Италийидики хитай аққунлириниң паракәндичиликлири


2007-03-21
Share

Хитай һөкүмити бүгүнки хитай җәмийитини бай, қудрәтлик, тинч дәп тәрипләватқан вә бу һәқтә чәтәлләргә қарита үнүмлүк тәшвиқат елип беришни изчил тәшәббус қиливатқан болсиму, ғәрб мәтбуатлири өзини бай, һаллиқ сәвийигә йәттуқ дәп атаватқан хитайдики нәччә он милйонлиған намратларниң турмуши һәққидә, өзини қудрәтлик санаватқан хитайдики һаятлиқ һәқлири, кишилик һоқуқлиридин мәһрум қилинған йүз милйонлиған бичарә хәлқниң пәрятлири һәққидә, өзини тинич санаватқан хитайдики ички низалар вә топилаңлар һәққидә хәвәрләр елан қилип, хитайниң сахта тәшвиқатиға рәддийиләр бәрмәктә.

Күнсери көпийиватқан хитай аққунлири ғәрипликләрни барғансири әндишигә салмақта.

3 – Айниң 13 – күни германийә телевизор қаналлири хитайниң йоңҗю шәһридә йүз бәргән 25 миң кишилик топилаңниң нәқ мәйдан хәвирини елан қилип, хитай президенти хуҗинтав икки йиғинда 3000 дин артуқ вәкилгә хәлқ турмушини яхшилаш үчүн вәдә бериватқан мушундақ бир чағда, намратчилиқ, ачарчилиқ ичидә яшаватқан йүз милйонлиған хәлқкә вәкалитән йоңҗюлуқлар топилаң көтүрүп, өзиниң иссиқ қанлири бәдилигә хәлқниң коммунистик һакимийәткә болған наразилиқини ипадилиди" дәп хәвәр елан қилди:

Бүгүн өзини бай, қудрәтлик, мәдәнийәтлик вә тинч атаватқан хитайдин қечип, явропа тупрақлириға сиясий панаһлиқ тиләп еқип кириватқан хитайларниң сани йәнә нимә үчүн барғансири көпийип бариду? күнсери көпийиватқан хитай аққунлири ғәрипликләрни барғансири әндишигә салмақта.

Хитай аққунлириниң пул - мәнпәәт үчүн қилған һәр хил җинайи қилмишлири явропа хәлқини техиму сәскәндүрмәктә. Алдинқи һәптә германийидики ZDF телевизийә қанилида: хитай аққунлириниң хитай әткәсчилири билән бирлишип, германийигә 30 миң тонна қанунсиз белиқ йөткәп тутулғанлиқи һәққидә нәқ мәйдан хәвири елан қилинған иди. Ундин илгири германийиниң ситтинсән шәһридики хитайлар тәрипидин ечилған "линюә ресторани" да алтә нәпәр хитай әткәсчиси вйетнамлиқлар тәрипидин өлтүрүлгән иди. 3 – Айниң 16 – күни ZDF қанилида йәнә "хитайларниң италийидики ишләпчиқириши" намлиқ һөҗҗәтлик хәвәр елан қилинди. Хәвәрдә, италийиниң 180 миң аһалә яшайдиған тоскана дегән бир шәһридә өзлирини тизимлитип қанунлуқ ишләватқан хитай аққунлириниң саниниң 30 дин ашидиғанлиқини, әмәлийәттә бу йәрдә қанунсиз яшаватқан вә қанунсиз ишләватқан хитайлар саниниң техиму көп икәнлики, хитай аққунлирини тизгинләшниң шәһәрлик һөкүмәт үчүн бир баш ағриқи боливатқанлиқи тилға елинди.

5000 Йиллиқ мәдәнийәткә игә хитайлар явропалиқларни сәскәндүрмәктә

Мәзкур һөҗҗәтлик хәвәрдә, тоскана шәһридә ишләпчиқириш билән шуғуллиниватқан хитайларниң йәр асти завути сүрәткә елинған болуп, хитайларниң кичә – күндүз дәм алмай һәр хил кейим-кечәк вә аяқларни тикиватқанлиқи шундақла тикип чиққан кийим-кечәк вә аяқларға "италийидә ишләнди " дегән маркиниң чапланғанлиқи, завутниң мәйнәтчилик вә қалаймиқанчилиқ билән толғанлиқи, уларниң мушу йәр асти завутта йетип қопидиғанлиқи қатарлиқлар тонуштурулған болуп, хитайларниң бу қәдәр мәдәнийәтсиз вә мәйнәтлики шу йәрдики йәрлик аһалиниң қаттиқ наразилиқини қозғиған.

Болупму, хитайларниң адәм бар-йоқ дәмәй вақирап сөзләшлири, халиған йәргә түкүрүшлири, әхләтләрни удул кәлгән йәргә ташлап қоюшлири әтраптики аммини қаттиқ сәскәндүрвәткән. Йәрлик амма германийә мухбирлириниң зиярәтлирини қобул қилип, хитай һәққидә тәшвиқатлардин аңлиғини билән әмәлийәттә көргәнлириниң түптин охшимайдиғанлиқини, хитайларниң бу қәдәр мәдәнийәтсиз вә мәйнәтликидин, вуҗудида пулдин өзгә һечнимә болмайдиған бу мәһри-шәпқәтсиз, шәхсийәтчи тәбиитидин йиргәңәнликини инкас қилишқан.

Италийиликләрни ғәзәпләндүриватқан мәсилә шу болғанки, хитайларниң бу хил йәр асти завутлири базарда мода боливатқан кейимләрни охшаш шәкилдә тәқлид қилип ишләпчиқирип, базарда еқиватқан баһадин әзран баһада сатидикән. Бу һал әсли мал ишләпчиқарғучи завутларниң керимигә зәрбә беридикән. Хитайларниң хитай дөлитидин һәр хил сахта малларни әкирип төкмә қилип сетипла қалмай, италийиниң өзидә сахта тавар ишләпчиқириш завутлирини қуруп, базарни қалаймиқанлаштуруши италийә һөкүмитиниң җидди диққитигә елинған.

Хитайларниң италийә базарлирини қалаймиқанлаштуруш билән биргә, һәр хил җинайи әнзиләрни үзлүксиз садир қилиши италийә хәлқиниң хитайдин - сериқ апәттин йиргиниш һессиятини барғансири күчәйтивәткән. (Әкрәм)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт