Amérika 2007 ‏- yilidn bashlap qanunsiz xitay köchmenlirini her yili türkümlep xitaygha qayturidu


2007-03-29
Share

"Amérika awazi"ning 29 ‏- mart künidiki xewiride bayan qilinishiche, amérika dölet zémini bixeterlik ministirliqi 2007 ‏- yilidin bashlap xitay qanunsiz köchmenlirini her yili 500 din türkümlep xitaygha qayturushni pilanlighan we xitay da'irilirini bu yil qayturulidighan 500 neper qanunsiz xitay köchmenni qobul qilishqa chaqirghan. Xewerde éytilishiche, bu xizmet hazirgha qeder délosi éniqlinip bolghan tümenligen qanunsiz xitay köchmenlirini toluq qayturup bolghiche dawam qilidu. Köchmen ishlirini közetküchi erbablarning bayan qilinishiche, qanunsiz köchmenler öz dölitige qayturulushtin burun, amérikida ularning qanun buyiche erz sunush hoquqi kapaletke ige.

Amérikining qanuni buyiche qanunsiz köchmenler chuqum öz dölitige qayturulidu

Nyuyork uniwérsitéti qanun pakoltétining köchmen qanuni tetqiqatchisi muzepper chishti ependining bayan qilishiche, amérikining qanuni buyiche qanunsiz köchmenler chuqum öz dölitige qayturulidu. Amérikida hazirgha qeder "qanunsiz köchmen" dep axirqi sot hökümi chiqirilghan adem sanila 37 ming. Bundaq kishiler dawamliq éniqliniwatidu. Amérika herbir qanunsiz köchmenni tutup turush üchün, her küni az dégende 95 amérika dolliri chiqim tartiwatidu, bu amérika xelqi üchün az yük emes. Emma hazir amérikida bijiriliwatqan "qanunisz köchmen" déloliri bir az murekkep, buning ichide siyasiy panahliq tilep testiqlanmighanlar bar, ularning yene erz sunup, öz dölitige qayturulsa ziyankeshlikke uchraydighanliqini ispatlash hoquqi bar. Nimila bolmisun amérika qanunsiz köchmenlerni haman öz dölitige qayturidu. Tetqiqatchi chishti ependining bayan qilishiche, bezi kishiler amérikigha kelgendin kéyin özining kimlikini ispatlaydighan hemme matériyallirini yoq qiliwetkechke, uning kimlikini éniqlap chiqish qéyin boliwatidu.

2006 ‏- Yili, amérika öz dölitige qayturushni pilanlighan 119 ademni xitay hökümiti qobul qilishni ret qilghan idi. Amérika hökümiti xitay bilen "qanunsiz köchmenlerni qayturush kélishimi" imzalighandin kéyin, gerche xitay hökümiti yene qandaqtur "qanunsiz köchmenlerning hemmisige oxshash mu'amile qilish kérek" déyish arqiliq siyasiy panahliq tiligenlernimu qayturushni telep qilghan bolsimu, emma amérika hökümiti uninggha pisen qilmay, qayturushni qarar qilghan bir türküm ademni, ulargha yaxshi mu'amile qilish sherti bilen qayturdi.

Chet'ellerde qanunsiz xitay köchmenlirining herxil heriketliri eyiblesh arqiliq tüzitish mumkin bolmighandin kéyin qanun buyiche sotlinishqa bashlidi

Birnechche yildin buyan neshriyat yüzide körülgen doklatlar we xewerlerge qarighanda, xitay chet'ellerge qarita ishik achqandin kéyin, chet'ellermu xitay puqralirining öz dölitige kélishige asanliq yaratti. Tereqqi qilghan döletler xitaylarning kélip ma'arip terbiyisi körüp, öz dölitige qaytip yéngiliq yaritishini ümid qilatti. Shu sewebtin xitaylar dunyaning hemme yéride peyda bolushqa bashlidi.

Bu jeryanda, gerche birmunche xitay puqraliri qanunluq ish qilghan bolsimu, emma xitaylarning bezi "köchmen alametliri" ning dunyada tesiri intayin nachar boldi. 2006 ‏- Yili 4 ‏- ayda los anjilis gézitide bésilghan "közge körünmeydighan qanunsiz köchmenler" dégen maqalide, amérikigha normal halette wiza élip kelmey, belki etkeschilerge pul bérip yushurun kelgen yaki yalghan höjjet yasap kelgen yaki chégridin oghriliqche ötüp kelgen xitaylarning qanunsiz ishlewatqanliqi, jem'iyet exlaqini buzidighan eng rezil ishlarni qiliwatqanliqi pash qilin'ghan idi. 2007 ‏- Yili 3 ‏- ayning 27 ‏- künidiki amérika metbu'atliridimu, qanunsiz xitay köchmenlirining shehwaniyliq déloliri nyuyork shtatining baffolo yerlik sotida soriliwatqanliqi heqqide tepsiliy xewer bésildi.

Buningdin burun, bashqa döletlerde qanunsiz xitay köchmenlirining yaman ishliri eyibleshke uchrighanda, kommunist xitay hökümitining zuwani bolghan "xelq géziti 2000 ‏- yili 4 ‏- ayda, "xitay puqralirigha yaxshi mu'amile qilmidi", "qanunsiz köchmen dep eyiblidi" dep fransiye hökümitige naraziliq bildüridighan maqale bésilghan idi.

Chet'ellerde tesiri téximu yaman boluwatqan mesile xitay köchmenliri ichidiki jasusluq mesilisi

Chet'ellerde tesiri téximu yaman boluwatqan mesile xitay köchmenliri ichidiki jasusluq bilen shughullinish mesilisi. Yéqinda amérikining jenubi kaliforniya yerlik sotida xitay köchmenliri ichidiki jasusluq délosi sotlishiqa bashlidi. Xewerge qarighanda, 1985 ‏- yilidila alliqachan amérika puqraliqigha ötken, amérikida yaxshi ma'arip, xizmet we turmush shara'itige ériship bolghan bolsimu, yenila uzun yillarghiche chongqur yushurunup , kommunist xitay üchün jasusluq qilishtin waz kechmigen mey dajzh qatarliq xitay jasusliri amérikining dölet mudapi'e téxnikisini oghrilap xitaygha yollap bérish üchün heriket qilip qolgha élin'ghan.

Buningdin burun, amérikida buninggha oxshash délolar az bayqalmidi. Hetta amérika uniwérstétlirida proféssor bolup turup, yene bashqa namelum wastilar arqiliq xitaygha bashqurulidighan bombigha ishlitidighan éléktironluq yadro détallirini ikisport qilghan jasusluq heriketlermu bayqalghan idi. Xitayning awstraliyidiki elchixanisidin xitay kommunist hökümitidin yüz örüp chiqip ketken chén yunglin ependining éytishiche, shimali améirikida mingdin artuq xitay jasusi yushurun'ghan. Gerche bundaq kishiler herxil bahane bilen, hetta yalghan éytip siyasiy panahliq tilesh arqiliq özining kimlikini yushurup, mehellilerde milletchilik, yurtwazliq bahaniliri bilen herxil siyasiy buzghunchiliq yaki iqtisadiy axbarat oghrilash bilen shughulliniwatqan bolsimu, ular yenila amérika bixeterlik tarmaqlirining neziridin saqit bolalighini yoq. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet