Italiyidiki xitay aqqunlirining parakendichilikliri


2007-03-21
Share

Xitay hökümiti bügünki xitay jem'iyitini bay, qudretlik, tinch dep teriplewatqan we bu heqte chet'ellerge qarita ünümlük teshwiqat élip bérishni izchil teshebbus qiliwatqan bolsimu, gherb metbu'atliri özini bay, halliq sewiyige yettuq dep atawatqan xitaydiki nechche on milyonlighan namratlarning turmushi heqqide, özini qudretlik sanawatqan xitaydiki hayatliq heqliri, kishilik hoquqliridin mehrum qilin'ghan yüz milyonlighan bichare xelqning peryatliri heqqide, özini tinich sanawatqan xitaydiki ichki nizalar we topilanglar heqqide xewerler élan qilip, xitayning saxta teshwiqatigha reddiyiler bermekte.

Künséri köpiyiwatqan xitay aqqunliri gheripliklerni barghansiri endishige salmaqta.

3 – Ayning 13 – küni gérmaniye téléwizor qanalliri xitayning yongjyu shehride yüz bergen 25 ming kishilik topilangning neq meydan xewirini élan qilip, xitay prézidénti xujintaw ikki yighinda 3000 din artuq wekilge xelq turmushini yaxshilash üchün wede bériwatqan mushundaq bir chaghda, namratchiliq, acharchiliq ichide yashawatqan yüz milyonlighan xelqke wekaliten yongjyuluqlar topilang kötürüp, özining issiq qanliri bedilige xelqning kommunistik hakimiyetke bolghan naraziliqini ipadilidi" dep xewer élan qildi:

Bügün özini bay, qudretlik, medeniyetlik we tinch atawatqan xitaydin qéchip, yawropa tupraqlirigha siyasiy panahliq tilep éqip kiriwatqan xitaylarning sani yene nime üchün barghansiri köpiyip baridu? künséri köpiyiwatqan xitay aqqunliri gheripliklerni barghansiri endishige salmaqta.

Xitay aqqunlirining pul - menpe'et üchün qilghan her xil jinayi qilmishliri yawropa xelqini téximu seskendürmekte. Aldinqi hepte gérmaniyidiki ZDF téléwiziye qanilida: xitay aqqunlirining xitay etkeschiliri bilen birliship, gérmaniyige 30 ming tonna qanunsiz béliq yötkep tutulghanliqi heqqide neq meydan xewiri élan qilin'ghan idi. Undin ilgiri gérmaniyining sittinsen shehridiki xitaylar teripidin échilghan "linyu'e réstorani" da alte neper xitay etkeschisi wyétnamliqlar teripidin öltürülgen idi. 3 – Ayning 16 – küni ZDF qanilida yene "xitaylarning italiyidiki ishlepchiqirishi" namliq höjjetlik xewer élan qilindi. Xewerde, italiyining 180 ming ahale yashaydighan toskana dégen bir shehride özlirini tizimlitip qanunluq ishlewatqan xitay aqqunlirining sanining 30 din ashidighanliqini, emeliyette bu yerde qanunsiz yashawatqan we qanunsiz ishlewatqan xitaylar sanining téximu köp ikenliki, xitay aqqunlirini tizginleshning sheherlik hökümet üchün bir bash aghriqi boliwatqanliqi tilgha élindi.

5000 Yilliq medeniyetke ige xitaylar yawropaliqlarni seskendürmekte

Mezkur höjjetlik xewerde, toskana shehride ishlepchiqirish bilen shughulliniwatqan xitaylarning yer asti zawuti süretke élin'ghan bolup, xitaylarning kiche – kündüz dem almay her xil kéyim-kéchek we ayaqlarni tikiwatqanliqi shundaqla tikip chiqqan kiyim-kéchek we ayaqlargha "italiyide ishlendi " dégen markining chaplan'ghanliqi, zawutning meynetchilik we qalaymiqanchiliq bilen tolghanliqi, ularning mushu yer asti zawutta yétip qopidighanliqi qatarliqlar tonushturulghan bolup, xitaylarning bu qeder medeniyetsiz we meynetliki shu yerdiki yerlik ahalining qattiq naraziliqini qozghighan.

Bolupmu, xitaylarning adem bar-yoq demey waqirap sözleshliri, xalighan yerge tükürüshliri, exletlerni udul kelgen yerge tashlap qoyushliri etraptiki ammini qattiq seskendürwetken. Yerlik amma gérmaniye muxbirlirining ziyaretlirini qobul qilip, xitay heqqide teshwiqatlardin anglighini bilen emeliyette körgenlirining tüptin oxshimaydighanliqini, xitaylarning bu qeder medeniyetsiz we meynetlikidin, wujudida puldin özge héchnime bolmaydighan bu mehri-shepqetsiz, shexsiyetchi tebi'itidin yirgengenlikini inkas qilishqan.

Italiyiliklerni ghezeplendüriwatqan mesile shu bolghanki, xitaylarning bu xil yer asti zawutliri bazarda moda boliwatqan kéyimlerni oxshash shekilde teqlid qilip ishlepchiqirip, bazarda éqiwatqan bahadin ezran bahada satidiken. Bu hal esli mal ishlepchiqarghuchi zawutlarning kérimige zerbe béridiken. Xitaylarning xitay dölitidin her xil saxta mallarni ekirip tökme qilip sétipla qalmay, italiyining özide saxta tawar ishlepchiqirish zawutlirini qurup, bazarni qalaymiqanlashturushi italiye hökümitining jiddi diqqitige élin'ghan.

Xitaylarning italiye bazarlirini qalaymiqanlashturush bilen birge, her xil jinayi enzilerni üzlüksiz sadir qilishi italiye xelqining xitaydin - sériq apettin yirginish héssiyatini barghansiri kücheytiwetken. (Ekrem)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet