Bawtong ependining qarishiche, kommunist partiyige bésim ishlitish yaxshi chare

• Muxbirimiz welining bu heqtiki toluq melumati
• Download story audio

Xitayda herbiy qisimlar kommunst partiyining qolida, ‏‏- dep obzorini bashlaydu bawtong ependi. Bawtong ependi eyni waqitta xitay merkizi komitétining sabiq bash sékritari jawziyangning katipi idi. Bawtong ependi özining bu obzorini élan qilish hoquqini erkin asiya radi'osigha tapshurdi. Bawtong ependining bayan qilishiche, 1989 ‏- yili 4 ‏- iyon küni béyjingdiki tyen'enmén meydanida, xiyanetchilerni jazalash we démokratiyini yolgha qoyushni telep qilghan xelqni, kommunist partiyining herbiy komitéti bir nechche yüz ming kishilik qoralliq qisimni ishqa sélip qanliq basturghan idi.

1957 ‏- Yili xitayda élip bérilghan ongchilargha qarshi turush herikitide 550 ming neper ademni 'ongchi' dep qorshap hujum qilishning bash qomandani déng shawping, eyni waqitta kommunist partiyining herbiy komitétining re'isi idi. Déng shawping shu küni, xitay armiyisige döletning igisi bolghan xelqni tanka, pilimutlar bilen hujum qilip basturushqa buyruq chüshürdi.

Xitayda xeliqni qirghinchiliq qilghannimu medhiyileydighan wijdansiz kishiler chiqti

‏- Béyjingdiki doxturxanilarning téz qutquzush bölümlirige yaridarlar, jesetler sighmidi, ‏-‏ deydu bawtong ependi obzorida, - eyni waqitta, pütün dunya xitayda boluwatqan bu qanliq weqelerni sün'iy hemrah arqiliq körüp turghan idi. Bundaq weqe qulluq jem'iyettimu, militaristlar dewridimu insaniyetni qirghan jinayet dep hésablinatti.

Emma zamanimizda bolsa , - deydu bawtong ependi, ‏‏- shundaq dehshetlik qirghinchiliqnimu medhiyileydighan wijdansiz kishiler chiqti. Bundaq kishiler xelqni qirghuchilargha sherep taxtisi asti. Shu chong qirghinchiliqtin kéyinmu, xelq dawamliq basturuluwatidu.

Yoqsullar üchün yasalghan türme we kommunist partiye üchün yasalghan jennet

4 ‏- Iyundiki chong basturushtin kéyin, xitayda peyda bolghan xiyanetchilik -chiriklik omumyüzlük yamrap ketken 'iqtisadiy awatliq' peyda boldi. Bu chong 'iqtisadiy awatliq'tin xitay ikkige parchilandi, ‏- dep bayan qilidu bawtong ependi, ‏- uning biri, xitayda namrat-yoqsullar üchün yasalghan türme, yene biri kommunist partiye üchün yasalghan jennet.

Kommunist partiye hazir özige yalaqchiliq qilidighan kishini wezipige qoyidu, qanunmu kommunist partiyining qolida, ular dölet xezinisidin xalighanche xiyanet qilidu. Hazir xitayda, ‏-‏ deydu bawtong ependi, ‏‏- yüz milyon dollardin köp mülki bar baywechchilerning sani 3200 din ashidu, uning 2900 din artuqi kommunist partiye kattibashlirining bala-chaqiliri.

Pul mu'amile, tashqi soda, yer asti bayliqlarni échish, chong qurulushlarni élip bérish, dölet bixeterliki qatarliq sahelerde % 90 tin artuq muhim hoquqlar shularning qolida. Eger hazir xitayda pay baziri gumran bolsa, pay qoshqan birnechche on milyon adem birdemdila weyran bolidu. 'Sotsiyalistik' junggo dégen mana shu, 'inaq junggo', 'ademni asasi orunda qoyidighan junggo', 'tinch bash kötürüwatqan junggo' dégenmu mushu, bu bir chirikleshken junggo, 4 ‏- iyon küni xelqni basturghandin kéyin peyda bolghan junggo.

Xitay hökümiti néme ish qilsa 4 ‏- iyun dégen doxmushtin ötelmey tosulup qéliwatidu

‏ 4 ‏- Iyon künidiki qirghinchiliq chong quruqluq xelqi, xongkongluqlar, teywenlikler, bashqa milletlerning, hetta pütün dunya xelqining héssiyatini zexmilendürgen idi. ‏- Dep bayan qilidu bawtong ependi obzorida, ‏- shunglashqa xitay hökümiti néme ish qilsa, mushu doxmushtin ötelmey tosulup qéliwatidu.

'Basturush toghra bolghan' dégüchiler qoghdawatqan déng shawpingning 'izzet -hörmiti' peyda qilghan siyasiy, exlaqiy jehettiki buzghunchiliq döletning birlik asasinimu buzuwetti. Bundaq junggo emdi peqet 4 ‏- iyundiki qirghinchiliqni inkar qilghandila, andin yéngi hayati küchke ige bolidu.

4‏-Iyon künidiki qirghinchiliqqa déng shawping jawabkar

‏ 4 ‏- Iyun qirghinchiliqigha déng shawping jawabkar, u alliqachan öldi, ‏‏- deydu bawtong ependi, ‏‏- emdi dölet puqraliri bu heqtiki bir adil bahani anglishi kérek! hazirqi rehberler, gerche bu weqening aqiwitini bir terep qilish qabiliyiti bolmisimu, emma dölet puqralirigha xelqni basturush jinayet ikenlikini éytishi kérek. Shundaq qilghandila andin döletning asasiy qanuni heqqide gep achalaydu.

Purset kütse, mesile özi tebi'i halda hel bolup ketmeydu

Bawtong ependi obzorida süküt qilip turup purset kütüwatqan kishiler heqqidimu toxtalghan. Uning bayan qilishiche, bezi kishiler purset kütüwatqili xéli köp yillar bolup qaldi, ular 4 ‏- iyon weqesi haman bir küni tebi'iy halda özlikidin hel bolidu, dep qaraydu.

Ongchilargha qarshi turush herikiti bolup ötken'ge 50 nechche yil boldi, lékin bu mesile 'tebi'iy halda' özlükidin hel bolup kettimu? ‏-‏ baw tong ependining qarishiche, ‏‏- kommunist partiyining mustebit tüzümi put térep turuwatqan shara'itta, naheqchiliqning 'tebi'iy halda' özlükidin hel bolup kétish éhtimalliqi mewjut emes. Chünki, waqit dégen ka'inattiki hemme mewjudiyet üchün ortaq nerse, u biterep nerse.

Xelqning dölet qanunigha asasen kommunist partiyining rehberlik guruhigha bésim ishlitish hoquqi bar

‏-‏ Tereqqiyatning yönilishi herxil bésim küchining omumiy quwitige baghliq, ‏- deydu bawtong ependi, ‏-‏ kommunist partiyining bir partiye déktatorisigha taqabil turush amili ünümlük amil. Xelqning dölet qanunigha asasen kommunist partiyining rehberlik guruhigha bésim ishlitish hoquqi bar. Ispatlandiki, bésim ishlitish yaxshi chare, shundaq bésimdin démokratik junggo kélip chiqishi mumkin. (Weli)