Xitayning ikki chong yighin daghdughisi we jem'iyettiki inkaslar

Xitay hazir béyjingda her yili bir qétim échilidighan ikki chong yighin échilish aldida turghanda, bu ikki chong yighinni jiddiy közitiwatqan shinxu'a agéntliqi we bashqa uchur wastiliri xitay jem'iyitidiki inkaslarni we yéngi awazlarni xewer qilishqa bashlidi.
Muxbirimiz weli
2010-03-02
Share
Xitay-sachqiliri-Tiananmen-meydanida-tekshurush-qiliwatidu-305.jpg Xitay béyjingda her yili bir qétim échilidighan ikki chong yighin échilish aldida, béyjingda bolupmu tyenenmén meydani etrapida charlashni kücheytken bolup, sürette, 2010 - yili 2 - mart küni, xitay saqchiliri tyenenmén meydanida puqralarni tekshüriwatqan körünüsh.
AFP Photo

Xitayning shinxu'a agéntliqining in'glizche xewerliride éytilishiche, béyjingda yilda bir qétim échilidighan ikki chong yighin (memliketlik xelq qurultiyi bilen memliketlik siyasi kéngeshning yighini) jüme küni bashlinidu. Emma bu yighin'gha qatnishidighan 'wekiller' bügündin bashlapla béyjinggha yétip kélishke bashlighan.

Xitay hazir ikki chong yighin üchün chong daghdugha peyda qiliwatqanda, bu ikki chong yighinni jiddiy közitiwatqan shinxu'a agéntliqi we xelq'aradiki bashqa uchur wastiliri xitay jem'iyitidiki inkaslarni we yéngi awazlarni xewer qilishqa bashlidi.

5‏ -, 11‏ -, 12‏ - mart künliride, ikki chong yighin bilen jem'iyet otturisida keng da'irilik intérnét di'alogi élip bérilidiken

Shinxu'a agéntliqining bayan qilishiche, ikki chong yighinda 5‏ -, 11‏ -, 12‏ - mart künliri, ikki chong yighin bilen jem'iyet otturisida keng da'irilik intérnét di'alogi élip bérilidiken. Bu di'alogda sehiye ministirliqi, aliy sot we prokurator xadimliri xelqtin biwaste sözliship pikir alidiken.

Xitay puqralirini sheher nopusi, yéza nopusi dep ayrip mu'amile qilish asasiy qanun'gha xilap

Xitaydiki 'yünnen xewerliri', 'jenubiy sheher géziti', 'chong derya géziti' qatarliq 13 yerlik gézit ikki chong yighin wekilliri ichidiki bir qisim emeldarlarning, xitayda nopus tüzümini islah qilishni teshebbus qiliwatqanliqini xewer qilishqa bashlidi.

Xewerde éytilishiche, 11 ölkining bir qisim wekilliri birliship otturigha qoyghan bu teshebbuslar, xitay puqralirini sheher nopusi we yéza nopusi dep ayrip mu'amile qilish asasiy qanun'gha xilap dep körsitilgen we her saheni birdek heriketke kélip, xitayda kona nopus tüzümini emeldin qaldurushqa chaqirghan.

Sheherlikler bilen yéziliqlarning otturisida iqtisadiy perq hazir xitayda toraqsizliq peyda qiliwatqan asasliq mesile

B b s ning bayan qilishiche, xitay statistika idarisi élan qilghan sanliq melumatlargha qarighanda, xitayda 2009‏ - yili sheherliklerning iqtisadiy kirimi kishi béshigha ottura hésab bilen 17 ming 175 yüendin toghra kelgen. Yéziliqlarning iqtisadiy kirimi kishi béshigha ottura hésab bilen 5 ming 153 yüendin toghra kelgen. Bu, xitayda 1978‏ - yili iqtisadiy islahat élip bérilishqa bashlighandin kéyin, sheherlikler bilen yéziliqlar otturisida iqtisadiy perq eng chong bolghan yil bolup hésablinidu. Xewerde éytilishiche, bu, hazir xitayda toraqsizliq peyda qilmaqta.

Xitayda kommunist partiye namini özgertishi kérek

Amérika awazining bayan qilishiche, amérikidiki kelgüsishunas tetqiqatchi john naysbit ependi 'xitayda kommunist partiye namini özgertishi kérek, shundaq qilghanda andin dunya xitayni tehdit dep qarimaydu ' dep körsetken.

U teshebbusida, xitay ötken esirning 60‏ - yillirida intayin qalaq idi, déng shawping 80‏ - yillarda islahat bashlap, aldi bilen xitaydiki kommunizmni kapitalizimgha özgertip, iqtisadni tereqqi qildurdi. Xitaydiki hazirqi bu tereqqiyat kommunzimdin kelmigen, emma hakimiyet yenila kommunist hakimiyiti. Eger kommunist partiye emdi xitaydiki bu tereqqiyat bilen qarshilashmaymen dése, dunyagha tehdit bolush niyiti bolmisa, namini özgertishi kérek dep körsetken.

Ju yüngkangning sözi dunyani aldash, xitay köchmenlirige ilham bérishni meqset qilidu

Buningdin burun 'yéqinda shinjang xizmet yighini échilidu' dep xewer qilghan shinxu'a agéntliqi bügün yene 'shinjang mesilisi' ni alahide orun'gha qoyup, xitayning siyasiy qanun emeldari ju yüngkangning, 1 - mart küni xelqtin hal sorash dégen nam bilen ürümchi qeshqer, shixenzilerge bérip qoralliq saqchi qisimliridin hal sorap 'shinjanggha tarixtiki eng chong tereqqiyat we eng chong échiwétish pursiti kélidu, buninggha toluq teyyarliq körüsh kérek' dégenlikini gewdilendürdi.

Dunya Uyghur qurultiyining bayanatchisi dilshat rishitning qarishiche, ju yüngkangning' shinjanggha eng chong tereqqiyat we échiwétish pursiti kélidu' dégini dunyani aldash, xitay köchmenlirige ilham bérish we Uyghurlarni téximu qattiq basturushni meqset qilidu.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet