Dunya sehiye teshkilati ékologiyilik bulghinish mesilisi heqqide dunyani agahlandurdi


2005-12-13
Share

Dunya sehiye teshkilatining jüme küni élan qilghan doklatida, yer shari ikologiyilik muhitning bulghinishi bilen bir waqitta, türlük késelliklerning peyda bolup, kishilerning salametlikige zor tehdit élip kéliwatqanliqi otturigha qoyulghan shundaqla qush zukumi, sars qatarliq yéngi türdiki késelliklernimu del mushu ékologiyilik muhitning bulghinishi tüpeylidin kélip chiqqan bolushi mumkinliki eskertilgen. Mezkur doklatta yene xitayda peyda bolghan sars késilining eyni waqitta yawayi haywan göshini yéyish arqiliq ademge yuqqanliqi perz qilin'ghan. Gu'angju birinchi doxturxana nepes bölümi doxturi sing jün "tetqiqat netijilirige asaslan'ghanda, xitaydiki sars késili sésiq qozandin tarqalghan bolushi mumkin" dep bildürgen.

Qush zukimi bilen yuqumlan'ghanlarning köpi yézidin kelgen

Dunya sehiye teshkilatining doklatida körsitilishiche, hazir dunya buyiche öy qushlirini béqish bazarliship ketken. Bir qisim chong toxu férmilirining mewjut bolup turushi shundaqla köpligen déhqanlarning toxu férmisi etrapida yashawatqanliqi qush zukumining tarqilish éhtimalini téximu kücheytken.

Gu'angju birinchi doxturxana nepes bölümi doxturi sing jünning éytishiche, xitaydiki qush zukumi bilen yuqumlan'ghuchilarning késel tarixigha qarighanda, bimarlarning hemmisi dégidek yézidin kelgenler bolup ular késel toxu bilen biwaste alaqisi bolghan. Buni az dep, bir qisim yéza yaki chet rayonlardiki déhqanlarda késel bolup qalghan hetta ölgen toxuni soyup yeydighan adet bar iken.

Dunya sehiye teshkilatining yéqinda élan qilghan bu doklatida yene türlük késelliklerning peyda bolushi peqet yawayi haywan yaki öy qushliridinla emes, belki bulghan'ghan su bilenmu intayin munasiwetlik ikenliki tekitlinip, hazir dunyada her yili 3 milyondin artuq kishining bulghan'ghan suni istimal qilghanliqtin, türlük késelliklerge giriptar bolup hayatidin ayriliwatqanliqini melum qilghan.

Xitayda suning bulghinishi éghir

Xitaydiki muhitni asrash pa'aliyetchisi yang shingning bildürüshiche, xitaydiki köpligen derya ‏- éqinlarning hemmisi dégidek bulghan'ghan bolup, 300 milyon adem ichimlik sudin behriman bolalmay kelgen.

Yangshingning melum qilishiche, hazir xitayda ichimlik su hemmila jayda intayin éghir derijide bulghan'ghan bolup, peqet chang jyang deryasining özidila bulghan'ghan suning miqdari 200 milyard tonnidin éship ketken shuning bilen paskina suni istimal qilghuchilar arisida, türlük késelliklerge girip bolghuchilar sanimu barghanséri köpeygen.

Xitay agéntliqining ürümchidin bergen xewiridin melum bolushiche, yéqinqi yillardin buyan, Uyghur élidiki derya - éqinlarmu zor derijide bulghan'ghan bolup, 5 milyon'gha yéqin kishi ta bügün'ge qeder dézinfiksiye qilinmighan suni istimalqilishqa mejbur bolghan hemde bularning köp sandikisi déhqanlar iken.

Radi'omizning ziyaritini qobul qilghan aqsudiki bir déhqan özi turiwatqan yézidiki 70% déhqanning ta bügün'ge qeder yenila köl süyi ichip kéliwatqanliqini melum qilghan.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet