Amérika mutexessisliri, xitay tehditini tosushning 10 muhim tedbirini otturigha qoydi


2007-11-19
Share

Amérika-xitay munasiwitidiki iqtisadiy we bixeterlik ishlirini közitish komitéti, 15 ‏-noyabir küni élan qilghan doklatida ,xitay tehditini tosush üchün amérika dölet mejilisige 42 türlük tedbir pilanini sundi.

Bu 42 xil tedbirdin 10i muhim tedbirler dep atalghan bolup, amérika -xitay munasiwitidiki herby , iqtisadiy, uchur-axbarat, muhit ishliri sahelirige alaqidar bolup , asasliqi xitayning amérikidin téxnika oghrilishining aldini élish, xitayning herbiy ishlardiki xupiyanelikige xatime bérish, heqsiz riqabet yoli bilen yolsiz payda qazinishining aldini élish qatarliqlar meqset qilin'ghan .

10 Muhim tedbir

Pilandiki otturigha qoyulghan 10 muhim tedbirler töwendikidek:

---Amérika dölet axbarati teshkilatining, xitay herbiy tereqqiyatini igilesh jehettiki ajizliqlirini tépip chiqish we bu jehette zörüriy toluqlima élip bérish.

---Amérika, herbiy sana'itide ishlitilidighan zapchaslarni import qilishqa bolidighan döletler tizimlikini turghuzush(herbiy sana'ette qollinilidighan zapchaslarni xitaydin qobul qilishtin hezer eylesh.)

---Amérika hawa armiyisi we hawa qatnash transiportining heriket qabiliyitini ashurush, hawa armiye bazilirining mudapi'esini kücheytish.

---Xitay herbiy da'irilirining, herbiy ishlar tetqiqat we tereqqiyat ishlirida, xitaydiki amérika shirketliridin paydilinip kétishining aldini élish.

---Amérikining muhim kompyotér sistémisi we uchurlirini qoghdashni kücheytish, zörür tépilsa, amérikining herbiy, dölet axbarat we dölet bixeterlikige abt kompyotér programmilirigha qoshumche meblegh ajritip, xakkér hujumliridin qoghdinish küchini ashurush.

---Pul qimmitini sun'iy tengsheshni qanunsiz éksport yardemchiligi dep tonush we uni jazalash belgilimisi chiqirish, bu arqiliq, xitayning tashqi sodidiki heqsiz riqabet üstünlikige xatime bérish.

---Amérikining éksport ishlirini kontrol qilish qanunini kücheytip, bir qisim cheklen'gen téxnikilarning , xitay dölet igilikidiki we himayisidiki shirketler teripidin oghrilinip kétishining aldini élish.

---Xitaygha, xitaydiki hawa bulghinishning amérikining gherbi ishtatlirigha we bashqa döletlerge tesir körsitiwatqanliqini uqturup, muhit sapliqni qoghdash üchün xitay terepke ortaq heriket teklipi sunush.

---Teywenning herbiy tereqqiyatigha yardem bérip waqti kelgende, teywen armiyisining amérika armiyisi bilen hem bashqa ittipaqdash armiyeler bilen masliship heriket qilish iqtidarini yétildürüsh.

---Teywen armiyisining mudapi'e qabiliyige yéterlik qoral-yaraq teminatini hazirlash.

Xongkong weziyiti közitilishi kérek

Mezkur chare -tedbirler pilanida, amérikining xitaygha qarita tarqitish élip bériwatqan radi'o ‏- téliwézisining tarqitish da'irisini téximu kéngeytish teklipi bérilgen hem amérika hökümet erbablirining xitay terep bilen körüshkinide, amérika awazi radi'osi we erkin asiya radi'osining tarqitishlirigha tosqunluq herikitini toxtitishqa köndürüsh teshebbus qilin'ghan.

Mezkur pilanidiki yéngi mezmunlardin biri,xongkong mesilisini alahide eskertip ötüshidur. Mezkur pilanda, amérika hökümet erbablirining xitayni ziyaret qilghan chéghida, xongkongnimu ziyaret qilishi we u yerdiki démokratiye we erkinlikning tereqqiyat ehwalini közitip turushi otturigha qoyulghan.

Amérika 1992 ‏-yili yéngi xongkong siyasiti heqqide belgilime namliq yéngi siyaset tüzüp chiqqan bolup, bu belgilimige hem xitay -en'giliye arisida 1984 ‏-yili élan qilin'ghan qoshma bayanatning rohigha asasen, amérika, herbiy we tashqi ishlardin bashqa pütün sahede, xongkong bilen biwaste ish élip bérish hoquqigha ige hem u belgilimide " xitay terep, xongkongning démokratiye we erkinlik tereqqiyatidiki amérika menpe'etige hörmet qilishi kérek " dep eskertilgen. (Shöhret hoshur)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet