Amérika dölet mudapi'e ministirliqi xitayning herbiy tereqqiyati toghrisida doklat élan qildi


2005-07-20
Share
21-Iyun küni xitay azadliq armiyisi bir qarshi élish murasimida. AFP

Amérika dölet mudapi'e ministirliqi seyshenbe küni élan qilghan xitayning herbiy tereqqiyati toghrisidiki yilliq doklatida, xitayning " istratégiyilik burulush nuqtisi" da turiwatqanliqini bildürdi. Besh burjeklik binaning doklatida tekitlishiche, xitay herbiy qisimlirini kücheytish we herbiy zamaniwilashturush qedimini jiddi tizletmektiken.

Dölet mudapi'e ministirliqining doklati amérika dölet mejlisining telipi boyiche teyyarlan'ghan. Biraq doklat birqanche hepte kéchiktürülgendin kéyin élan qilindi.

Xitay herbiy zamaniwilashturushni mexpiy we jiddi élip bériwatidu

Amérika dölet mudapi'e ministirliqining doklatida tekitlishiche, xitayning jiddi we köp tereplimilik, mexpiy türde élip bériliwatqan herbiy zamaniwilashturush pilani déngiz, hawa, bashqurulidighan bomba we alem boshluqi sistémisini özgertish we yéngilash shundaqla quruqluq armiyisini özgertip teshkillesh arqiliq uni téximu zor qirghinchilik iqtidarigha we téxnika küchige ige qilishni üz ichige alidiken.

Doklatta eskertishiche, xitaylar amérika armiyisi we ittipaqdash küchlerning iraqtiki herbiy herikiti shundaqla yuguslawiyige hujum qilish jeryanidiki tejribe - sawaqlirini yekünlep, özining herbiy pilanigha tüzitish kirgüzgen we reqibining yoshurun ajizliqini tépip chiqqan.

Doklatta, xitayning herbiy zamaniwilashturush pilani bezi döletlerde tetqiqat basquchidiki eng zamaniwi qorallarni yasash boyiche, bösüsh xaraktérlik ilgirleshke érishish yolida kétiwatqanliqini ilgiri sürgen. Xitay bu jeryanda herbiy sün'iy hemrah, sün'iy hemrahgha qarshi qorallar shundaqla reqibining éléktronluq ménge we alaqe séstimisini palach halgha chüshürüp qoyush iqtidarini östürgen.

Doklatta tekitlishiche, bu ehwal asiyada herbiy küchler tengpungliqidiki özgürüshni keltürüp chiqirip, amérika we zamaniwi herbiy küchke ige döletlerning rayondiki herikitige yoshurun tehdit peyda qilmaqtiken. Biraq doklatta, xitayning asiya sirtidiki rayonlarda herbiy heriket élip bérish iqtidari yenila cheklik, dep körsetti.

Teywen - herbiy zamaniwilashturush pilanining asasi halqisidur

Amérika dölet mudapi'e ministirliqi doklatida, xitay herbiy tereqqiyat pilanining asasi halqisi teywen, dep körsetti.

Doklatta tekitlishiche, béyjing da'iriliri teywen musteqilliqini tosashni qarar qilghan bolup, teywen boghuzigha ilghar tiptiki yéngi herbiy qorallar sistémisini orunlashturghan. Bu qorallar zor miqdardiki qisqa we uzun musapiliq bashqurulidighan bombilarni öz ichige alidiken.

Amérika dölet mudapi'e ministiri donald ramsfild, seyshenbe küni dölet mudapi'e ministirliqining xitay toghrisidiki doklati heqqide toxtilip, xitaylarning qandaq tehditlerni élip kélidighanliqiqa éniqlima bérishni ret qildi. Emma u, muxbirlargha bu su'alning jawabi besh burjeklik binaning doklatida tépilidighanliqini bildürgen. Ramsfild " doklat bu döletning heriket usuli shundaqla uning herbiy sélinma we herbiy eslihelerni sétiwélish yolida chiqarghan qararlirini etrapliq we inchiklik bilen chüshendürgen," dédi.

Pakitlar imbargoni bikar qilishqa qarshi turushning toghriliqini ispatlidi

Amérika dölet mudapi'e ministirliqining doklatida tekitlishiche, xitayning herbiy küchini tereqqi qildurush pilani asasliqi chet'eldin sétiwalghan qoral - yaraq we téxnikigha tayanmaqtiken.

Doklatta, rusiye xitayni qoral - yaraq bilen teminlewatqan asasliq dölet, dep eskertti. Emma shuning bilen birge isra'iliyining xitaygha bezi hel qilghuch téxnikilarni, yawropa we amérikining xitaygha herbiy esliheler sétiwatqanliqini tekitligen. Ramsfildning eskertishiche, doklat amérikining yawropa ittipaqi xitaygha yürgüzgen imbargoni bikar qilishqa qarshi chiqishtiki seweplirini pakitlar bilen otturigha qoyghan. ) Ramsfild - 2 ( u, " doklatta prézidént bush we hökümetning yawropa ittipaqini xitaygha yürgüzgen imbargoni bikar qilmasliqqa chaqirishtiki sewepliri éniq otturigha qoyulghan," dep körsetti. Doklatta tekitlishiche, xitay herbiy küchining tereqqiyati xitay rehberlirining teywen'ge we yaki bashqilargha herbiy küch bilen qarshi turush ishenchisini kücheytish bilen birge, béyjing da'irilirining weziyet üstidin xata höküm chiqirip, " omumi yüzlik toqunushpeyda qilish" mümkinchiliki bar'iken.

Amérika xitayning herbiy tereqqiyatidiki nurghun tepsilatlarni bilmeydu

Amérika dölet mudapi'e ministirliqining doklatida ashkarilishiche, amérika xitay herbiy tereqqiyatining omumi ehwalini bilsimu, emma herbiy tereqqiyatning nurghun tepsilatliridin xewersiz bolup, xitayning bir qanche türlük yéngi herbiy yaraqlar sistémisi toghrisida héchqandaq uchurgha ige emesken.

Doklatta tekitlishiche, amérika hazirgha qeder xitayning yildin - yilgha köpiyiwatqan herbiy xam choti toghrisida éniq sanliq melumatqa ige bolalmighan. Doklatta perez qilishiche, xitayning yilliq dölet mudapi'e xam choti 90 milyard dollar bolup, bu san xitay hökümiti élan qilghan resmi reqemdin 3 hesse köp. Eger amérikining perizi toghra bolsa, u halda xitayning yilliq herbiy xam choti amérika bilen rusiyidin kéyin dunya boyiche 3 orunni igiligen bolidu.

Doklatta xitay iqtisadining tereqqiyati uning herbiy küchining tereqqiyatigha türtke boliwatqanliqini ilgiri sürgen.

Teywenning hujumgha qarshi mudapi'e tedbiri élish zörüriyiti bar

Amérika dölet mudapi'e ministirliqining doklatida, teywenni xitay chong quruqluqi teripidin " tiz püktürülüsh" ke qarshi mudapi'e tedbiri élish zörürliki toghrisida agahlandurdi.

Doklatta tekitlishiche, yéqinqi 10 yildin béri teywenning dölet mudapi'e xam choti izchil aziyip mangghan. Gerche teywen amérikining qollishi astida bezi sahelerdiki üstünlikini saqlap qélishqa tirishqan bolsimu, biraq xitayning herbiy jehettiki tereqqiyati teywenning tirishchanliqidini bésip chüshken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet