D u q zalida muhemmed peyghemberning tughulghan küni we barin inqilabining 17 yilliqi xatirilendi


2007.04.02

D u q we uning terkibidiki yawropa sherqiy türkistan birliki, sherqiy türkistan informatsiye merkizi qatarliq teshkilatlarning rehberliri we ezaliri 4 – ayning 1 – küni bash shitabi gérmaniyining myunxén shehiridiki d u q ning yighin zalida peyghembirimizdur muhemmed sellellahu eleyhissalamning tughulghan künini xatirilesh yüzisidin mewlut ötküzüsh bilen birge, 1990 – yili 4 – ayning 5 – küni yüz bergen "barin inqilabi" ning 17 yilliqini xatirilesh pa'aliyiti élip bardi. Pa'aliyet muqeddimiside peyghembirimizning hayat pa'aliyetliri heqqide chüshenche bérip ötülgendin kéyin, peyghembirimizning we uning a'ile tawabi'atlirining rohigha du'alar qilindi. Andin barin shéhitlirining rohigha atap qur'an tilawet qilindi.

Pa'aliyet dawamida d u q ning mu'awin re'isi esqerjan ependi Uyghurlarning bügün'ge qeder öz mewjudluqini saqlap qélishta islam dinining hel qilghuch rol oynighanliqini tekitlep ötüsh bilen birge, 1990 – yili 4 – ayning 5 – küni Uyghur wetinide yüz bergen barin inqilabining sherqiy türkistan milliy azadliq kürishi tarixida oynighan roligha alahide yuqiri baha bérip, barin inqilabining weten ichi we sirtidiki Uyghur milliy herikitige zor tesir körsitipla qalmay, Uyghurlar mesilisining xelq'ara siyasiy sehnide tonulushigha türtke bolghanliqini, barin inqilabining tesiri bilen 1992 – yili istanbulda "sherqiy türkistan milliy qurultiyi" qurulup, chet`ellerde tarqaq pa'aliyet élip bériwatqan Uyghur teshkilatlirining tunji qétim bir bayraq astigha jem bolghanliqini eskertip ötti.

Bu qétimqi pa'aliyetke ishtirak qilghan sherqiy türkistan informatsiye merkizining mes'uli abdujélil qariqash ependi pikir bayan qilip, barin inqilabining ehmiyiti heqqide öz qarashlirini otturigha qoydi.

Barin shéhidliri we barin weqesi heqqide yéterlik melumatqa ige bolghan bir qisim Uyghurlar mezkur weqe toghrisida öz qarashlirini otturigha qoyup ötkendin kéyin mewlut bashlinip, muhemmed peyghemberning ish – pa'aliyetliri we islam dinining ehmiyiti tonushturuldi. Axirida d u q mu'awin re'isi esqerjan ependi rabiye qadir xanim bashchiliqidiki d u q rehberlirining jenwede ötküzülgen b d t yighinidiki pa'aliyetliridin melumat bérip ötti we rabiye qadir xanimning salamini yetküzdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.