Америка мутәхәссислири, хитай тәһдитини тосушниң 10 муһим тәдбирини оттуриға қойди


2007-11-19
Share

Америка-хитай мунасивитидики иқтисадий вә бихәтәрлик ишлирини көзитиш комитети, 15 ‏-ноябир күни елан қилған доклатида ,хитай тәһдитини тосуш үчүн америка дөләт мәҗилисигә 42 түрлүк тәдбир пиланини сунди.

Бу 42 хил тәдбирдин 10и муһим тәдбирләр дәп аталған болуп, америка -хитай мунасивитидики һәрбй , иқтисадий, учур-ахбарат, муһит ишлири саһәлиригә алақидар болуп , асаслиқи хитайниң америкидин техника оғрилишиниң алдини елиш, хитайниң һәрбий ишлардики хупиянәликигә хатимә бериш, һәқсиз риқабәт йоли билән йолсиз пайда қазинишиниң алдини елиш қатарлиқлар мәқсәт қилинған .

10 Муһим тәдбир

Пиландики оттуриға қоюлған 10 муһим тәдбирләр төвәндикидәк:

---Америка дөләт ахбарати тәшкилатиниң, хитай һәрбий тәрәққиятини игиләш җәһәттики аҗизлиқлирини тепип чиқиш вә бу җәһәттә зөрүрий толуқлима елип бериш.

---Америка, һәрбий санаитидә ишлитилидиған запчасларни импорт қилишқа болидиған дөләтләр тизимликини турғузуш(һәрбий санаәттә қоллинилидиған запчасларни хитайдин қобул қилиштин һәзәр әйләш.)

---Америка һава армийиси вә һава қатнаш трансипортиниң һәрикәт қабилийитини ашуруш, һава армийә базилириниң мудапиәсини күчәйтиш.

---Хитай һәрбий даирилириниң, һәрбий ишлар тәтқиқат вә тәрәққият ишлирида, хитайдики америка ширкәтлиридин пайдилинип кетишиниң алдини елиш.

---Америкиниң муһим компйотер системиси вә учурлирини қоғдашни күчәйтиш, зөрүр тепилса, америкиниң һәрбий, дөләт ахбарат вә дөләт бихәтәрликигә абт компйотер программилириға қошумчә мәбләғ аҗритип, хаккер һуҗумлиридин қоғдиниш күчини ашуруш.

---Пул қиммитини суний тәңшәшни қанунсиз експорт ярдәмчилиги дәп тонуш вә уни җазалаш бәлгилимиси чиқириш, бу арқилиқ, хитайниң ташқи содидики һәқсиз риқабәт үстүнликигә хатимә бериш.

---Америкиниң експорт ишлирини контрол қилиш қанунини күчәйтип, бир қисим чәкләнгән техникиларниң , хитай дөләт игиликидики вә һимайисидики ширкәтләр тәрипидин оғрилинип кетишиниң алдини елиш.

---Хитайға, хитайдики һава булғинишниң америкиниң ғәрби иштатлириға вә башқа дөләтләргә тәсир көрситиватқанлиқини уқтуруп, муһит саплиқни қоғдаш үчүн хитай тәрәпкә ортақ һәрикәт тәклипи сунуш.

---Тәйвәнниң һәрбий тәрәққиятиға ярдәм берип вақти кәлгәндә, тәйвән армийисиниң америка армийиси билән һәм башқа иттипақдаш армийәләр билән маслишип һәрикәт қилиш иқтидарини йетилдүрүш.

---Тәйвән армийисиниң мудапиә қабилийигә йетәрлик қорал-ярақ тәминатини һазирлаш.

Хоңкоң вәзийити көзитилиши керәк

Мәзкур чарә -тәдбирләр пиланида, америкиниң хитайға қарита тарқитиш елип бериватқан радио ‏- теливезисиниң тарқитиш даирисини техиму кеңәйтиш тәклипи берилгән һәм америка һөкүмәт әрбаблириниң хитай тәрәп билән көрүшкинидә, америка авази радиоси вә әркин асия радиосиниң тарқитишлириға тосқунлуқ һәрикитини тохтитишқа көндүрүш тәшәббус қилинған.

Мәзкур пиланидики йеңи мәзмунлардин бири,хоңкоң мәсилисини алаһидә әскәртип өтүшидур. Мәзкур пиланда, америка һөкүмәт әрбаблириниң хитайни зиярәт қилған чеғида, хоңкоңниму зиярәт қилиши вә у йәрдики демократийә вә әркинликниң тәрәққият әһвалини көзитип туруши оттуриға қоюлған.

Америка 1992 ‏-йили йеңи хоңкоң сиясити һәққидә бәлгилимә намлиқ йеңи сиясәт түзүп чиққан болуп, бу бәлгилимигә һәм хитай -әнгилийә арисида 1984 ‏-йили елан қилинған қошма баянатниң роһиға асасән, америка, һәрбий вә ташқи ишлардин башқа пүтүн саһәдә, хоңкоң билән бивастә иш елип бериш һоқуқиға игә һәм у бәлгилимидә " хитай тәрәп, хоңкоңниң демократийә вә әркинлик тәрәққиятидики америка мәнпәәтигә һөрмәт қилиши керәк " дәп әскәртилгән. (Шөһрәт һошур)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт