Amérika tashqi ishlar ministirliqi xitay hökümiti élan qilghan "amérikining kishilik hoquqi doklati" gha inkas qayturdi

• Muxbirimiz jümening bu heqtiki toluq melumati
• Download story audio

Bügün yeni 13 - mart peyshenbe küni xitay hökümiti axbarat ishxanisi amérika tashqi ishlar ministirliqi élan qilghan dunyadiki döletlerning 2007 - yildiki kishilik hoquq xatirisi heqqidiki doklatqa inkas qayturush teriqiside "amérikining 2007 - yilidiki kishilik hoquq xatirisi "ni élan qilip, amérikining kishilik hoquq xatirisining weyrane we ademni chöchütidighan derijide nachar ikenlikini körsetti.

"Xelq'ara jem'iyet xitayning kishilik hoquq xatirisige a'it matériyallargha tosqunsiz érishküsi"

Xitay hökümiti élan qilghan amérikining kishilik hoquq doklatigha inkas qayturghan amérika tashqi ishlar ministirliqi axbarat xadimi, xitay hökümitining amérikining kishilik hoquq xatirisi üstide élan qilip kéliwatqan doklatliri ezeldin amérikining edliye ministirliqi, nyuyork waqit géziti we bashqa teshkilatlarning tor betliride élan qilin'ghan ashkara matériyallargha asasen teyyarlan'ghanliqini bildürdi we " shuni ümid qilimizki, künlerdin bir küni xelq'ara jem'iyet xitayning kishilik hoquq xatirisige a'it matériyallargha tosqunsiz érishküsi" dédi.

" Amérikida ashkara we démokratik sistéma qilmishlarni özlükidin tüzitish méxanizimidur "

Xitay élan qilghan doklatta amérikida jinayet ötküzüsh nisbitining ösüwatqanliqi amérika xelqining hayati we jismaniy bixeterlikige éghir tehdit sélip turuwatqanliqi hemde amérikida jinsi we irqiy kemsitish mewjud ikenliki körsitilgen bolup xitayning bu xil eyibleshlirige inkas qayturghan amérika tash ishlar ministirliqi axbarat xadimi: " kishilik hoquq mesiliside dunyada héchqandaq dölet nuqsansiz emes, bu amérikinimu öz ichige alidu. Lékin bizning ashkara we démokratik sistémimiz shundaq qilmishlarni özlükidin tüzitish méxanizmi bilen teminleydu" dédi

U yene, amérikida hökümetsiz teshkilatlar, erkin axbarat, hökümet apparatliri we qanunning shundaq méxanizmini ilgiri süridighanliqini qoshumche qildi.

" Amérika élan qilghan doklattiki sanliq melumatlarda shek yoq "

Bügün xitay tash ishlar ministirliqi bayanatchisi chin gang bayan bérip amérikining kishilik hoquq mesililiride ikki xil ölchem pozitsiyiside boluwatqanliqini we bashqa döletlerning ichki ishigha qopalliq bilen arilashmasliqi kéreklikini bildürdi we xitayning kishilik hoquq xatirisining xelq'ara jem'iyet teripidin étirap qilin'ghanliqini körsetti we amérikining bu doklatida bérilgen xitayning kishilik hoquq xatirisi heqqidiki melumatlarning asassiz ikenlikini bildürgen idi.

Bu heqte inkas qayturghan amérika tashqi ishlar ministirliqi axbarat xadimi bu doklattiki sanliq melumatlarda shek yoq ikenlikini bildürdi. "Doklatimiz bu nersilerge özi jawab béreleydu"

" Uyghur élide siyasiy jinayetchilerni éghir jazagha tartish qilmishliri yene mewjud "

Gerche amérika hökümiti 11 - mart élan qilghan kishilik hoquq doklatida xitayni dunyadiki kishilik hoquqni eng éghir depsende qiliwatqan döletler tizimlikidin élip tashlighan bolsimu, emma xitayning 2007 - yilliq kishilik hoquq xatiriside héchqandaq yüksilish bolmighanliqini hemde xitayning yazghuchi - muxbirlarni teqib astigha élish, söz, pikir we diniy erkinlikni boghush, intérnét alaqisini chekleshke oxshash kishilik hoquqni depsende qilidighan qilishlar bilen shughullinip kelgenlikini pash qilghan hemde mezkur doklatning béshidila xitayda 2007 - yili jeryanida Uyghur rayoni we tibet qatarliq rayonlarda diniy étiqad erkinlikining téximu qattiq iskenjige élin'ghanliqi körsitilgen hemde xitayni mustebit diktator dölet dep élan qilghan shuningdek Uyghur élide siyasiy jinayetchilerni éghir jazagha tartish qatarliq qilmishlarning yene mewjud bolup turuwatqanliqi otturigha qoyulghan idi.

Kishilik hoquq teshkilatliri bolsa amérikining xitayni kishilik hoquqni eng éghir depsende qiliwatqan döletler tizimlikidin chiqiriwetkenlikidin epsuslinidighanliqini bildürüshti. (Jüme)