Xitayning herbiy tereqqiyati amérika bilen awstraliyining endishisini kücheytmekte


2007-07-05
Share

Xitay herbiy tereqqiyatining sür'iti xitayning qoshna döletlirini endishige sélipla qalmay, asiya - tinch okyan rayonidiki döletlernimu jiddiyleshtürüp qoymaqta. Axirqi künlerde xitay herbiy tereqqiyatining sür'itidin bi'aram boluwatqan döletlerge qatarigha awstraliye qoshuldi. Awstraliye bash ministiri jon xoward we awstraliyini ziyaret qilghan amérika herbiy qisimlirining yuqiri derijilik bir génirali, xitayning herbiy kéngeymichilikige diqqet qiliwatqanliqini tekitligen we buni asiya - tinch okyan rayonining bixeterlikige paydisiz , muqimsiz amillar, dep qaraydighanliqini bildürgen.

Xitayning herbiy küchi rayon muqimliqigha paydisiz

Xitay herbiy sélinmisi we herbiy küchining téz kéngiyishidin bi'aram boluwatqan yaponiye we amérika qatarliq döletler qatarigha axirqi künlerde awstraliye qétildi. Awstraliye bash ministiri xoward, peyshenbe küni awstraliyining 2005 - yili élan qilghan dölet mudapi'e siyasitini yéngilash munasiwiti bilen pikir bayan qilip, xitay herbiy küchining téz kéngiyishi asiya - tinch okyan rayonida muqimsizliqning kélip chiqishigha sewebchi bolush éhtimali barliqini bildürdi.

Xoward,"xitayning herbiy zamaniwilashturush sür'iti we kölimi, bolupmu sün'iy hemrahgha qarshi bashqurulidighan bomba siniqi qatarliqlarda weyran qilish küchining tereqqiyati, rayonda uqushmasliqlar we muqimsizliqlargha sewebchi bolushi mumkin "deydu. Bu awstraliye bash ministirining hazirgha qeder awstraliyining eng chong soda shériki xitay toghrisida uning herbiy küchini tunji qétim rayonning muqimliqigha paydisiz, dep baha bérishi bolup, amérika awstraliyining xitay herbiy tereqqiyatigha sel qarawatqanliqini üzlüksiz eskertip kelmekte idi.

Yaponiye rayon ishlirida téximu zor rollarni oynash kérek

Birleshme axbarat agéntliqining eskertishiche, awstraliyining yéngi dölet mudapi'e siyasiti xitayning herbiy küchi mesiliside awstraliyining amérika bilen pikirdash ikenlikini ipadiligen. Awstraliye, amérika we yaponiyiler bilen bixeterlik shertnamisi imzalighan dölet shundaqla awstraliyining dölet mudapi'e siyasitige asaslan'ghanda amérika bilen yaponiye awstraliyining eng yéqin shériki.

Jon xoward, yaponiye mesilisini tilgha alghanda yaponiyini awstraliyining rayondiki döletler ichide eng yéqin we eng qimmetlik dosti, dep teriplidi we "yaponiye amérika bashchiliqidiki köp dölet ittipaqdashlirining ichide téximu aktip rol oynisa, bu uning iqtisadi we diplomatik tesir küchige pütünley uyghun kélidu " dep körsetti.

Xitayning herbiy küchini tereqqi qildurushtiki muddi'asi nime ?

Xitayning herbiy küchini keng - kölemlik we téz sür'et bilen kéngeytishidiki meqset we muddi'asi amérika siyasi we herbiy da'irilirining üzlüksiz gumanini qozghawatqan mesile idi. Awstraliye bash ministiri xitayning herbiy kéngeymichiliki rayonning muqimliqigha paydisiz, dep tekitligen shu küni, amérika déngiz armiyisining bir awi'amatka piloti awstraliyini ziyaret qilmaqta idi.

Amérika déngiz armiye admérali,"bürküt bachkisi" belgilik amérika awi'amatka pilotining qomandani riéyk wirén, sédnéyda "bizning xitaydin endishe qilidighan yerlirimiz bar " dep tekitlidi. U mundaq deydu, "xitayning herbiy küchini keng kölemlik kéngeytishidiki meqsidi we muddi'asigha bergen izahati ishenchlik emes. "

Xitay: meqsidimiz özimizni qoghdash

Xitay hökümiti xitay herbiy küchini kéngeytishidiki muddi'asini aqlap, xitayning bixeterliki we muqimliqini közde tutuwatqanliqini, herbiy sélinma yenila omum xamchotning nahayiti az bir qisimini igileydighanliqini eskertmekte. Xitay tashqiy ishlar ministirliqi bayanatchisi chin gang, peyshenbe künki axbarat élan qilish yighinida awstraliyining dölet mudapi'e höjjitige inkas qayturup, junggoning dölet mudapi'e siyasitini " özini qoghdash xaraktérlik shundaqla biz tinch tereqqiyat yolida mangimiz. Junggo dunya bixeterliki, rayonning tinchliqi we muqimliqini qoghdashtiki asasi küch " dep aqlidi.

Amérika déngiz armiye admérali réyk wirén, " elwette biz xitayning rayonda muqimluqni saqlighuchi bir küch bolushini kütimiz. Lékin biz buninggha qana'et hasil qilghiche öz ishimizni qiliwérimiz shundaqla prézidéntning buyruqini ijra qilish üchün teyyar turimiz " deydu.

Herbiy manéwir kimge bérilgen agahlandurush ?

" Bürküt bachkisi"belgilik amérika awi'amatka piloti adettiki künlerde amérikining yaponiyidiki herbiy bazisida tursimu, lékin ular bu qétim awstraliyige amérika - awstraliye herbiy qisimlirining 2 yilda bir qétim ötküzülidighan herbiy manéwirgha qatnishish üchün kelgen. Charshenbe küni axirlashqan ikki heptilik manéwirgha amérika 20 ming kishilik qoshun, awstraliye 7500 kishilik qoshun qatnashturdi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet