'Xitay derijidin tashqiri küch bolmaqchimu?'

Yéqinda amérikining a b s xewerliri torida "xitay derijidin tashqiri küch bolmaqchimu" namliq bir maqale élan qilindi. Maqalide yéqinda xitayda neshirdin chiqqan "junggoning chüshi" namliq kitabning mezmunigha yer bérilgen bolup, bu kitabta 21 - esirning amérika bilen xitayning chémpiyonluq musabiqisige sehne bolidighanliqi we xitayning 21 - esirning derijidin tashqiri küchi bolidighanliqi bayan qilin'ghan.
Muxbirimiz irade
2010-03-05
Élxet
Pikir
Share
Print
1-Öktebir küni, xitay dölet bayrimida parattin ötüwatqan xitayning eng yéngi tiptiki bashqurulidighan bomba sistémisining körünüshi.
1-Öktebir küni, xitay dölet bayrimida parattin ötüwatqan xitayning eng yéngi tiptiki bashqurulidighan bomba sistémisining körünüshi.
AFP Photo

Amérikining a b s xewerliri torida élan qilin'ghan "xitay derijidin tashqiri küch bolmaqchimu" namliq maqalining aptori chito romana yéqinda xitayda neshrdin chiqqan "junggoning chüshi" kitabni tonushturup yazghan bolup, uning bayan qilishiche, kitabta " xitayning 21 - esirdiki ulughwar nishani dunyaning birinchi derijilik küchi bolush" dep yézilghan. Xitay xelq armiyisining péshqedem polkowniki lyumingfu teripidin yézilghan mezkur kitabta, "dunyaning derijidin tashqiri birinchi küchi bolush esirlerdin béri xitayning arzusi bolup kelgen. Ötken 500 yil jeryanida oxshimighan döletler dunyawi chémpiyon boldi. Mesilen portugaliye 16 - esirde, 18 - 19 - esirlerde gollandiye, en'gliye, 20 - esirde bolsa amérika chémpiyon boldi. Emdi 21 - esirde xitay dunyawi chémpiyon bolup amérikining ornini alidu," dep yézilghan.

Bizning bu heqtiki ziyaritimizni qobul qilghan xitay ishliri mutexessisi dotsént doktor erkin ekrem ependi bolsa xitayning bundaq geplirining ré'alliqqa uyghun emeslikini éytti.

Mezkur maqalide déyilishiche, kitabning aptori lyumingfo a b s xewerlirige yazghan xétide, "amérikiliqlarning xitaydin chöchüshining kériki yoq. Bizning amérika bilen bolghan stratégiyilik riqabitimiz insaniyet tarixidiki eng medeniyetlik bir riqabet bolidu, biz amérika bilen herbiy hazirliqlar musabiqisige chüshmeymiz," dégen. Emma maqalining aptori chito romana maqaliside gerche xitay aptor xétide bundaq dégen bolsimu, emeliyette uning yazghan kitabida, "amérika bilen urush chiqip qalghan teqdirde amérikigha yéngilip qalmasliq üchün xitayning tapqan puligha herbiy eslihelirini küchlendürüp, amérika bilen teng barawer haletke kélishi kérek," dep yazghanliqini bayan qilidu.

Maqalide körsitilishiche, bu kitab heqqide öz köz qarishini bayan qilghan xitayning xelq uniwérsitétining proféssori jin kenrong bu kitabta otturigha qoyulghan köz qarashlarning peqetla aptorning özige xasliqi, uning hergizmu xitay armiyisining we xitay lidérlirining köz qarishi emeslikini eskertken. U yene xitay lidérlirining yenila déngshyawpinggha oxshash ichki siyasetke köprek merkezlishishtek siyasetni yürgüzüwatqanliqini bayan qilghan.

Stratégiye mutexessisi erkin ekrem ependi bolsa xitayda kéyinki waqitlarda "özini bilelmeydighan" mushundaq yazghuchi, tetqiqatchilarning chiqip qalghanliqi, emeliyette amérika bilen toqunushning xitayning özi üchün téximu zor ziyan élip kélidighanliqini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet