'Хитай дәриҗидин ташқири күч болмақчиму?'

Йеқинда америкиниң а б с хәвәрлири торида "хитай дәриҗидин ташқири күч болмақчиму" намлиқ бир мақалә елан қилинди. Мақалидә йеқинда хитайда нәширдин чиққан "җуңгониң чүши" намлиқ китабниң мәзмуниға йәр берилгән болуп, бу китабта 21 - әсирниң америка билән хитайниң чемпийонлуқ мусабиқисигә сәһнә болидиғанлиқи вә хитайниң 21 - әсирниң дәриҗидин ташқири күчи болидиғанлиқи баян қилинған.
Мухбиримиз ирадә
2010-03-05
Share
Xitay-herbi-parat-oct-1-atom-bomba 1-Өктәбир күни, хитай дөләт байримида параттин өтүватқан хитайниң әң йеңи типтики башқурулидиған бомба системисиниң көрүнүши.
AFP Photo

Америкиниң а б с хәвәрлири торида елан қилинған "хитай дәриҗидин ташқири күч болмақчиму" намлиқ мақалиниң аптори чито романа йеқинда хитайда нәшрдин чиққан "җуңгониң чүши" китабни тонуштуруп язған болуп, униң баян қилишичә, китабта " хитайниң 21 - әсирдики улуғвар нишани дуняниң биринчи дәриҗилик күчи болуш" дәп йезилған. Хитай хәлқ армийисиниң пешқәдәм полковники люмиңфу тәрипидин йезилған мәзкур китабта, "дуняниң дәриҗидин ташқири биринчи күчи болуш әсирләрдин бери хитайниң арзуси болуп кәлгән. Өткән 500 йил җәрянида охшимиған дөләтләр дуняви чемпийон болди. Мәсилән португалийә 16 - әсирдә, 18 - 19 - әсирләрдә голландийә, әнглийә, 20 - әсирдә болса америка чемпийон болди. Әмди 21 - әсирдә хитай дуняви чемпийон болуп америкиниң орнини алиду," дәп йезилған.

Бизниң бу һәқтики зияритимизни қобул қилған хитай ишлири мутәхәссиси дотсент доктор әркин әкрәм әпәнди болса хитайниң бундақ гәплириниң реаллиққа уйғун әмәсликини ейтти.

Мәзкур мақалидә дейилишичә, китабниң аптори люмиңфо а б с хәвәрлиригә язған хетидә, "америкилиқларниң хитайдин чөчүшиниң керики йоқ. Бизниң америка билән болған стратегийилик риқабитимиз инсанийәт тарихидики әң мәдәнийәтлик бир риқабәт болиду, биз америка билән һәрбий һазирлиқлар мусабиқисигә чүшмәймиз," дегән. Әмма мақалиниң аптори чито романа мақалисидә гәрчә хитай аптор хетидә бундақ дегән болсиму, әмәлийәттә униң язған китабида, "америка билән уруш чиқип қалған тәқдирдә америкиға йеңилип қалмаслиқ үчүн хитайниң тапқан пулиға һәрбий әслиһәлирини күчләндүрүп, америка билән тәң баравәр һаләткә келиши керәк," дәп язғанлиқини баян қилиду.

Мақалидә көрситилишичә, бу китаб һәққидә өз көз қаришини баян қилған хитайниң хәлқ университетиниң профессори җин кәнроң бу китабта оттуриға қоюлған көз қарашларниң пәқәтла апторниң өзигә хаслиқи, униң һәргизму хитай армийисиниң вә хитай лидерлириниң көз қариши әмәсликини әскәрткән. У йәнә хитай лидерлириниң йәнила деңшявпиңға охшаш ички сиясәткә көпрәк мәркәзлишиштәк сиясәтни йүргүзүватқанлиқини баян қилған.

Стратегийә мутәхәссиси әркин әкрәм әпәнди болса хитайда кейинки вақитларда "өзини биләлмәйдиған" мушундақ язғучи, тәтқиқатчиларниң чиқип қалғанлиқи, әмәлийәттә америка билән тоқунушниң хитайниң өзи үчүн техиму зор зиян елип келидиғанлиқини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт