Amérika tashqiy ishlar ministirliqi "sürgündiki sherqiy türkistan hökümiti" ni étrap qilmaydighanliqini bildürdi

• Muxbirimizning bu heqtiki xewirini anglang
• Download story audio

Sürgündiki sherqiy türkistan orgini amérika hökümitige rehmet éytti

Düshenbe küni washin'gtonda axbarat élan qilish yighini ötküzgen sürgündiki bir teshkilatning rehbiri, amérika hökümitige "sürgündiki sherqiy türkistan hökümiti" ning qurulushigha yol qoyghanliqi üchün rexmet éytti. Biraq sürgündiki teshkilat rehbirining sözi, amérika tashqiy ishlar ministirliqi teripidin shu küni derhal ret qilindi.

Muxbirimiz réchard finnéyning düshenbe küni xewer qilishiche, özini "sherqiy türkistan sürgündiki hökümiti" ning "bash ministiri", dep atighan enwer yüsüp, amérika paytexti washin'gtondiki amérika döletlik axbarat kulubida muxbirlargha söz qilip, amérika hökümitining "sürgündiki sherqiy türkistan hökümiti" ni qollawatqanliqi heqqide bisharet bergen. U mundaq dégen:

"Men sürgündiki sherqiy türkistan hökümitining bash ministiri bolush süpitim bilen, amérika hökümitining sürgündiki sherqiy türkistan hökümitining qurulushigha yol qoyghanliqi üchün rehmet éytimen."

Amérika "sürgündiki sherqiy türkistan hökümiti" ni qollighanliqini ret qildi

Enwer yüsüpning ashkarilishiche, "sürgündiki sherqiy türkistan hökümiti" ikki ayning aldidi'a qurulghan. U, 60 kishilik sürgündiki parlamént tesis qilin'ghanliqini bildürdi.

Amérika tashqiy ishlar ministirliqining bayanatchisi tam keyséy, düshenbe küni erkin asiya radi'osi muxbirlirini qobul qilip, amérika hökümitining "sherqiy türkistan sürgündiki hökümiti" ni qollighanliqini ret qildi. U mundaq didi : "biz undaq bir sürgündiki hökümetni étrap qilmaymiz, shundaqla amérika hökümiti héchqachan bundaq bir teshkilatni qollimaydu."

Amérika döletlik axbarat kulubida söz qilghan enwer yüsüp, merkizi gérmaniyidiki dunya Uyghur qurultiyi bilen pikir jehette perqlinidighanliqini ilgiri sürdi. Enwer yüsüp mundaq deydu: "dunya Uyghur qurultiyi musteqilliqni emes, aptonomiyini ilgiri süridu, biraq men yenila ularning idiye we pikrige hörmet qilimen."

Dunya Uyghur qurultiyi "sherqiy türkistan sürgündiki hökümiti" ning köz qarishini ret qildi

Dunya Uyghur qurultiyi bilen merkizi washin'gtondiki amérika Uyghur jem'iyiti, enwer yüsüpning guruppisi bilen otturida melum musape saqlap kelmekte. Enwer yüsüpning "dunya Uyghur qurultiyi aptyonomiyini ilgiri süridu" digen sözliri, mezkur teshkilatning bash katipi dolqun eysa teripidin ret qilindi.

Dolqun eysa radi'omizgha mundaq deydu: "dunya Uyghur qurultiyining meqsidi musteqilliq, musteqilliq we tamamen musteqilliq." U yene "dunya Uyghur qurultiyi meqsidige érishish üchün özi pa'aliyet élip bériwatqan döletlerning qanunliri we b d t qanun - nizamliri yol qoyghan pütün wastilarni qollinidu" dep körsetti.

Axbarat élan qilish yighinida, amérika hökümitidiki bezi emeldarlar bilen dostluq munasiwiti barliqini ilgiri sürgen enwer yüsüp, bu emeldarlarning ismini tilgha almidi. U, xitay hökümiti bilen wastiliq qanallar arqiliq alaqe ornitiwatqanliqini bildürdi. Biraq, enwer yüsüp, sürgündiki mezkur organning maliye- iqtisadi menbe'esi qeyerdin kélidighanliqi toghrisida melumat bermidi.