Gérmaniye teshwiqat wasitilirida xitaylarning medeniyetsizliki


2007-12-13
Share

2008 - Yilliq béyjing olimpik musabiqisi munasiwiti bilen xitay hökümiti béyjing sheher ahalisigha qarita medeniyetlik bolush teshwiqatini qanat yaydurghan. "Olimpikni kütüwélish, medeniyetlik bolush, yéngi istil tiklesh" shu'ari astida qanat yayduriliwatqan bu heriket chet'ellik közetküchilerning diqqitini jelip qilghan.

Xitay aldi bilen özini islah qilishi kérek

Gérmaniye dolqunliri radi'osining 12 - ayning 12 - künidiki "xalighanche tükürüsh -- alahide tenheriket" namliq xewiride, xitaydiki eng medeniyetlik sheher ahalisi hésablan'ghan béyjingliqlarning xalighan chaghda gélini qattiq qirip, xalighan yerge tüküridighan set adetliri üstide uzun toxtalghan. Bezi gérmaniyilikler bu heqtiki köz qarashlirini otturigha qoyup ötken. Mezkur radi'oning buninggha munasiwetlik yene bir xewirige "junggoluqlar chayni köp ichidu, topliship tamaq yeydu, barmaqlirini uridu," dep mawzu qoyulghan bolup, buningda xitay puqralirining kishini yirgendüridighan qiliqsizliqliri bayan qilin'ghan.

Bash shitabi bérlindiki "bixeterlik we közitish merkizi" ning xizmetchi xadimi dameni ependi, xitay sayahetchilirining medeniyetsizliki heqqide toxtulup mundaq dédi: " xitay sheher qiyapitini özgertishtin ilgiri, özining nachar illetlirini özgertishi kérek. Sana'itini tereqqiy qildurushtin awal, ang - sewiyisini tereqqi qildurushi lazim. Biz xitayning tereqqi qilghan - qilmighanliqigha baha bérishte béyjing, shangxeylerdiki heshemetlik binalargha, xitay dölitining yilliq ékisport sommisigha emes, belki ademlirining medeniyet sewiyisige qaraymiz. Halbuki, bizning bügün köriwatqanlirimiz kommunistik ang, heqsizliq we medeniyetsizliktin ibaret" dédi hemde bügün gérmaniyige sayahetke kéliwatqan xitaylarning qalaqliqidin ularning zadi qanchilik tereqqi qilghanliqini körüwélishqa bolidighanliqini eskertti.

Xitayning illetliri

"Xalighanche tükürüsh -- alahide tenheriket" namliq xewerde yézilishiche, xalighan yerge tükürüsh junggoluqlarning esirlerdin buyan dawam qilip kelgen nachar adetlerning biri bolup, bu adetni özgertish üchün béyjing da'iriliri uzun yillardin buyan jerimane élish usulini qollinipmu ünüm qazinalmighan. Hazirghiche xitayda xalighan yerge tükürüsh we mishqirish adetliri dawam qilip kelmekte. Déng shawpingningmu da'im gélini qirip tüküridighan aditi bar iken. U chet'ellik méhmanlar bilen körüshkende tükürük qachisi kötürüp yürüshke mejbur bolghan. Jaw ziyangning burnini kolawatqan resimi metbu'atlarda uzun'ghiche teshwiq qilin'ghan idi.

Xewerde yézilishiche, xitaylarning waqitqa ri'aye qilmasliq we wedige wapa qilmasliq aditi gérmanlarni bizar qilghan. Kölinn shehiridiki bir sayahet shirkiti xadimining bildürishiche, gérmaniyige sayahetke kélidighan xitaylar bezide dégen qereldin baldur kéliwalsa, bezide heptilep kéchikip kélidiken. Bezide hetta qoshna ellerge kétip qilip, özlirini élip kétishni telep qilidiken. Sayahet pilanlirida da'im özgirish bolup turidiken. Bu hal gérmaniye sayahet shirketlirining normal xizmet kün tertipige ziyan yetküzgen we xitay sayahetchiliridin seskinish keypiyatlirini peyda qilghan.

Frankforttiki bir gérman ashxana xojayinining bildürüshiche, eger xitay sayahetchiliri gérman ashxanisigha tamaqqa kirse, bu ashxanida bir qalaymiqanchiliq peyda bolidiken. Ashxana xadimliri aldi bilen derhal yéterlik derijide chay hazirlap qoyushi kérekken. Xitaylar chayni tamaqtin köp istimal qilidiken. Xitaylar ashxanigha birla waqitta topliship kiridiken we bir kishiliktin ayrim tamaq yémey, opchi kirishme tamaq buyrutup, ashxana xadimlirini bi'aram qilidiken. Tamaq waqtida ünlük sözliship, bashqa xéridarlarni bizar qilidiken. Dastixanda edep saqlashni bilmeydiken. Yawropaliqlargha nisbeten xitaylarning tekebburane halda körsetküch barmiqi bilen üstelni chékip turup, kütküchini chaqirish aditi eng set adetlerning biri bolup, fransuzlar bu usulni peqet itlarghila qollinidiken. Bir xitay sayahetchisi mushundaq qilip, bir fransuz kütküchidin dekkisini yigen.

Xewerde bayan qilinishiche, gérmaniyige soda ishliri bilen kelgen bezi xitaylar soda yighini quluqigha xosh yaqmisa yighin meydanidila uxlaydiken yaki hemraliri bilen paranggha chüshüp kétidiken weyaki téléfonda sözlishidiken. Özining nede turuwatqini bilen hésablashmaydiken. Yighin tertipige hörmet qilishni bilmeydiken. Bu hal gérmanlarni heyran qaldurghan.

Milyon yéwroluq sodini bikar qilghan - yel

Xitaylarning nachar adetlirini yaxshi bilidighan gérmaniyidiki Uyghurlar mundaq bir weqeni tilgha élishidu: xitaydin kelgen chong bir shirket bilen gérman shirkiti mes'ulliri nechche on milyon yéwroluq bir soda üchün toxtam tüzüshke bashlaydu. Toxtam tüzülüwatqan shu meydanda, xitay soda shirkitining mes'uli tosattin yel qoyuwétidu. Gérman xojayinning qattiq achchiqi kelgen bolsimu, sewri qilidu we toxtamni dawamlashturidu. Emma xitay xojayini aridin uzun ötmey yene bir qétim yel qoyuwétidu. Bu qétim achchiqini basalmighan gérman xojayin derghezep bilen ornidin chachrap turup, toxtam qeghizini yirtip tashlaydu we "men haywan bilen kélishim tüzmeymen!" dep, xitay soda shirkiti wekillirini ishxanisidin heydep chiqiridu.

"Yawrupa soda - sayahet géziti" ning mes'uli wu jingyü'en xitayning nachar illetliri heqqide toxtilip؛ "xitay sayahetchiler mashinigha chiqsa uxlaydighan, mashinidin chüshse hajetxanigha yügüridighan, menzirilik jayni körse resimge chüshidighan, öyige qaytqanda héchnéme bilmeydighan alahidilikke ige" dep yazidu.

Yawropada yashawatqan xitaylarning oghriliq qilish, qatilliq qilish, baj oghrilash, qanunsiz ishlesh qatarliq qilmishliri yawrupa gézitliride da'im tilgha élinip turidu weTV qanalliri neq meydandin tartqan körünüshlerni körsitidu. Shundaq bolushigha qarimay, xitaylar özlirini "besh ming yilliq medeniyetke ige millet" dep meydisini kérip körenglep yürüshidu. (Ekrem)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet