Коммунист әмәлдарлар мүлүлкирини чәтәлләргә йөткиши

Чәтәлләрдики көчмән хитай мүлүкдарлириниң зор бир қисминиң, хитайдики коммунист әмәлдарларниң пәрзәнтлири һәм уруқ - туғқанлири икәнлики, чәтәлләрдики хитай демократлири тор бекәтлиридики асаслиқ муназирә темилириниң бири иди.
Мухбиримиз меһрибан
2012-04-27
Елхәт
Пикир
Share
Принт

Йеқинқи бирқанчә йилдин буян бу әһвалниң хитайдики аммиви тор бекәтлириниңму асаси муназирә темисиға айлиниши, нөвәттә хитай коммунист һөкүмитиниң өз һакимийитигә болған әнсиришини техиму күчәйтмәктә.

Хитайниң сода - санаәт банкисиниң 2011 - йил 4 - айдики статистикисидин мәлум болушичә, хитайда шәхси мүлки 10 милйон хәлқ пулиға игә мүлүкдарлар, 2011 - йилиға кәлгәндә 960 миңға йетип улар хитай пуқралириниң 5%ни игилигән. Әмма уларниң ичидә тәхминән 60%ниң чәтәлдә олтурақлишип болғанлар яки мәбләғ селиш йоли билән чәтәлләргә чиқиш рәсмийитини өтәватқанлар икәнлики мәлум болған.

Канададики йеңи таң теливизийисиниң хәвиридин мәлум болушичә, мәбләғ селиш йоли һәм пәрзәнтлирини чәтәл университитлирида оқутуш йоли арқилиқ ғәрб дөләтлиригә көчмән болуп олтурақлашқан хитай мүлүкдарлириниң тәхминән 50% хитайниң юқири һәм оттура дәриҗилик әмәлдарлири икәнлики мәлум болған.

Хитай вәзийитини көзәткүчи сияси анализчилардин америкидики елшат һәсән әпәнди бу әһвал һәққидә тохтилип, хитай мүлүкдарлириниң чәтәлдә олтурақлишиши һәм мәблиғини чәтәлләргә йөткишигә алди билән уларниң өз мал - мүлки һәм һаятиниң бихәтәрликидин әнсириши сәвәб болуватқанлиқини илгири сүрди.

Хитай һөкүмәт мәтбуатлириниң йеқинқи бирнәччә йилдин буян елан қилған хәвәрлиридин мәлум болушичә, йеқинқи йиллардин буян бир түркүм хитай парихор әмәлдарлири зор бир түркүм мәбләғни һәр хил намларда чәтәл банкилириға йөткәп болған һәм шу дөләтләрдики қануний йочуқлардин пайдилинип, шу дөләтләрдә олтурақлишиш пурситигә игә болған.

Елшат әпәнди өз баянида, ғәрб демократик дөләтлирини үзлүксиз әйибләп келиватқан хитай һөкүмәт әмәлдарлириниңму мал - мүлкини чәтәлгә йөткәп, пәрзәнтлири һәм уруқ - туғқанлирини чәтәл пуқраси қилишидики сәвәб һәққидә тохтилип, бу әһвалниң әшу хил түзүмниң иҗрачилири болған хитай коммунист әмәлдарлириниңму коммунист һакимийәтниң мәвҗүт болуп туралишиға ишәнчи йоқлуқиниң ипадиси икәнликини тәкитлиди.

Хитайдики «тешө тор бекити»дәп атилидиған аммиви тор бекитидә елан қилинған «хитайда җинайити паш болған алдинқи 50 нәпәр парихор әмәлдар» намлиқ мақалидә, тилға елинған парихор әмәлдарларниң, чәтәлгә йөткигән мәблиғиниң әң көпи 483$ милйон долларға йәткән болса, әң азлириму 6 милйон доллардин ашқан.

Хитайниң үрүмчидики қанунчилиқ гезитидики хәвәрдин мәлум болушичә,1999 - йилдин 2009 - йилға қәдәр хитай һөкүмәт әмәлдарлириниң чәтәлгә йөткигән мүлки 800 милярд йүән хәлқ пулиға йәткән.

Бу йил 2 - ай һәм 3 - айларда йүз бәргән чуңчиң сақчи идариси башлиқи ваң лиҗүнниң америка консулханисидин ярдәм тәләп қилиш вәқәси һәм чуңчиң шәһәр башлиқи бо шиләйни вәзиписидин елип ташлаш вәқәлиридин кейин, хитай һөкүмәт мәтбуатлирида, хитай баш министири вен җябавниң хитайда сияси җәһәттинму түзәш ислаһат елип баридиғанлиқини билдүрүп, қануний бәлгилимиләр бойичә парихорлуқ чирикликкә зәрбә берилидииғанлиқини, әмәлдарларниң алаһидә болувелишиға йол қоюлмайдиғабнлиқини җакарлиғанлиқи елан қилинди.

Елшат әпәнди ваң лиҗүн, бо шиләй вәқәлири һәм хитай баш министири вен җябавниң ислаһат чақириқлири һәққидә тохтилип, нөвәттики парихорлуқ чириклик әвҗ алған хитай коммунист һөкүмитини вен җябав қатарлиқлар тәшәббус қиливатқан ислаһат йолиниң қутқузуп қалалмайдиғанлиқини тәкитлиди. Елшат әпәнди йәнә пәқәт бу хил сестимини ағдуруп ташлап хитайда өктичи партийиләр өз - ара назарәт қилалайдиған демократик түзүм орнитилғинидила андин хитайдики бу хил чириклик һәм парихорлуқ қилмишлирини азайтқили болидиғанлиқини билдүрди.

Пикирләр (0)
Share
Толуқ бәт