Erzdarlar : ikki yighin xelq menpe'eti üchün emes, xelqni zulum chektürüsh üchün échilidu

• Muxbirimiz eqidening bu heqtiki toluq melumati
• Download story audio

Ilgiri xitayning shangxey shehiride saqchi bolghan jang bawlyangning ehwali hazir intayin xeterlik bolup, u hazir shangxey puto rayoni jama'et xewpsizlik idarisining dölet mexpiyetlikini saqlash bashqarmisi saqchiliri teripidin nazaret astigha élin'ghan. Nöwette saqchilar uning oyining etrapida uning herikitini 24 sa'et toxtimay közetmekte. Saqchilar uning öyini qorshawgha éliwélipla qalmay, binadin arqan sanggilitip, uning 15 ‏- qewettiki öyining dérizisidin öyning ichini közetmekte iken.

Istansimizgha bu heqte melumat bergen, jungxu'a shénjéng tor bétining bashqurghuchisi, jang bawlyangning qorshawgha élinish sewebini, uning shangxey jama'et xewpsizlik idarisining sabiq bashliqi wu jimingning chiriklikke chétilidighan mesilisini ashkarilighanliqi tüpeyli, hökümet da'irilirining ziyankeshlikige uchrawatqanliqini, shunga uning qolgha élinishidin qéchip, bu yil 1 ‏- ayda anisi bilen birlikte shendunggha qéchip bérip yoshurunuwalghanliqini bildürdi.

Jang bawlyangning yéqin bir dostining istansimizgha bildürüshiche, uning anisi qattiq késel bolup qalghanliqtin, u 2 ‏- ayning 5 ‏- küni anisini élip shangxeyge qaytip kélishke mejbur bolghan we anisini doxturxanigha orunlashturup qoyup, tuqqinining öyide bir muddet turghan. 27 ‏- Féwral küni, u oghriliqche öyige qaytip kelgen, 28 ‏- féwral küni chüshtin burun, dölet mexpiyetlikini saqlash idarisi uning öyige qaytip kelgenlikidin xewerdar bolup, 8 saqchini ajritip, öyning etrapini qorshawgha alghan we öyge basturup kirip qolgha élishqa urun'ghanda,jungxu'a shénjéng tor bétining bashqurghuchisi, jama'et xewpsizlik ministirliqi we shangxey sheherlik xelq qurultiyi bilen alaqilishish arqiliq uni qolgha élishtin saqlap qalghan.

Öyge qamilip qalghan jang bawlyang istansimizgha téléfun urup ": hazir öyning etrapida saqchi aptomobili we saqchilar méni közitip turuwatidu. Ular buyruq kütüp turghan bolushi mumkin, ular méning sirtqa chiqishimni kütüp turuwatidu. Lékin ularning zadi qandaq meqsidi bar ? men buni éniq bilmeymen" dédi.

Ikki yighin harpisida, shangxey saqchi da'iriliri zor kölemde tutush, basturush we türmige tashlash herikitini qozghighan bolup, nazaret astigha élin'ghan bir erzdar mundaq deydu": hazir bizning herikitimizni9 kishi mexsus közitiwatidu, 26 ‏- féwral küni ular bizni turuwatqan rayondin mejburiy halda aptomobilgha bésip, hazirqi jaygha yötkep élip keldi, qarshiliq bildürgenler bolsa, bashqa aptomobilda élip kétildi, méningche ular choqum türmige tashlan'ghan bolushi mumkin ."

Erzdarlarning éytishiche, naraziliq bildürgüchi déhqanlarning bir qismi béyjinggha qéchip ketken, emma béyjingdiki weziyet shangxeyge qarighanda téximu éghir bolup, hetta öylirigimu qaytip baralmighan, iz - déreksiz yoqap ketken erzadarlarning sani intayin köp iken, bir qisim kishiler ular saqchilarning ziyankeshlikige uchrighan bolushi mumkin déyishse, yene bir qisim kishiler erzdarlarning hayat qalghanliqidin guman qilidiken.

Jang isimlik bir erzdar": béyjingdiki erzdarlar sheher sirtida möküp yétip purset kütiwétiptu, ular bir mezgil sükütte turup saqchilargha, erzdarlar tarqap kétiptu dégen tuyghuni bérip, andin biraqla sheher merkizige basturup kirish pilanini tüzüwatidu, biraq weziyet nahayiti jiddiy, ularning aqiwitidin qattiq endishe qiliwatimiz," dédi. (Eqide‏)