елип кәлгән.

Һөрмәтлик оқурмәнләр, юқиридики аваз улинишидин, абдурахман мәһмуди вә униң шеирлири һәққидики сөһбитимиздин учурларға ериштиңлар. Төвәндә, мәрһумниң " юлтузлар" намлиқ шеирини силәргә сунимиз.

Юлтузлар

Абдурахман мәһмуди  (1960 - йили ноябир)

Ех юлтузлар, янар юлтузлар,
Чарақлайсән йирақ асманда.
Көз тикимән саңа көп вақит,
Әләм - һәсрәт мени басқанда.

Нечүн көз тикимән саәт - саәтләп,
Түнләрдә уйқу йоқ нечүн көзүмдә?
Асманда немә бар? дәймән бәзидә,
Соал берип тәнһа өзүмгә.

Әй ... Мәндин кәткән сөйгү җанани,
Худди сәндәк паянсиз узақ.
Аһ йетәлмәсмән униңға мәңгү,
Путлиримда йетимлик тузақ.

Шуниңдин тартип саңа тәлмүрүп,
Адәт болди бу сирлиқ башқа.
Көзүмдин нәм көрәлмәс һеч зат,
Көксүм толған әләмлик яшқа.


Пикирләр (0)
Share
Толуқ бәт