Әрздарлар : икки йиғин хәлқ мәнпәәти үчүн әмәс, хәлқни зулум чәктүрүш үчүн ечилиду


2008.03.03

Илгири хитайниң шаңхәй шәһиридә сақчи болған җаң бавляңниң әһвали һазир интайин хәтәрлик болуп, у һазир шаңхәй путо райони җамаәт хәвпсизлик идарисиниң дөләт мәхпийәтликини сақлаш башқармиси сақчилири тәрипидин назарәт астиға елинған. Нөвәттә сақчилар униң ойиниң әтрапида униң һәрикитини 24 саәт тохтимай көзәтмәктә. Сақчилар униң өйини қоршавға еливелипла қалмай, бинадин арқан саңгилитип, униң 15 ‏- қәвәттики өйиниң деризисидин өйниң ичини көзәтмәктә икән.

Истансимизға бу һәқтә мәлумат бәргән, җуңхуа шенҗең тор бетиниң башқурғучиси, җаң бавляңниң қоршавға елиниш сәвәбини, униң шаңхәй җамаәт хәвпсизлик идарисиниң сабиқ башлиқи ву җимиңниң чирикликкә четилидиған мәсилисини ашкарилиғанлиқи түпәйли, һөкүмәт даирилириниң зиянкәшликигә учраватқанлиқини, шуңа униң қолға елинишидин қечип, бу йил 1 ‏- айда аниси билән бирликтә шәндуңға қечип берип йошурунувалғанлиқини билдүрди.

Җаң бавляңниң йеқин бир достиниң истансимизға билдүрүшичә, униң аниси қаттиқ кесәл болуп қалғанлиқтин, у 2 ‏- айниң 5 ‏- күни анисини елип шаңхәйгә қайтип келишкә мәҗбур болған вә анисини дохтурханиға орунлаштуруп қоюп, туққининиң өйидә бир муддәт турған. 27 ‏- Феврал күни, у оғрилиқчә өйигә қайтип кәлгән, 28 ‏- феврал күни чүштин бурун, дөләт мәхпийәтликини сақлаш идариси униң өйигә қайтип кәлгәнликидин хәвәрдар болуп, 8 сақчини аҗритип, өйниң әтрапини қоршавға алған вә өйгә бастуруп кирип қолға елишқа урунғанда,җуңхуа шенҗең тор бетиниң башқурғучиси, җамаәт хәвпсизлик министирлиқи вә шаңхәй шәһәрлик хәлқ қурултийи билән алақилишиш арқилиқ уни қолға елиштин сақлап қалған.

Өйгә қамилип қалған җаң бавляң истансимизға телефун уруп ": һазир өйниң әтрапида сақчи аптомобили вә сақчилар мени көзитип туруватиду. Улар буйруқ күтүп турған болуши мумкин, улар мениң сиртқа чиқишимни күтүп туруватиду. Лекин уларниң зади қандақ мәқсиди бар ? мән буни ениқ билмәймән" деди.

Икки йиғин һарписида, шаңхәй сақчи даирилири зор көләмдә тутуш, бастуруш вә түрмигә ташлаш һәрикитини қозғиған болуп, назарәт астиға елинған бир әрздар мундақ дәйду": һазир бизниң һәрикитимизни9 киши мәхсус көзитиватиду, 26 ‏- феврал күни улар бизни туруватқан райондин мәҗбурий һалда аптомобилға бесип, һазирқи җайға йөткәп елип кәлди, қаршилиқ билдүргәнләр болса, башқа аптомобилда елип кетилди, мениңчә улар чоқум түрмигә ташланған болуши мумкин ."

Әрздарларниң ейтишичә, наразилиқ билдүргүчи деһқанларниң бир қисми бейҗиңға қечип кәткән, әмма бейҗиңдики вәзийәт шаңхәйгә қариғанда техиму еғир болуп, һәтта өйлиригиму қайтип баралмиған, из - дерәксиз йоқап кәткән әрзадарларниң сани интайин көп икән, бир қисим кишиләр улар сақчиларниң зиянкәшликигә учриған болуши мумкин дейишсә, йәнә бир қисим кишиләр әрздарларниң һаят қалғанлиқидин гуман қилидикән.

Җаң исимлик бир әрздар": бейҗиңдики әрздарлар шәһәр сиртида мөкүп йетип пурсәт күтиветипту, улар бир мәзгил сүкүттә туруп сақчиларға, әрздарлар тарқап кетипту дегән туйғуни берип, андин бирақла шәһәр мәркизигә бастуруп кириш пиланини түзүватиду, бирақ вәзийәт наһайити җиддий, уларниң ақивитидин қаттиқ әндишә қиливатимиз," деди. (Әқидә‏)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.